Panawanna Kadi Ida?
Dear Ikit,
Agtawenak laeng iti 17 idi pumanawak iti balaymi. Ipilit ngamin idi dagiti nagannak kaniak a yasawadak iti maysa a lakay a Hawayano. Nagpa-Manilaak ket nagyanak iti maysa a kabagianmi ngem idi agangay nakastrekak a katulongan ti maysa nga agassawa nga awanan anak. Idi naammuanda ti kasasaadko, tinulongandak a nagbasa nupay imparparipiripda nga agyanakto kadakuada uray addanton sabali a pagsapulak ta addanto kaduada iti panagbaket ken panaglakayda. Nakasaysayaatda kaniak; imbilangdak a kas pudno nga anak.
Kabayatanna, nagbalin met laeng a nadekket kaniak dagiti dadakkelko agraman kakabsatko a mangnamnama idi a siakto ti rangtayda a mapan Hawaii ta ania ngarud, anak la ti anak; kabsat la ti kabsat.
Nalpasko ti kinamaestra ken nairuarko ti LET. Ita, gapu ta kailiwko met da tatang, nanang, ken kakabsatko, agraman ti nakayanakak a lugar, kayatko koma met laeng ti mangisuro iti lugar a nakayanakak. Ngem parikutko met da nanay ken tatay—awagko kadagiti nangtulong kaniak manipud addaak iti layasan.
Ania ti aramidek, ikit?—Normita
Normita, kaanakan,
Dayawek ti panangikalikagummo a sumayaat ti kasasaadmo iti biag babaen ti bukodmo a panagganetget. Dayawek pay ti kinaturedmo a napan iti layasan iti laksid ti kinaganusmo.
Ita, sayaatem a kasarita dagiti timmulong kenka. Ilawlawagmo kadakuada ti kasasaadmo. Ibagam a kanayonto a sarungkaram ida ket no adda pay kabsatmo a mayat nga agadal, kasaritam ida nga isu ti mangisandi kenka iti ipapanawmo, a sisasaganaka a tumulong kadakuada iti panagadal ti kabsatmo a kas pagsubadmo iti kinaimbag a naipaayda kenka.—Ikitmo