TIPS/Tarabay iti Pagtaengan, Salun-at ken Dadduma Pay
DADDUMA PAY A PAKAUSARAN TI ASIN. 1. Pangikkat iti di makaay-ayo nga angot ti ima, kas koma no kalpasan ti panagiggemmo iti karne wenno ikan, wenno panaggalipmo iti lasona wenno sibuyas. Mabalin a di kabaelan ti solo a sabon a pangikkat iti di makaay-ayo nga angot isu a nasayaat a radradam dagiti imam iti asin a nababasa iti danum. Kastoy met laeng ti aramidem iti langdet. 2. Tapno saan nga agbirri dagiti lingtaem nga itlog, nawnawam iti sangkabassit nga asin ti danum a pagpaburekam. Nalaklakanto payen nga ukisam ti itlog. 3. Nalaklaka a maikkat dagiti rugit a kimpet iti letsugas no yupermo iti apagbiit iti danum a nanawnawan iti sangkabassit nga asin. Agbalinto pay a nasarsarangsang.
DADDUMA PAY A PAKAUSARAN TI SUKA. Maibalbalakad a tapno makissayan, no di man maliklikan, ti panagaramat kadagiti kemikal a pagdalus, agusar iti puraw a suka. Paglaoken ti maysa a paset ti puraw a suka ken maysa a paset ti danum. Yalison daytoy iti spray bottle ket daytoy ti ipasuyot a pagdalus iti balay manipud iti suelo agingga iti countertops. Tapno ad-adda pay a nabanglo, nayonan iti sangkabassit nga essential oil (mabalin a magatang online). Mabalin pay ketdi a nayonam iti tubbog ti lemon, kalamansi, wenno perres. Mabalin pay ti puraw a suka a pangpasileng iti repriheradora. Ipasuyot ti puro a puraw a suka iti repriheradora sa mangala iti nadalus a lupot sa radradam a kasla agpaspasilengka iti lalat a sapatos. (Liudmila Chernetska/ Getty Images)
DADDUMA PAY A PAKAUSARAN TI WD-40. 1. Mabalin a maisubli ti dati a maris ken kinasileng dagiti plastik a tugaw. Pasuyotan laeng iti WD-40 sa punasam iti nadalus a namaga a lupot. 2. No dimo magunay ti siper, pasuyotam iti WD-40 sa an-anatem a guyoden a palukat ken paserra. 3. Ikkatem dagiti mantsa ti inodoro babaen ti panangpasuyot iti WD40. Kalpasanna, radradam iti toilet brush sa i-flush. 4. Dimo mapusipos ti seradura ti rikep ti ridaw, wenno saan nga ag-lock? Padasem a pugsitan iti WD-40. Mabalin a kasapulan laeng daytoy ti lubrikasion. 5. Adda tinarimaanmo ket nagrasaan dagiti imam? Pasuyotam dagiti imam iti WD-40; pagrinnadradem, sa punasam iti tissue paper wenno paper towel sakbay a bugguam dagiti imam iti danum ken sabon. (www. bing.com)