Ikupinmon ti Napalabas
Dear Ikit,
Duapulo ket lima a tawenen a nabaloak kalpasan ti lima a tawen a panagdennami iti daydi lakayko a padak a mangisursuro idiay Tondo, Manila, ngem saankami a naaddaan iti bukod nga anak.
Tallo a bulan kalpasan ti pannakabalok, kabayatan ti panagur-urayko iti ibaballasiwko iti riles ti tren a mapanen mangisuro, pagammuan laengen ta adda nangawag kaniak iti Ma’am a nangyawat iti maysa a maladaga a lalaki. Nabessag ken lumlumbeg dagiti mata ti balasang a nangyawat kaniak iti maladaga. Kaing-ingas ti maysa nga estudiantek iti elementaria idi nabiitak pay a mangisursuro iti eskuela nga adda iti asideg iti riles ti tren.
Naikulengak; diakon nasiputan ti nagturongan ti balasang a nangyawat iti maladaga. Sinapul dagiti matak kadagiti barungbarong iti igid ti riles ngem awanen a makitak.
Nagtarusak iti klinika ti pangisursuruak a pagadalan. Imbagak iti nars ti napasamak. Dinalusan ken inestimarna ti maladaga sa nagpagatangkami iti mamador, gatas ken dadduma pay nga alikamen ti kaippasngay nga ubing, pangpalpaliiwan no agsubli ‘diay nangyawat kaniak. Diakon naipasnek ti nangisuro iti daydi nga aldaw.
Inyawidkon ti maladaga idi awan immay nangtunton ken ad-adu ti immanamong a kamaestraak nga inted ti Apo isuna a liwliwak iti ipupusay ni lakayko. Inrehistro ti nars ti eskuelami a daytoy nga ubing, anakmi iti daydi nagawan a lakayko. Di nagbayag, nagaplikarak a nangisuro ditoy probinsia ket ditoyen a dimmakkel ‘toy inted ti Apo nga anakko nga awan ti nakakaammo iti pannakaitaona malaksid iti nars ken dadduma a kamaestraak iti pinanawak a pagadalan iti Tondo.
Kumot ti birngasda ditoy lugarmi iti anakko gapu ta sikogko kano idi natay ti amana. Impanaganko iti nagan daydi lakayko isu nga adda Jr. a naiparaipus iti naganna ken Junior ti awagmi kenkuana.
Ikit, makokonsiensiaak. Rumbeng kadi nga ipudnok iti anakko a sabali a babai ti nangipasngay kenkuana ngem siak ti nangilillili ken nangpadakkel kenkuana agingga iti panagbalinnan a maysa a propesional ken addaanen iti napintas a trabaho ditoy probinsiami?-Gilda
Kaanakan,
Ammo met ni Junior, kasta met dagiti kakabagiam ken gagayyemmo dita probinsia, a nayanak a kumot gapu iti nasapa a panangala ni Apo Dios iti daydi maestro nga asawam. Napnuan ayat ken dungngo ti pannagibim ken panangpadakkelmo kenkuana. Ania pay la ti pakakonsiensiaam?
Sagut ti Apo kenka ni Junior. Naipasagepsep kenkuana ti napudno nga ayat ti maysa nga ina a nasapa a nabalo. Napadakkelmo, napaadalmo ken nakapagpuesto iti nasayaat a takem dita yanyo nga awan nakakaammo a saan a naggapu iti tianmo.
Retirado met ngatan daydi nars ken dagidi mamaestra idiay Tondo a makaammo no kasano ti pannakaitao ti anakmo. Amangan no awanda pay ketdin idiay Tondo. Saan a rumbeng a makonsiensiaka ta inted kenka ti Apo tapno agbalin a nasayaat a makipagili. Daydiay nangipasngay kenkuana ti manglaglagip itan iti napait a napalabasna ket am-amaden ti konsiensiana no sadino itan ti yan daydi impasngayna.
Ikararagam a sapay koma ta nasayaat laeng ti kasasaad daydi nangipasngay iti anakmo a kas pagyamanmo ken ni Apo Dios iti naited kenka a liwliwam.
Wen, anakmo ni Junior. Ikupinmon ti napalabas.—Ikitmo