Ti ‘Mannubbot’ ni John Lloyd
KUNA ni John Lloyd Cruz a nakagasgasat gapu iti idadateng iti biagna ni Elias nga anakna. Innayonna a ni Elias ti ‘nangisalakan’ kenkuana ket dina mapanunot no ania ti biagna no awan ni Elias. Gapu iti ubing, nagbaliw a namimpinsan ti panagkita ni John Lloyd iti biag ken iti lubong.
Iti agdama, da John Lloyd ken ni Ellen Adarna nga ina ni Elias ti tumaktakder a “nagannak” ti ubing. Kayatna a sawen, nupay nagsinadan, isuda latta ti kankanayon nga adda para ken ni Elias.
Nagyaman met ni John Lloyd iti asawa ni Ellen a ni Derek Ramsay ta ipangpangrunada ti pagimbagan ni Elias.
Iti sabali a bangir, inako ni John Lloyd a ni Isabel Santos ti nobiana iti agdama. Kuna ti aktor a nagtaud iti pamilia ti artist ni Isabel a naam-ammona daytoy iti umuna unay nga art gallery a binisitana kadagiti tiempo a “naginana” iti showbiz.
Inako pay ni John Lloyd a dakkel ti pakaigapuan ni Isabel kadagiti ania man a mapaspasamak ita iti biagna
nangruna kadagiti naiimbag a bambanag. * * *
Iti maysa a paskil iti social media, inako ni Sharon Cuneta-Pangilian a sa la nayat nga aramidenna ti “Dear Heart” a konsiertoda ken Gabby Concepcion a sigud nga asawana idi immannugot ti agdama nga asawana a ni dati a Senador Francis “Kiko” Pangilinan ken dagiti annakda a da Frankie wenno Kakie, Miel ken Miguel Pangilinan.
Innayon ni Sharon a dagitoy ti immuna a nangkablaaw kenkuana apaman a nalpas ti konsierto.
inawatna pay a sardengan koma ti publiko a pagpalloten dagiti annakna kada Sen. Kiko ken Gabby (a ni KC Concepcion).
Saan ketdi a nakabuya iti konsierto da Kakie (ta agad-adal iti
New York City, USA) ken KC.—O