“Nalaingka nga Agbasa!”
IDI addan puotko, paseten ti pagtaenganmi ti Bannawag. Isu a saanak pay a nag-Grade One, agbasbasaakon iti Bannawag. Saan pay nga uso idi ti kindergarten ditoy ilimi a Piddig (Ilocos Norte). Adda ketdi idi pribado a mangisursuro iti aw-awaganda iti kartilia. Ni Maestra Mediong a taga-Poblasion. Ditoy nga agsursuro nga agbasa ken agsurat dagiti annak dagiti adda mabalbalinna sakbay a sumrekda nga agbasa iti elementaria.
Saanak a simrek nga agadal iti kartilia ken ni Maestra Mediong ta awan met mabalbalinmi. Ni tatang ketdi ti immuna a maestrok. Innem siguro ti tawenko idi rugiannak nga isuro ni tatang. Pangisaganana met kaniak siguro a sumrek iti eskuela. Pito ti tawen ti mabalin a sumrek iti eskuela idi. No agduadua ti maestra iti tawenmo gapu ta di intugot ni tatang wenno nanangmo ti papel ti nakairehistruam wenno nagbuniagam idi mapannaka ipalista, bilinennaka ni maestra nga iparabawmo ti kanawan nga imam iti ulom sa gaw-atem ti akinkanigid a lapayagmo. No magaw-atmo, mabalinmon ti sumrek nga ag-Grade One.
Adda tiempo idi Grade One-kami a napaayabankami a saggaysa iti opisina ti prinsipal. Diak malagipen no asideg idin ti panagserra ti klase. Mabutbutengak idi sumrekak iti siled ti prinsipal ta panglukmegen a baket daytoy ken kasla naunget dagiti paningkiten a matana. Sa ketdi ti ammok idi, sa laeng “mayopis” ti maysa a pupil no nakabasol. Ngem nagkulpa ti gitebgiteb ti barukongko idi yawat kaniak ti prinsipal ti nakaukrad a libro. Pagbasaennak gayam!
Siempre, Ilokano ti linaon ti pabasana a panid ta Ilokano pay laeng idi ti lengguahe iti panagisuro iti Maikamaysa ken Maikadua a Tukad ti elementaria. Ania pay, tinarastaskon, a, ti nagbasa. Ket no sakbay pay a simrekak iti Grade One, basbasaekon dagiti nobela a “Singin iti Sinukuan” kada “Ti Pagbutbutngan iti Sierra Madre” iti Bannawag! Daytanto la ketdin sangapanid laeng nga istoria iti likud ti libro a para iti Maikamaysa idi a no basaem, kaska la agkankanta? “A, e, i, o, u / ba, be, bi, bo, bu…Ti bao. Ti bao babai…”
“Nalaingka nga agbasa!” inyisem ti prinsipal idi malpasko a basaen ti panid nga intedna. Saan met gayam a naunget!
Manipud iti Grade 1 Section B napanakon iti Grade Two Section A iti sumaruno a tawen. Ania ngarud ket nalaingak met ngaminen nga agbasa gapu iti panagprakpraktisko nga agbasa iti Bannawag!—O