Nalabes a Cadawyan
Sin. ni R. Q. PEÑA Sarrat, Ilocos Norte
ITI pannacalasattayo iti maicadua a gubat ti lubong, adu unayen ti namalbaliwan dagiti agtutubo. Nagbalbaliwen ti ugali dagiti lallaki, kasta met dagiti babbai. Saanen nga umno ti aramid dagiti babbai, uray sadino ti ayanda. Napukawen a namimpinsan ti puli ni Maria Clara. Manmanon ti makita a babai nga atiddug ti buocna, adun dagiti nacapaculot, agcolorete, agaramat iti cutex, lipstick, ken makiskisan payen ti kidayda. Naardiudda unayen. Awan a pulos ti ammoc a maited dagitoy, no saan la a pagbusbusbosan iti cuarta.
Nagdagup metten ti kinamammartec dagiti lallaki, agsugalda, ken nabarayuboyda unay. No mapanda iti escuela, maipagpagarup laengen a mapanda agbasa, ngem mapanda met gayam agsirig wenno agarem. Agarwatda cadagiti agcacapateg a shark skin, palm beach wenno de lana. Awanen ti makita nga agaramat iti barong tagalog ta napucawen ti kinaemma ni Juan de la Cruz.
Nacasacsakit ti nakem no makita nga agtactacder ti maysa a balasang, ket awan met a pulos ti pammadayaw ‘toy baro a saan a mangisagut iti tugawna. Wenno no lumabas ti maysa a balasang, saan a malapdan dagiti malabasanna a babbaro ti panagsagawisiwda. Naalas unay dagitoy a naipacadawyan cadagiti lallaki cadagitoy nga aldaw.
Cadagiti met pagsasalaan, saanda a maatiw nga agsala iti zamba, rhumba, conga, tango, boogie-woogie, ken dadduma pay. Saan a mabayag, irugidanto pay ngatan ti agsala iti bomba atomica.
Saan nga agsarday ti sayangguseng dagiti lallacay ken babbaket gapu cadagitoy nalabes a cadcadawyan dagiti agtutubo ita.
Idi can un-unana nga aldaw, saan can a mabalin nga agcuyog ti baro ken balasang no awan ti maicatlo a caduada. Cadagitoy nga aldaw, uray pay no agcasinsin ti agcuyog, agaligagaw payen dagiti tattao. Daytoy ti pacakitaan a dakes unayen dagiti naipacadawyan cadagiti agtutubo. Ngem no siac met la a maysa, saanco nga ipalubos a mapucaw ken mapunas ti kina-Filipinoc ken nangnangruna unay ti kinaIlocanoc; ta babaen ti kina-Ilocanok, mabalinco nga itangsit a ti ugalitayo ti casayaatan iti amin a paset ti Filipinas.—O