Kastoy Gayam ti Biag iti Kampo Militar
NAAWISKAMI iti naminsan a mangbisita iti kampo ti maysa a batalion dagiti soldado iti Isabela. Ibilangmi daytoy a naisangsangayan a padas ta awan ti pamalpalatpatanmi no kasano ti panagbiag dagiti soldado no addada iti uneg ti kampo. Dagiti laeng damdamag ti paggapgapuan ti impormasion a maidanon kadakami a saanmi a masierto no agpayso wenno saan. Madamdamag pay a maysa laeng a paginanaan dagiti soldado ti uneg ti kampo ta ad-adda nga iti ruar ti yanda. Adu ti agkunkuna a mangan-maturog laeng ti ar-aramidenda no addada iti kampo a kas panagsaganada no addanto pakaipasungalngalanda a ranget.
Dagiti Pasilidad ti Kampo
Nadlawmi a nainget ti pannakaipatungpal ti seguridad iti ruar ken uneg ti kampo.
Iti iseserrekmi, napaliiwmi a naurnos ken nadalus ti kampo. No idilig kadagiti dadduma nga ahensia ti gobierno, makuna a naur-urnos wenno nadaldalus pay daytoy a kampo militar. Adu dagiti pasilidad iti uneg a nairanta tapno maipatungpal ti panggep a militar. Immuna a natuparmi ti pasilidad administratibo a pangop-opisinaan ti komandante ti battalion ken dagiti ayudantena.
Ti opisina administratibo ti sentro dagiti aramid administratibo a kas iti personnel management, accounting, ken iti pannakatarawidwid dagiti suplay ken dadduma pay a materiales a kasapulan dagiti soldado. Awan ti duma daytoy nga opisina kadagiti sibilian a sanga ti turay.
Naitudo kadakami, ngem saankami a nakaasideg, iti nakaidulinan dagiti igam malaksid kadagiti dadduma pay a nalimed a pakaidulinan dagiti armas a saanda a dinakamat.
Simrekkami iti komisario a pakagatangan kadagiti suplay a kasapulan dagiti soldado. Magatang ditoy dagiti taraon, pagan-anay, ken dadduma pay a personal a kasapulan dagiti adda iti uneg ti kampo.
Kas iti dadduma pay a paset ti kampo, adda dagiti telebision a mabalin a pagbuyaan ken pagliwliwaan dagiti soldado.
Adda paset ti kampo a pakaangayan dagiti programa wenno dadduma pay a panagtataripnong.
Adda disso iti kampo a nairanta a pagwatwatan ken pagaayaman dagiti soldado a kas iti basketball.
Naipasirip met kadakami ti pasilidad ti intelehensia militar a naipaayan iti puerte a pannalaknib. Adda dagiti elektroniko a gamigam iti uneg a kas kadagiti kompiuter.
Iti iseserrekmi, napaliiwmi a naurnos ken nadalus ti kampo. No idilig kadagiti dadduma nga ahensia ti gobierno, makuna a naur-urnos wenno nadaldalus pay daytoy a kampo militar.
Iti saan unay nga adayo, makita ti talier a pakatarimaanan dagiti lugan ken pakaidulinan dagiti produkto ti petrolio.
Napasnek a Panagsanay
Impakaammo ti giyami nga inaldaw ti pisikal a panagsanay ken pannakaisayangkat ti military occupational specialty (MOS) iti uneg ti kampo.
Iti MOS, isayangkat dagiti soldado ti responsibilidadda depende iti bukodda nga espesialidad ken personal a kabaelan. No agduyos wenno kabaelan ti maysa a soldado ti agaramat iti kompiuter, daytoy ti maited a trabahona. Mayarig ti MOS iti espesialisasion ti maysa a nagturpos iti kolehio.
Buklen met ti pisikal a panagsanay ti pannakataginayon ti kardiobaskular a salunat ken panangpabileg iti bagi. Iti sabali a pannao, nayabelen iti biag ti maysa a soldado ti panagmartsamartsa, pagtaraytaray, panagdalus, panagurnos, idadar-ay kadagiti lektiur ken miting ken agtarimaan kadagiti alikamen iti kampo.
Pannakaipusing iti Pamilia
Maysa kadagiti karirigatan a paset ti panagsoldado ti pannakayadayona iti pamiliana ken dadduma pay nga ipatpategna iti biag. Saan a makabakasion wenno rummuar lattan manipud iti kampo iti kaykayatna. Mainayon ti pasarenna a liday iti kaadayona iti pamiliana, ti kanayon a pannakabalbaliw ti destinona, saan a kadawyan nga iskediul ti panagsanay, naladaw a pannaturog ken ti peggad ti biag no adda iti pagrarangetan.
No laeng adda bakante nga oras a maikkan ti soldado iti gundaway nga ag-Facebook, agteks kadagiti ipatpategna, ken mangaramid iti paduyosanna.
Nainget a Disiplina
Sursuroten dagiti soldado ti nainget a disiplina iti pangipatungpal iti pagrebbenganda.
Adda dagiti linteg ken dadduma pay a pagalagadan a nasken a surotenda ti amin nga aramidenda. Maigunamgunam kadakuada ti panagbalinda a napudno, nagaget, ken nasalun-at tapno naurnos ken naannayas ti pannakaipatungpal dagiti naipaakem nga aramidda.
Iti maysa a sibilian a kas kadakami, kasla narigat wenno saanmi a kabaelan daytoy a wagas ti panagbiag dagiti soldado. Ngem uray no kasta, dagitoy koma ti pamkuatan a mangraem kadagiti soldado a lipatenda pay ketdin ti bukodda a bagi tapno laeng mapagtalinaed ti talna ken urnos iti pagilian.—O
(Mangisursuro ni Bryan C. Racuya iti Lal-lo National High School; agpapaay met a prinsipal ti Bical Elementary School, Lal-lo, Cagayan ni Judy S. Molina.)