Mayatkayo iti “KathEco”?

BINUNAR itay nabiit ti ladawan da Jericho Rosales ken Kathryn Bernardo nga agdiag-jogging. Kinapudnona, paskil daytoy dagiti fans a nakakita kadakuada. Sa innayon ti nagpaskil a kadua da Jericho ken Kathryn ni John Manalo. Ti nakaay-ayat, saan a nagatap dagiti fans a mabalin nga adda relasion da Jericho ken Kathryn. Inatapda ketdi ti posible a panagkadua dagitoy iti maysa a proyekto—teleserye man wenno pelikula.

Idi 2019, bayat ti panangar-aramid ni Jericho iti teleserye a Halik, nadakamatna a nakasagana nga umannugot no adda man bilang proyekto a pagkaduaanda ken Kathryn. Iti nadakamat a tiempo, lepleppas a nag-hit ti pelikula a Hello, Love, Goodbye a nagbidaan da Kathryn ken Alden Richards.

Ala, adda tagiurayen. Ti ketdi ammo ti kaaduan, agpada a nalaing nga artista da Jericho ken Kathryn.

* * *

Kuna ni Richard Gomez, kailiwna ti showbiz.

Makumikom ni Richard iti politika manipud 2016 a panagpaayna a mayor ti Ormoc City iti namindua a daras. Iti agdama, agpapaay a diputado.

Imparipirip ni Goma, a nakasagana a mangawat no bilang maidiayaan iti proyekto iti showbiz. Linawlawaganna ketdi nga uray pelikula laeng—saan iti teleserye—ta adda la ngarud akemna iti politika a nasken a sanguenna.

* * *

Nakasublin iti pagilian ni Tom Rodriguez a sigud nga asawa ni Carla Abellana. Saan a nalawag ti rason no apay nga insina ni Carla ni Tom, awan pay makatawen kalpasan ti panagkallaysada. Ti ketdi kuna ni Carla, saan a nasayaat ti pannakatratona iti sidong ni Tom.

Isu a ti saludsod dagiti pada a ‘marites,’ nabara kadi latta ti panangawat dagiti fans ken ni Tom iti laksid daytoy?—O