TI GASATMO

AQUARIUS (Enero 21 - Pebrero 19). Pagtalinaeden ti natalinaay a panunot tapno umasideg ti nasayaat a gasat. Adda laeng iti sulsuli ti sungbat dagiti parikut. Posible ti panagdur-as, no la ket makaruk-atka iti nakaibaludam a sipnget. Nagasat a numero: 1, 3, 6.

PISCES (Pebrero 20 - Marso 21). Mairingpas ti nabayagen a dagensen. Matakuatam ti maysa a palimed a pakaamirisam iti maysa a banag. Baliwam a balabalaen dagiti gannuatmo. Liklikan pay laeng ti agpirma iti ania man a dokumento nangruna iti arinunos ti bulan. Nagasat a numero: 2, 4, 9.

ARIES (Marso 22 - Abril 20). Aggigiddan a sumangbay dagiti naimbag a gasat. Isaganam ti bagim ta masapul a napigsa ti enerhiam tapno matun-oyam daytoy a gasatmo. Lukatam dagiti dakulapmo ken ni kaarrubam ta isunto ti taklinmo no kasapulam ti pagsadagan. Nagasat a numero: 1, 2, 9.

TAURUS (Abril 21 - Mayo 20). Agpannuray iti nasin-aw a panunot no mangbukel iti dakkel a pangngeddeng. Takderam ti pammatim. Isaganam ti bagim iti pudno nga ayat. Agannad iti nasisilap a banag a kas iti alahas. Nagasat a numero: 1, 4, 8.

GEMINI (Mayo 21 - Hunio 21). Awanen ti kapipintasan a gundaway nga agpallailang no di ita. Annadam ti salunatmo. Palusposan ti tao wenno banag a mangigawgawid kenka iti kinatalna. Awan pangta ken ayat. Nagasat a numero: 2, 5, 6.

CANCER (Hunio 22 - Hulio 21). Pagtalinaeden iti puso ti inanama. Adda mapasamak a pakalag-anan ti biag a sumangbay kenka. Salimetmetam ti positibo a panunot tapno agtalinaedka a nasaranta. Liklikan ti agbiahe iti adayo. No kapilitan, agbado iti puraw. Nagasat a numero: 1, 2, 5.

LEO (Hulio 22 - Agosto 23). Sumangbay ti maysa a tao a manglukat iti gundaway a mangpapintas iti biagmo. Determinasion ti kasapulan tapno magun-od dagiti arapaap. Napintas a panawen a panangirugi iti negosio wenno panagpirma iti katulagan. Nagasat a numero: 1, 5, 7.

VIRGO (Agosto 24 - Septiembre 22). Usaren ti imet a karisma tapno maipatungpal dagiti dadakkel a gannuat. Siputan dagiti makalangen a tattao ta dakkel ti kaipanananda iti biagmo. Malapunoska iti ragsak, basta naannadka. Nagasat a numero: 1, 7, 9.

LIBRA (Septiembre 23 - Oktubre 22). Amirisen a nalaing no ania ti mabalin a pagbanagan ti aramidem. Kasapulam ti inana ngem no mabalin, dika agtugaw tapno di maturog ti gasatmo. Agaliwaksay kadagiti nalamiis ken nadalus a lugar. Nagasat a numero: 2, 3, 7.

SCORPIO (Oktubre 23 - Nobiembre 22). Saganaam ti idadateng ti dakkel a panagbalbaliw iti biagmo. Dumteng ti naimbag a gasat iti oras a dimo namnamaen. Iparangarang dagiti nasinged a gagayyem ti panangipategda kenka ita. Nagasat a numero: 1, 3, 8.

SAGITTARIUS (Nobiembre 23 - Disiembre 20). Tanangem dagiti gunaymo. Aganus, aguray, ken agpaliiwka. Adalem nga umuna ti situasion sakbay nga aggunayka. Dakkel ti akem ni ay-ayatem iti panguartaam ita. Nagasat a numero: 1, 2, 9.

CAPRICORN (Disiembre 21 - Enero 19). Maikkanka iti espesial a pannakabigbig iti maysa a tao a natulongam. Mabalin a matakuatam ti nabalitokan a gundaway tapno dumur-aska. Agpanunot iti pamuspusan tapno maipakita ti kabaelan. Nagasat a numero: 1, 6, 8.