Ti Asok ken ti Paskua
ADDAAK pay laeng iti elementaria idi arisgarakon ti maaddaan iti aso. Gapu ngata ta kaykayatko ti agmaymaysa ngem ti mapan makiay-ayam kadagiti kapatadak.
Malagipko la unay daydi umadanin a Paskua. Agtawenak idi iti walo. Buybuyaek dagiti kakabsatko nga agpimpinta iti aramidenda a Christmas Tree a sanga ti salamagi.
Kalpasan a napintaanda, nagibitinda kadagiti lolipap ken nadumaduma a kendi. Kunada a sagsasangapulokaminto a kendi ti purosen inton madanonan ti Aldaw ti Paskua. Immisemak laeng. Iti unegko, aso ti kayatko a regalo iti dayta a Paskua.
Maal-alumiimak nga immasideg iti daydi nanangmi kabayatan nga agisagsagana iti pangaldawmi. Nagtugawak iti abayna. Pimmidutak iti bunga ti utong sa pinutolputolko. Kinitanak daydi nanangko. Dinamagna no ania ti ibagak. Ammona latta ngaminen nga adda dawatek no tulongak isuna nga agisagana kadagiti lutuenna.
“Ania ti kayatmo a regalo inton Paskua?” pagammuan ta kinunana. Immisemak iti kasta unay. Immasidegak ken ni nanangko. Inyarasaasko a kayatko ti maaddaan iti taraken nga uken.
“Narigat ti agtaraken iti aso,” kinunana ketdin.
Amangan kano no kagatennanto pay dagiti padak nga ubbing. Nakaluaak iti dayta a nangngegko. Nagpukaw a namimpinsan ti ladawan ti aso iti mugingko.
Ngem inarakupnak ni nanangko. Naasian la ketdi kaniak. Inkarina a regaluannakto kano iti uken.
Nagyamanak ken binisbisongko ni nanangko. Inkarik a dungdungnguek ken taraknekto a nasayaat ti iregalona kaniak nga aso.
Dimteng ti kaaldawan ti Paskua. Napalalo ti ragsakko iti dayta a kanito. Nakagaggagetak payen a timmulong a nagdalus iti uneg ken ruar ti pagtaenganmi. Kiniskisak pay a nasayaat ti bangsalmi. Inukkonko met dagiti nangingisit a kaldero ken bangami. Inugasak amin dagitoy. Naragsakkami a nagsasango iti dayta a pangngaldaw.
Kalpasan ti pangngaldaw, ur-urayek ti ited ni nanangko nga inkarina a regalo. Ngem awan naurayko. Agingga a nakaturogak iti sagumbimi. Diak ammo no mano a minuto a nairidepak. Nakariingak laeng idi adda mangdilpat iti takiagko. Nakigtotak ken nabaringkuasak. Adda nakitak nga uken iti asidegko. Kayumanggi ti marisna. Dagus nga inubbak ken insalsalak. Mulmulagatannak laeng ti uken. Masmasdaaw siguro no apay nga isalsalak. Nakaragragsakak iti dayta a kanito.
Dagus a napanak iti kosinami. Sinapulko ni nanang ngem awan a makitak iti kosinami. Dagus nga immulogak iti agdanmi a kawayan. Nakitak ni nanang nga agin-indayon iti way a dagidagi iti sirok ti kayo a tiesa nga adda iti abay ti abongmi. Daras nga inasitgak. Inarakupko ken nagyamanak kenkuana. Imbilinna kaniak a taraknek a nasayaat ti uken. Inamadna pay no ania ti ipanaganko iti tarakenko. Lester, kinunak a dagus.
Wen, ni Lester ti umuna unay a tarakenko nga aso. Nupay maysa nga aspin, dinungdungngok isuna a kas maysa a kabsat ken gayyem.—O
(Kameng ti autor iti Batac City Dog Enthusiast, grupo dagiti agtartaraken iti aso iti Siudad ti Batac.)