Cabbage Beef Rolls
MAYSA kadagiti kangrunaan a sagsagabaen dagiti umili iti agdama ti an-annayen a hypertension. Nupay kasta, mabalin a maliklikantayo daytoy no bantayantayo ti salun-attayo babaen ti panangsiputtayo a nasayaat kadagiti taraon nga ipapaunegtayo.
Pagyamanantayo ti DOST-Food and Nutrition Research Institute (FNRI) iti agtultuloy a gannuatna a tumulong a mangsolbar kadagiti problema iti benneg ti food and nutrition a pakairamanen ti hypertension wenno nangato a presion ti dara. Mainaig iti daytoy, inruar itay nabiit ti FNRI ti 2024 Menu Guide Calendar nga addaan iti tema a “Delights for Your Heart: Healthy Recipes for Individuals with Hypertension.”
Namnamaen ti ahensia a makatulong daytoy kadagiti nutritionist, health workers, ken caregivers a mangplano iti dieta (taraon) dagiti umili nga addaan iti hypertension.
Mairaman kadagiti naipalaon iti 2024 Menu Guide Calendar ti resipe ti potahe a cabbage beef rolls. Padasentayo met ti agluto iti kastoy a potahe.
Dagiti Kasapulan:
1-1/4 tasa a karne ti baka, nagiling
1 tasa a tokwa, mashed
¼ tasa, nalabaga a sibuyas, naiw-iwa
¼ tasa a bawang, naiw-iwa
1 tasa a carrot, naiw-iwa
1/3 tasa a kintsay, naiw-iwa
1 bukel nga itlog ti manok, medium size, nabatil
15 pedaso a bulong ti Chinese cabbage, ikkaten ti kayonana, maipaburek
Para iti Sauce:
3 kutsara nga oyster sauce
1/4 tasa a cornstarch, nairunaw iti sangkabassit a danum, kaibatogan ti 1 kutsara a cornstarch, mairunaw iti ¼ tasa a danum
1/4 tasa a danum
¼ kutsarita, pimiento (black pepper), nadekdek
Panangisagana:
1. Mangala iti malukong. Pagtiponen ti karne ti baka, tokwa, sibuyas, bawang, carrot, kintsay, ken itlog. Paglalaoken a nasayaat.
2. Bingayen ti mixture iti 15 nga apag. Pagpapadaen ti kaaduna. Agarup ¼ tasa wenno 45 gramo ti maysa nga apag.
3. Ikabil ti meat mixture iti tengnga ti bulong ti Chinese cabbage. Ikupin ti agsumbangir nga igidna. Kalpasanna, irolio (roll) daytoy. Siguraduen a saan a bumkas. Aramiden ti isu met laeng a proseso kadagiti nabati pay a ramen.
4. No nabungon aminen, pasingawan (steam) iti 15 a minuto. (Makatulong ti sistema nga steaming wenno steamed a pagluto a pangpatalinaed iti natural a raman ken sustansia ti taraon.)
5. Mangala iti pariok. Pagtitiponen ti oyster sauce, cornstarch, danum, ken pimienta. Pabureken iti dua a minuto.
6. Mabalinen nga idasar ti cabbage rolls agraman ti 2 kutsara a sauce-na.—O