Greeting Card
NASAKNAPEN ti panagusar iti selpon ken kompiuter. Dagitoy lattan ti sangsanguen dagiti ubbing—nangruna ti selpon. Uray pay iti uneg ti pagadalan, selpon ti sangkaiggemda. Agpannuray itan dagiti aramid (aktibidad) dagiti ubbing iti digital.
Ngem mabalin met a paggiddanen ti moderno ken tradisional nga aramid. Babaen ti Facebook Messenger, mabalinda ti agkablaaw kadagiti gagayyemda. Uray pay dagiti adda iti adayo. Mabalin met a babaen ti sabali a wagas.
Adda napanunotmi iti uneg ti pagadalan. Pinagaramidmi dagiti ubbing iti greeting card. Nasdaawda ta saanda nga ammo no ania ti greeting card.
Nagpaitugot dagiti titser iti kartolina, kartib, pagpigket, pagkolor, ken colored paper. Nangipakitada iti modelo ti greeting card a para iti agkasangay, Krismas, ken anibersario.
Daytoy ti nagibasaran dagiti ubbing iti inaramidda.
Daytoy nga aktibidad, nayon ti asignatura dagiti ubbing nga Arts. Iti kastoy nga aktibidad, makasursuroda nga agaramid iti bukodda a greeting card. Maapresiar ken mariknada pay ti linaon daytoy. Ipakaammo laeng ni titser a kastoy ti inar-aramidda idi isuda ti ubbing.
Daytoy man ti maysa kadagiti inaramid dagiti ubbing.
Ken ni Nanang,
Naragsak a panagkasangaymo, nanang. Ni Apo Dios ti mangtarabay kenka. Agbertdeykanto koma pay iti mamin-adu unay.
Adda met dagiti nangisurat iti Ingles wenno Tagalog iti kablaawda. Kas gunggona dagiti ubbing, amin nga inaramidda, naipigket iti bulletin board iti uneg ti klasrum. Nakita ken nabasada dita dagiti aramidda ken dagiti aramid dagiti kaeskuelaanda. Nakaragragsak dagiti ubbing.
Babaen ti kastoy nga aktibidad, makita ni titser dagiti adda talentona iti panagdrowing. Dagiti agayat ken agduyos iti arte. Iti kasta, maikkan dagitoy iti gundaway a mangpasantak iti talentoda. Di kad’ saanen a marigatan ni titser nga agpili iti ibaonna a mapan makisalip no adda pasalip.
Mabalin met nga ited ni titser daytoy nga aktibidad a kas homework. Iti kasta, makita dagiti agay-aywan iti ubing nga adda gayam kasta nga aramid iti pagadalanda. Mabalin ngarud nga asistiran no kuan dagiti nagannak, agaywan, manong, manang, ken uray pay ni ading, ti adalan. Ket asino ti makaammo no makasursuro met dagitoy ket agaramidda iti bukodda a greeting card!—O