“Sangakaarrubaan”
AGPAYSO a nalaka para iti maysa a komunidad ti agrambak a siraragsak no adda panagkikinnaawatan. Saan a kasapulan ti sangsangkamaysa a panagtutunos ta no adda panagpipinnabus-oy, maliklikan a tumpuar ti saan a panagkikinnaawatan--a gubuayen ti adu a rason a kas iti panagduduma ti puli ken kannawidan, panagduduma ti pagduyosan, panagduduma iti pammati, ken dadduma pay a rason--ken no dadduma, panagsusupiat, a mabalin a mangpukaw iti ngayed ti panagrambak. Ngem naipaugalin ken ni Ilokano ti kinalaingna a makibagay, makisinged, ken makikinnammayet. Lumtaw dagitoy a kababalinna kadagiti panawen ti panagrambak a kas iti Paskua ken panangsarabo iti Baro a Tawen.
Kasta ti ipakpakita daytoy akkubtayo a dibuho ni Eugene Cubillo a pinauluanna iti “Sangakaarrubaan.” Maysa a komunidad nga addaan iti nagduduma nga ugali, pagduyosan, ken panagrambak. Iti laksid ti kinaagduduma ti klase ken estado ti biag dagiti agindeg, nagtalinaedda nga agkikinnaawatan ket sangsangkamaysada nga agrarambak iti bukodda a wagas.
Kas visual artist-- painter/graphic artist/designer, ni Cubillo ti nangted biag ken ni “Botchog,” maysa a comic strip a maipabpablaak tunggal Domingo iti Manila Bulletin, kabsat a pagiwarnak ti Bannawag. Naaddaan metten ni Cubillo iti siam a Solo Art Painting Exhibit a naangay ditoy pagilian manipud idi 2011. Inramenna dagiti inaldaw a padasna kadagiti visuals ken painting a partuatna. Madlaw ti panagaramatna iti baraha kadagiti dadduma nga artwork-na a kas pangipakitana a ti “medium is indeed the message”-- a maysa a sugal ti biag.
Kaaduan kadagiti aramid ni Cubillo ti mixed media. Nairaman dagitoy iti nasurok a 50 a nadumaduma a local ken international group art exhibitions kas iti South Korea (International New-Salon Exhibition/ Korea Art Festival 2004); ti Luciano Benetton-Imago Mundi, Map of the New Art iti Island of San Giorgio Maggiore, Venice Italy idi 2015; iti Central Europe Budapest (Moments of Central European Visual Art Festival-AMS) idi 2014; ken iti World Wide Art Hub, King Abdulaziz Camel Festival Riyadh, Kingdom of Saudi Arabia. Nakaawat metten iti adu a pammigbig ken pammadayaw manipud iti nadumaduma a salip iti arte a kas iti NCCA Diwa ng Sining 2002 Artista ng Bayan, ken maysa kadagiti Top Three Awardee babaen ti obrana a “Boundary Withdrawn.”