Nainkalintegan Kadi?
Rimmuar iti benneg a DAKAMI MET iti Bannawag iti Pebrero 4, 1963 a bilang.
Apo Editor:
Ania kadi ti pakainaigan dagiti sarita da Apo Antonio S. Encarnacion ken Apo Fredelito Lazo iti biagyo? Kayatko a sawen, maipanggep iti Salip iti Sarita iti 1961 ken 1962. Adda kadi naununeg wenno nalimed a kaipananan dagitoy a pasamak? Iti biangyo, ti “Sabong” idi 1961 ken ti “Angin...” ni Apo Lazo itay napan a tawen; ket iti biang ni Apo Anden, ti “Narra...” ken ti “Ladawan...” a sarita ni Apo Encarnacion idi 1961 ken itay 1962.
Kasla mannursurokayo iti maysa a pagadalan nga agrinrinnisiris nga agpili iti kangatuan a promedio kadagiti agturpos. Nainkalintegan kadi, Apo Editor, ti panangibisikyo wenno panangilanadyo iti BANNAWAG kadagiti kapanunotanyo maipanggep kadagiti diyo kayat a pinili ti maysa a kameng ti hunta ti salip? Apay a saanyo a dayawen dagiti pangngeddengda, kas Editor ti pagiwarnaktayo, idinto nga impatugawyo ida a kas ukom? Naim-imbag la koma ngaruden a dakayo ti mangpili kadagiti kapintasan a sarita tapno mailaksiden ti panangdillawyo iti pangngeddeng ti maysa a kameng ti hunta.
Saan kadi a nakababain ti panangbarusngiyo iti pangngeddeng ni Apo Anden? Wenno parada ketdi daytoy ti kinasaririt? —AGUSTIN C. RUBIN, Busing, San Ildefonso, Ilocos Sur
*No nalipatanyon ti kinunami maipanggep kadagiti sarita idi 1961, adtoy nga imalditmi manen: “Awan ti makunak iti pangngeddeng ti Hunta malaksid iti pannakaigidiat ti pilik iti pilida. Daytoy, ilawlawagko, saanna a kayat a sawen a dida ammo ti nagpili. Masiribda iti literatura, mannuratda amin. Ngem kas kuna ni Dr. Foronda, adda pagrukodan ti tunggal ukom. (BANNAWAG, Disyembre 18, 1961, panid 58)”
“Nainkalintegan kadi ti panangilanadyo kadagiti kapanunotanyo maipanggep kadagiti diyo kayat a pinili ti maysa a kameng ti hunta...” kinunayo.
Umuna unay, kayatmi a lawlawagan ti DIYO KAYAT a paset ti binatogyo. Kayatmi ken raemenmi amin a pinili ti Hunta, ket no inlatakmi ti pangngeddengmi a maisupiat iti pangngeddengna, saan a gapu ta DIMI KAYAT dagita pinilina no di ket gapu ta kayatmi nga ilawlawag a ti pangngeddeng ti Hunta, saan a mabalin nga iturong wenno biangan ti siasino man, uray pay ti Editor ti pagiwarnaktayo. Kasta met a no ania man ti pilien ti Editor wenno asino man a kameng ti pagiwarnaktayo, maipanggep kadagiti sarita, awan ti pakaibiangan dayta a pangngeddeng ti Editor wenno kamengna iti pangngeddeng ti Hunta wenno siasino man a kameng dayta a Hunta. Inlanadmi dagiti kapanunotanmi, saan a pangbarusngi iti pangngeddeng ti Hunta no di ket panangilatakmi iti bukodmi a pangngeddeng, maysa a karbengan ken kalintegan nga inakomi idi irusatmi daytoy nangayed a gannuat a mangpabaknang iti literaturatayo. Agyamankami unay iti panangawisyo iti imatangmi, ket dakdakkel pay a pagyamananmi no dagiti amin a padayo nga agbasbasa iti pagiwarnaktayo idatagda koma itoy a benneg dagiti nasin-aw ken napudno a kapanunotanda maipanggep iti BANNAWAG—ta ti di panagamak a mangilatak iti kapanunotan ti tunggal tao, isu ti pudno a pagramutan dagiti nangayngayed a kapanunotan, ken maysa a pudno a pammaneknek iti kaadda ti demokrasia iti sidongtayo amin.—CCC