Naragsak ni Andi iti Sidong ni Philmar
ITI panagkasangay ni Philmar Alipayo a kabbalay ni Andi Eigenmann itay katengngaan ti Agosto, inruknoyan daytoy ni Andi iti makapatignay a mensahe.
Segun ken ni Andi, dawatna a marikna koma ni Philmar a nasuerteda ken dagiti annakda a da Ellie, Lilo ken Koa gapu ta adda daytoy iti biagda nga agiina, nangruna ken ni Andi mismo. Kuna ti aktres nga iti sidong ni Philmar, ti biag ket ad-adda nga addaan kaipapanan, naragragsak, ken saan a nakabutbuteng. Impaganetget ni Andi a saanna nga isukat ti biagna iti sidong ni Philmar iti ania man a banag iti lubong. Dawatna a masagrap koma met ni Philmar ti isu met laeng a ragsak nga ipapaayna iti lubong.
Malaksid ken ni Andi, kimmablaaw met ken ni Philmar dagiti papagayamda iti showbiz.
* * *
Agsasaruno dagiti parabur a sumangsangbay ken ni Cristine Reyes.
Itay nabiit, maysa kadagiti 63 nga artist iti nadumaduma a tay-ak a naipaayan iti Ani ng Dangal 2021 manipud iti National Commission for Culture and the Arts (NCCA).
Iti sabali a bangir, dina pay imbutaktak ti sumaruno a proyektona iti Viva gapu iti pandemia. Patien ketdi ti kaaduan a silpo daytoy ti pelikula nga aksion a Maria (2019) nga indirehe ni Pedring Lopez.
Adu ti nagrukbab ken ni Cristine iti nasao a pelikula gapu iti laingna iti martial arts, panagiggem iti paltog, ken panangisayangkatna kadagiti stunt ta saan a nangala iti ka-double-na.
Malaksid iti nasao a kasilpo a pelikula, adda pay sabali a pelikula a manamnama nga aramiden ti aktres.
Iti pannakaisursurat daytoy, agtartaray iti TV5 ti teleserye a “The Encounter” a pagbidaanda ken Diego Loyzaga. Bersion daytoy iti Filipinas ti orihinal a teleserye iti Korea.
Maragsakan ni Cristine ta puro positibo dagiti mabasbasana a komento maipapan iti nasao a teleserye.—O