TIPS/Tarabay iti Pagtaengan, Salun-at ken Dadduma Pay
NO NADALUSAMON TI REF, ISUBLIM KADI A DAGUS DAGITI NAGYANNA? Gagangay a saan a mairekrekomendar ti dagus a panangisubli kadagiti linaon ti ref kalpasan a madalusan ti ref ken napagandaren daytoy. Maibalbalakad ketdi nga aguray iti di nakurkurang ngem dua nga oras, wenno urayen a lumamiis, sakbay nga iserrek dagiti nagyanna. Iti kasta, saan a maparigatan ti makina ti ref. (Ladawan: mashed.com)
PANANGDALUS ITI MATTRESS. Mairekrekomendar ti panagaramat iti baking soda a pangpabanglo ken pangikkat iti dam-eg (moisture) ti mattress wenno kotson. Warakiwakan iti baking soda ti kotson sa bay-an a kastoy iti uneg ti maysa nga oras. Iti kasta, maaddaan iti gundaway ti baking soda a mangagsep iti angot, dam-eg, ken uray payen buot ti kotson. Kalpasanna, i-vacuum ti baking soda. No awan vacuum cleaner, anusan nga ikkaten ti baking soda babaen ti brotsa (brush) ken dustpan. (Ladawan: f7e5m2b4. rocketcdn.me)
KAYATMO TI AGARAMID ITI BUKODMO A FACIAL
SCRUB? Mangala iti asukar sa ilaokmo iti losion. Daytoy ti ipuligadmo iti rupam. Bay-am iti sumagmamano a minuto sa agdiram-oska. Makatulong daytoy a mamagbalin a presko ti riknam malaksid pay a lumamuyot ti kudilmo. (Ladawan: hellogiggles.com)
KAYATMO A NASIMBENG TI TUROGMO? Adda dagiti agkuna a ti panangipuesto iti naibaso a danum a nalaokan iti asin ken suka iti sirok wenno abay ti katreda, pukawenna ti dakes nga enerhia (negative energy) iti kuarto babaen ti panangagsepna iti daytoy. Ngarud, makatulong iti nasimbeng a pannaturogda. Wenno babaen ti kaadda daytoy iti kuarto, makatulong iti nasaysayaat a rikna ti tao nga adda iti kuarto. Padasem; awan met ti mapukawmo. (Ladawan: diyjoy.com)