No Apay nga Aglemlemmeng ni Kullaaw
IDI un-unana a panawen, nagtataripnong dagiti tumatayab tapno pumilida iti arida. “Ay, ket siak daytan, a!” kinuna ni Agila. “Napigsaak ken aglanglangaak nga ari!” “Huh, naglaad ti timekmo; makapasangit!” insupiat ni Abestrus wenno ostrich. “Siak ti rumbeng nga agbalin nga ari ta dakkelak, nalaingak pay a tumaray, ken agungorak pay a kasla leon!”
“Dika met makatayab!” kinuna ti sabali a tumatayab.
“Siak latta ngaruden!” kinuna ni Pabo Real a namagbalin pay iti ipusna a kasla paid. “Siak ti kapipintasan kadakayo amin!”
“Napangaska met unay,” kinuna ni Kullaaw. “Kadatayo amin, siak ti kadadakkelan iti mata. Isu a rumbeng a siak ti agbalin nga ari!”
“Saan a mabalin!” adda nangipukkaw. “Apaman a sumingising ti init, mapankan maturog!”
Agingga iti kinuna ti maysa a tumatayab: “No asino ti kangatuan iti matayab, isun ti pilientayo nga ari!”
“Mayat! Mayat!” impukkawda amin ket naggigiddandan a timmayab. Napanganga lattan ni abestrus ta di met makatayab.
Ni Ganso, nagmalmalem a timmayab agingga a nagdisso iti tuktok ti kangatuan a bantay.
Ni met Agila, dua nga aldawna a nagam-ampayag iti ngatuen ti bantay a nagdissuan ni Ganso.
Ni met Buitre, tallo nga aldawna nga awan sardayna a nagtaytayab; ket agturong ken ni Apo Init!
“Ay, siak ti kangatuan iti natayab! Siakon ti ari!” kinuna ni Buitre. “Nangatngatoak ngem sika!” kinuna ti maysa a timek.
Nakigtot ni Buitre ta ti timek, naggapu nga agpayso iti ngatuenna. Timmaliaw ken anian a siddaawna ta nakakapet iti bukotna ti maysa a nakabasbassit a tumatayab— ni Pitpiting. “Siak ti ari!” kinuna ni Pitpiting.
“Saan a mabalin!” kinuna ni Buitre ket nagkulipagpag tapno makaibbet ni Pitpiting. Ket idi namnamaenna nga awanen ni Pitpiting iti bukotna, intuloyna ti timmayab a nagpangato agingga nga insardengnan iti napalalo a bannogna.
“Siakon ti ari!” kinuna ni Buitre.
“Saan, siak ti ari!” kinuna ni Pitpiting nga adda pay la gayam iti bukotna. Saanen a nakasungbat ni Buitre gapu iti bannogna. Nagsuek pay ketdin a nagpababa. Sakbay a makapagdisso iti daga ni Buitre, timmayaben a simmina ni Pitpiting. “Siak ti ari!” kinuna ni Pitpiting.
“Sinisuitik ti inaramidmo!” kinuna dagiti tumatayab a makapungtot ket nagiinnunada a napan mangtukma ken ni Pitpiting.
Iti butbuteng ni Pitpiting, timmayab a napan naglemmeng iti abut a nagpanawan ti uleg. “Masapul a di makalibas ni Pitpiting iti abut!” kinuna dagiti tumatayab. “Sika, Kullaaw, gapu ta sika ti kadakkelan iti mata kadakami, bantayam ti ruangan ti abut! Gammatam a dagus apaman nga itungrarawna ti ulona!”
Isu a nagtugaw ni Kullaaw iti sango ti abut.
Isuna laeng ta idi bumigaten ket simmingisingen ti init, inkidemen ni Kullaaw ket ginuyoden ti naimas a ridep. Isu a nakalibas ni Pitpiting. Anian nga alistona a timmayab a nangpanaw iti dayta a lugar.
Manipud idin, iti babain ni Kullaaw iti pannakapalusposna iti nakabasbassit a billit, sa laengen rummuar no nasipnget. Ket iti aldaw, mapan maturog iti abut iti kayo tapno di makitkita dagiti padana a tumatayab.
(Sarsarita idi ugma manipud iti Aprika.)