Panangisimpa
Basaen ti Santiago 2:14-26
Kakabsatko, ania ti magunggona ti agkuna nga adda pammatina no dina met ipakita kadagiti aramidna? Saannaka a maisalakan ti kasta a pammati.—Santiago 2:14
IDI agtutuboak, sinapsapulko ti kaipapanan ti biag. Nabiitak pay idi nga immalis manipud iti bassit nga ili ket napanak iti dakkel a siudad, ket bassit ti amammok a tattao. Rinugiak ti nagatendar iti serbisio iti maysa nga iglesia a nakaam-ammuak iti maysa a babai a nabakbaket iti 50 a tawen ngem siak. Inawisnak iti pangrabii ket impakitana kaniak no kasano ti panagbalin a mamati ken ni Hesukristo. Iti sumuno a tallo a tawen, nagbalinak a paset ti pamiliada nga agassawa. Naragsakak kadagiti tunggal pannangan ken aramid a kaduak ida, bantayak ti balayda no pumanawda, ken no dadduma, itugotdak kadagiti panagbiaheda. Kadagita a panawen, nagbalinak pay a paset ti linawas a panagadal iti Biblia ti grupo dagiti agkabannuag.
Dagiti umuna a tallo a tawen ti biagko kas Kristiano, insimpana ti wagas ti panagbiagko iti Nakristianuan a pammatik. Idi agangay, masapul a pumanawak iti dayta nga iglesia tapno ituloyko ti panagadalko iti sabali nga ili. Sinaludsodko iti nasinged a gayyemko: “Kasano a makapagyamanak kadakayo kadagiti amin nga inaramidyo kaniak?”
Insungbatna: “Aramidem met kadagiti sabsabali.” Ket isu ngarud ti inaramidko.
Kararag: Patgenmi nga Apo, tulongannakami a mangibingay kadagiti sabsabali saan laeng a maipapan iti pammatimi ngem maipakitami pay kadakuada ti ladawan daytoy. Amen.
Kapanunotan: Kasano a maipakitak iti maysa a tao a masarakak ita nga aldaw ti ladawan ti maysa a pudpudno a Kristiano?
Ikararagan: Dagiti kabarbaro nga agnaed iti ilik.
STRATOSPHERE Tower, Las Vegas, Nevada. Iti revolving restaurant iti tuktok ti katatayagan a pasdek iti Las Vegas, agsangsango ti dua a lallakay iti nagtimbukel a lamisaan. Agpadada a naka-coat and tie. Pagsangsanguanda ti sangabotelia a Chateau Mouton Rothschild 1988 a wine manipud iti France a nakaparabaw iti stainless steel nga ice holder. Agpada a simngay dagiti isemda iti panangitangguapda. Daytoy a wine ti maysa a kanginginaan kadagiti wine iti daytoy a restauran. Aggatad iti sangaribu ket uppat a gasut a doliar ti sangabotelia.
Iti agsumbangir a dua a lamisaan iti asidegda, saggapat a lallaki ti nakatugaw kadagitoy. Agpapadada a nakadiaket ket ilinglinged ti
aruatda dagiti nakasabbikel a paltogda. Ti maysa a lamisaan, security detail ni Don Geoletti idinto a ti maysa, security detail ni Don Contreros.
“Agyamanak iti pannakipagkitam a dagus kaniak, Don Contreros. Diak impagarup nga umaynak pay gayam danonen iti Las Vegas,” inruangan ni Don Geoletti.
Immisem ni Don Contreros. “Ammom a saan laeng a ti mitingta ti rantaek ditoy. Nabayagen a saanak a nagay-ayam iti poker. Amangan no adda gasatko ita.” Nagkatawa.
“Rumbeng laeng. Nalaingka nga agayayam. Nagkampeonka pay naminsan iti World Poker Tournament, saan kadi?”
Nagkatawa ni Don Contreros. “Nayalatko met iti naminsan.”
“Amangan no mangyawidka iti minilion ita a rabii...”
“Barbareng... Ngem agsublita iti gapu ti panagkitata. Napateg la ketdi ta tinarigagayam pay a personal nga agsaota.”
“Talaga a napateg unay. Ngem ipakpakaunakon, awan ti panggepko a makibiang kenka. No ania ti aramidem, para kenka laeng. Ken awan met ti panggepko a mangimpluensia kenka. Pamiliatayo. Umun-una, a, ti panangisakitko iti Pamiliatayo...”
“Kasta met kaniak, Don Geoletti. Dakkel ti respetok kenka.”
“Diakon agpalpalikaw... Ania daytoy maipapan iti panagkidnap idiay Filipinas?”
Naklaat ni Don Contreros. Saan a nakasungbat a dagus.
“Direkta a saludsod,” intingiting ni Don Geoletti.
“Ket panagkunak, kayatmo met ti direkta a sungbat,” kinuna met ni Don Contreros a nakapasubli met laeng a dagus iti simbeng ti panunotna.
Nagtung-ed ni Don Geoletti. “Ania ti panggepmo? Ania ti maalam? Mangipaay kadi iti dayaw iti organisasion?”
Saanen nga umis-isem ni Don Contreros. “Umuna unay, sadino ti nakaammuam iti daytoy?” Madlaw ti panagsabali ti timbre ti timekna.
“Saanen a nasken a maammuam no sadino ti naggapuanna. Ti ammok, mainaig pay ditoy ti dua a dadakkel a multibilion a hotel-casino—Cypress ken De Gianna. No maibutaktak daytoy iti publiko, dakkel a pakaibabainan ti organisasion.”
“Inaramidmi daytoy a napnuan annad.
A no maibulgar man, nalaka a pagtallikudanmi nga awan ti ania man a problema. Isu nga agtalekka kaniak, Don Geoletti. Diak pulos ikompromiso ti organisasiontayo.”
“Ket ania ti manamnama a maganabtayo iti daytoy?” “Akses iti ad-adu pay a gambling institutions. Porsiento iti maysa a kompania bayat ti panangiggemtayo iti kasapulanda iti seguridad. Minilion a doliar dayta.”
“Para iti sumagmamano a doliar... sige, minilion a doliar... Ngem adda linaktawmo a beddeng, Don Contreros... Adda baro a code a nasken a surotentayo: awan ti panagkidnap iti menor de edad. Isu nga isingasingko nga isublim a dagus ti ubing. Sapay koma ta nalawag kenka dayta.”
NAKATAKDER ni Ricky iti sango ti elevator nga eksklusibo nga usaren dagiti agnaed iti penthouse. Magagaran. Napunas aminen a danagna. Ken maragsakan. Nupay malidayan latta iti ipupusay ni Melanie, nakalasat ti gayyemna.
Naglukat ti ridaw ti elevator ket naikuadro ti umis-isem a John Villa. Naginnarakupda. Nakair-irut a kasla tinawtawenen a dida nagkita. Kalpasanna, rimmuk-at ni Ricky sa minatmatanna ti gayyemna.
“Asino ti makailasin kenka iti dayta a langam?” Kinusona ti buok ni John.
Naglisi ni John. “Isardengmo dayta. Amangan no maregreg.” Nagkatawa ni Ricky. “Sorry,” kinunana.
“Komusta ni Mrs. De Gianna?” inamad ni John. Magmagnadan nga agturong iti opisina ni Mrs. De Gianna. “Masakit ken maburiboran. Kasano, iggemda ti anakna...” Nagsennaay ni John. “Adda kadin planoyo a mangisalakan iti ubing?”
“Plano pay laeng... Kalepleppasko laeng a kinasarita ni Mrs. De Gianna. Maaramid laeng no saan a tungpalen ni Mister Giovanni ti karina a mangruk-at iti ubing apaman a matungpal amin ni Mrs. De Gianna ti memorandum of undertstanding a mailakon ti kompania.” “Dayta ti kayatna, ilakona ti korporasion?”
“Awan sabali a pagpilianna, John. Papatayenda ti ubing no saan nga agtungpal.”
Immanges iti nauneg ni John. “Dispensarendak ta diak natungpal ti karik. Diak pay nasalakniban ni Melanie.” Napait ti bosesna.
“Saanmo a babalawen ‘ta bagim. Saan a kayat ni Melanie ti patulongan. Inaramidmo ti amin a kabaelam.”
“I wanna make it right...”
“Ania ti kayatmo a sawen?”
“Nakasaokon ni Don Geoletti. Dinawatko a kombinsirenna ni Don Contreros a mangwayawaya ken ni Richelle nga awan ti ania man a kiddawenna a kasukat.”
“Ammom a di patgan ni Don Contreros dayta...” “Ammok. Ngem inaramidko laeng ta diak kayat nga agkontrakami ken Don Geoletti. Ita, mabalintan a tiraen da Contreros.”
“Are you crazy? Dakdakkel daytoy ngem ni Don Geoletti. Dakdakkel pay ngem daydiay a Don Buenaventura. You can’t crush him!”
“Isuna ti makaigapu a natay ni Melanie, Ricky. Masapul nga agbayad. Isapatak, papatayek... Papatayek agraman daydiay a Sammy. Masapul a pariknaanta ida!”
“Saan la ketdi nga anamongan ni Mrs. De Gianna ‘ta planom, John.”
“Dispensarem, Ricky. Kayatna man wenno saan... kaduaennak man wenno saan, rautek ni Don Contreros. Ibalesko ni Melanie, uray isut’ pakatayak!” (Maituloyto)