Agtultuloy ti Nasayaat a Biag ni Bea
NARAGSAK ni Bea Alonzo ta iti mabiit, agbalinton nga opisial a makipagnaed iti Espania. Iti naudi nga ipapanda ken ti nobiona a ni Dominic Roque, gimmatang ni Bea iti
apartment-na sadiay.
Daytoy ti gapuna nga iti mabiit, maipaayanton iti sertipiko nga opisial a makipagnaed iti nasao a pagilian.
Kayatna a sawen, saanton a masapul ni Bea ti visa no mapan iti daytoy a pagilian, ken uray kadagiti sumagmamano a kabangibang ti Espania a pagilian iti Europa.
* * *
Iti maysa nga interbiu, inako ni Jennica Garcia a naigatangannan iti kabarbaro nga
aircon ti pagnaedanda ken dagiti annakda. Sakbay kano ngamin ti kaadda manen ti trabahona iti showbiz, inan-anusanda ti segunda mano nga aircon a daksanggasat met a nadadael ket inan-anusanda manen ti nagusar iti electric fan. Saan kano met a nagrekreklamo dagiti annakna.
Ti imasna, iti naminsan a nagmalmalem a nagteyping ket naisagrapna ti nagmalmalem met nga aircon, kellaat a nalagipna dagiti annakna a kadagidi a tiempo, nagmalmalem met, siempre, a nagusar iti electric fan iti laksid ti pudot nga ipaay ti tiempo ken ti aglawlaw ti Kamanilaan. Nakonsiensia ni Jennica. Idi nalpas ti trabahona iti dayta nga aldaw, nagtarusanna ti napan gimmatang iti aircon.
* * *
Maragsakan ni Roderick Paulate ta iti pannakasursurat daytoy, umadani a maipabuya ti
“In His Mother’s Eyes” a pelikula a pagkaduaanda ken Maricel Soriano.
Nupay saan a nakapasa ti nasao a pelikula iti 2023 Metro Manila Film Festival, naisapsapa met ti pannakaipabuyana.
Banag a pakaragsakan ni Roderick ta mananamna manen ti rikna ti addaan pelikula a buyaen ti kaaduan.
Iti pelikula, nagakem manen ni Roderick a baien, kas kadagiti immun-una ken kaaduan a pelikulana.
Ngem iti daytoy a gundaway, kuna ni Roderick a sabali nga atake ti impakatna.
Intayto man ngarud penken.—O