Tarigagayan ni Derek nga Agsikog Manen ni Ellen
KINIGTOT ni Kapamilya aktor Ejay Falcon dagiti agbuybuya iti iseserrekna a kas baro a karakter iti para malem a teleserye a “Nag-aapoy na Damdamin.” Ni Ejay ti agakem iti misterioso a karakter ni Elias nga addaan iti nauneg a pakainaigan kadagiti pamilia Buencamino. Iti umuna nga iruruarna iti serye itay Disiembre 5, inispalna ni Olivia (Jane Oineza) manipud iti panangkidnap dagiti binaon ni Victoria (Maila Gumila).
Naintriga dagiti agbuybuya iti iseserrek ni Ejay iti teleserye no kadua ti bida wenno kontrabida kadi ti papel daytoy, ken no ania ti agbalin a papel daytoy iti biag ni Olivia.
Napinget ni Philip (JC De Vera) a mangala manen iti panagtalek ni Olivia ket mayadayo daytoy ken ni Lucas (Tony Labrusca) nga ama ti sikog ni Melinda (Ria Atayde).
Ni Elias kadi ti baro a bannuar ni Olivia? Wenno maysa kadagiti mangidagel kenkuana? Padaananyo dagiti makapagagar a paset ti “Nag-aapoy na Damdamin” manipud iti Lunes agingga iti Biernes, 3:15 iti malem iti Kapamilya Channel, Kapamilya Online Live, A2Z, TV5, iWantTFC, ken TFC.
Inaklon ni Derek Ramsay a no maminsan, mapampamulengleng iti pannakatay ti inauna nga anakda ken Ellen Adarna. Nadakamat daytoy ti aktor iti mediacon ti pelikula a “Kampon” a naisalip iti 2023 Metro Manila Film Festival a prinodius ti Quantum Films ken insurat ni Dodo Dayaw, ken indirehe ni King Palisoc.
Kinuna ni Derek nga addada iti Spain ket idiay laeng a naammuanda a masikog ni Ellen, ngem nagpadara daytoy. Kasangsangpetda iti Filipinas, nagtarusda iti ospital tapno maultrasound ni Ellen. Nupay saan a nakalasat ti ubing, nagyaman ni Derek ta nakalasat ni Ellen. Ti maysa a tarigagay ni Derek iti 2024, isu ti panagsikog manen ni Ellen tapno maipatang iti Year of the Dragon, 2024. --O