Kas ken ni Kristo
NO makalapsut dagiti iturayan, isudan ti mangituray kadagiti bagbagida. Ngem daytoy ti mangitunda kadakuada iti autokrasia. No nakapuy dagiti umili, agturay ti diktadoria. Dagiti sumagmamano laeng nga agikut iti pirak ken pannakabalin ti mangtimon iti gobierno. Mayanak met ti baro nga agturay.
Ngem no saanna nga ammo ti mangituray dagiti kabbaro a dadaulo, agsagaba iti rigat ti pagilian, nangruna no maibusen ti kinabaknang ti daga. Daytoy a kasasaad ti mangiturong iti maysa a sistema a mangipalagip iti napasamak iti French Revolution a nagkiddaw iti hustisia iti baro a turay a kakomplot met laeng ti daan a turay. Ditoy, ti wayawaya, kaipapananna, umuna ken kangrunaan, ti pannakagun-od iti kasapulan dagiti umili, pannakaikkat ti di agpapada a pannakaiwaras ti kinabaknang, ken panangraem iti kalintegan dagiti kadawyan a tattao. Daytoy, maysa met a panangidagadag iti panagpatingga ti amin a ramit ti kolonialismo a nagpammarang a kapitalismo.
Kadagiti napanglaw, ti Dios ket Dios dagiti napanglaw. Ti kinapanglaw, maysa met a paset ti historia, ngem saan a maaklon ti tao dayta. Naigamer daytan iti sistema. Kas iti pork barrel ken dadduma pay a nalimed a tangdan iti Kongreso.
Ania ngarud ita ti basol?
Iti panagkita daytoy a sistema, maamiris a ti basol, paset ti kagimongan. Ti kinaruker ken korapsion, basol a maibusor iti kagimongan. No ti kinakurapay, bunga ti kinaawan-hustisia ti sistema, nasken ngarud ti pannakidangadang a maibusor iti daytoy.
Ti pannakawayawaya iti basol, saan a panagulimek no di ket pannakidangadang para iti pannakaparnuay ti baro a gimong, kas ken ni Kristo a natay tapno masubbotna ti tao iti basol.—O