Ania ti Kayatna a Sawen, Angkel?

PUGTUAM man no ania ti kayat a sawen dagiti balikas a napabuddak ken naugedan kadagitoy a parapo a naadaw manipud kadagiti sinurat a naipablaak iti magasintayo. Masarakan dagiti sungbat iti panid 61.

1. Dagiti ubbing, didan ammo nga ibuksilan ti kayat a sawen ti sumsumged a mata. Naturturayda pay ketdin ngem dagiti nagannak kadakuada. Natatangken ti uloda. (“Ditoy Nangguyodan,” Sarita ni Juan Al. Asuncion, Hunio 30, 2014.)

2. Masapul nga agpataudtayo kadagiti dekalidad a taraon, a mangipanamnama iti nasayaat a salun-at, mangkissay iti risgo ti sakit wenno an-annayen, ken mangpaatiddog iti biag. (“Okeyka, Apong” ni Abercio Valdez Rotor, Ph.D., Marso 21, 2016.)

3. Natangadko ti dakkel a baki a naibitin iti leppay a sanga ti salamagi. Gaw-atek koma idi mataldiapak ni Apong Pilo. Agsagsagawisiw a sumalsalog iti sinabaan. Kasla di mabannog. Timmayengteng ti ngisitna. Purawen ti buokna. Ngem di nagbaliw ti narakab a pammagina. Nagutugot manen ti panagdayawko kenkuana. (“Apong Pilo,” Sarita ni Jaime R. Luzano,” Disiembre 9, 1968/ Mayo 9, 2016.)

4. Idi nabilang ti paruad, timmangig manen da Tata Anno ken Nana Caria ta ad-adu ti nayaspilida a kuarta iti bado ni Andong ngem ti nayaspili da Tata Matias ken Nana Beriang iti kawes ni Oring. (“Kasanoka, Abalayan?” Sarita ni Manuel S. Diaz, Nobiembre 9, 1959/Oktubre 23, 2017.)

5. Adingko, Saankay’ koma unay a lumdaang gapu iti ipupusayko. Ta daytoy ti pamunganayan ti naan-anay a gundaway, wayawaya ken ragsakyo. (“Iti Sakaanan ti Tanem,” Sarita ni Leonardo Q. Belen, Nobiembre 2, 1959/ Nobiembre 13, 2017.)