Ti Balitok a Mais
IDI un-unana a panawen, adda maysa a pamilia a buklen ti agassawa ken lima a babassit pay nga annakda. Pudno a nakurapayda ta bassit laeng ti bangkagda a pagmulmulaanda iti mais nga isu ti paggapuan ti pagbiagda. Ngem nupay bassit ti maap-apitda a mais, kasta met ti kaadu ti mapampanunot ti ina a pakalutuan ti mais tapno laeng maragsakan dagiti babassit pay nga annakna. Nasalimetmet ti ina ken awan pulos madadael kadagiti apitda a mais ta uray maysa laeng a bukel ti mais a matinnag, pidutenna.
Adu ti trabaho ti ina malaksid iti kaaddana iti bangkag a mangtartaripato kadagiti mulada a mais. No sumangpet iti bassit a balayda, sublianna nga aywanan dagiti annakna, agluto, agdalus. Idinto a ni lakayna, adda laeng a matmaturog.
Iti maysa nga aldaw, nabannog unay ti ina iti trabahona iti bangkag. Kapigsa dagiti mais nga agdakkel ket an-anusanna a sibsibugan dagitoy. Agingga iti dinan kabaelan ti tumakder iti nalaus a bannogna ket inyiddanan iti karuotan. Dinan napupuotan a nakaturog gayam.
Idi makariing, nariknana a kasla rimmegta. Timmakder ket ania ti nakitana iti tengnga ti minaisan? Maysa a pinuon ti mais; dakdakkel nga amang ngem dagiti adda iti aglawlawna—ken addan bungana!
Daras a napan iti yan ti sangapuon a mais ket natakuatanna a balitok ti bunga daytoy.
Inyawidna ti balitok a mais; riniingna ti asawana ket siraragsak a nangipakita iti balitok a mais.
“Parabur dagiti didiosen daytoy gapu iti kinagagetmo nga asawak!” nakuna laengen ti lakayna kenkuana—ta saan met a dakes a tao daytoy no di ket mannaturog laeng.
“Wen, lakay,” kinuna met ti asawa a babai. “No agtinnulongta, ad-adunto pay ti itedda a parabur iti pamiliata.”
Napanda iti ili ket inlakoda ti balitok a mais. Babaen ti naglakuanda, nakagatangda iti nalawlawa a bangkag, ad-adu a bin-i, kasapulanda iti inaldaw-aldaw, aruaten, ken napatarimaanda ti bassit a balayda.
Agpayso a manipud idi, agtintinnulongen dagiti agassawa iti amin a trabahoda. Awan man ti nakitada pay a balitok a mais iti minaisanda, kas kapateg met laeng ti balitok ti maap-apitda a mais iti nalawa a bangkagda. Isu nga agpayso met laeng ti kinuna ti asawa a babai a no agtinnulongda nga agassawa, ad-adunto pay ti parabur nga ited dagiti didiosen iti pamiliada.—O
(Sarsarita idi ugma manipud iti Ecuador.)