Ti Ladawan ni Apo Hesus ken ni Manang Sindang
NAYNAY a taltalaytayen ni Manang Sindang daytoy a seawall iti ilida a Sta. Catalina, Ilocos Sur. Ngem iti dayta a bigat, anian a siddaawna iti naanninawanna ditoy. Namati agraman ti pamiliana a milagro daytoy. Impategda ket napasamak ti adu a nagbaliwan iti biagda.
Ania ti nakita ni Manang Sindang iti seawall? Wen, ti nariingan ken amammotayo a ladawan ti rupa ni Apo Hesus.
Sakbayna, kuna ni Manang Sindang a nakitkitanan daytoy a disso a yan ti ladawan iti tagtagainepna. Ket saan laeng a namnaminsan a natagtagainepna. Kampay idi, daytoy laeng a disso ti saan a natinep idi nagaluyo ti baybay.
Uray ni manongna a Berto, kuna ni Manang Sindang a natagtagainepna kano met naminsan daytoy.
Umasideg nga umasideg idin ti baybay ti Sta. Catalina iti kataltalonan ken iti kabalbalayan. Addan sumagmamano a taltalon a linamuten ti danum. Gapu iti daytoy, idi 2010, nangipasdek ti gobierno lokal iti seawall tapno malapdan ti agtultuloy a pannakakarkar ken pannakateppang dagiti taltalon. Ta no saan, agpeggad la ketdi ti biag dagiti agindeg ditoy igid ti baybay.
Kasano ti Pannakakitana iti Ladawan?
Nakairuaman ni Manang Sindang (Generosa Ramat Rabena ti pudno a naganna, 56, balasang, agtagibalay ken agnaed ti Purok 3, Tamorong, Sta. Catalina, Ilocos Sur) ti agbisikleta nga agmaymaysa iti tunggal bigat. Daytoy ti ehersisiona. Dumanon agingga iti igid ti baybay. Mapan a kagudua a kilometro ti kaadayo ti balayda iti baybay. Adda iti laud ti ili ti baybay. Uppat dagiti coastal barangay ti Sta. Catalina ket maysa ti barangayda.
Ad-adda nga iti abagatan a paset ti barangayda ti pappapanan ti kaaduan ta ditoy ti nalawa ti kadaratanna. Kadawyan met nga iti amianan ti pappapanan ni Manang Sindang ta naul-ulimek ditoy.
Apaman a nakadanon ni Manang Sindang iti igid ti baybay iti dayta nga alas sais iti bigat ti Disiembre 26, 2012, tinalaytayna manen ti seawall a kas nakairuamanna. Nangrugi iti abagatan sa nagpaamianan. Ngem tallo metro sakbay ti pagnguduan iti nairugi a sangagasut a metro a seawall, adda naanninawanna. Immasideg. Minirana dagiti batekbatek iti semento. Ket anian a kellaatna ken uray la a simgar dagiti dutdotna idi mamingminganna a nalaing. Nagporma a rupa ni Apo Hesus!
Idi makaawid, inkeddengna nga ilimed daytoy. Dina imbagbaga uray iti pamiliana. Amkenna ngamin nga agpukaw no ilatakna. Binigat a sinarsarungkaranna ti ladawan. Ngem kalpasan ti makalawas, nanayonan ti siddaawna idi nakitana ti ladawan a nadam-eg. Gapu iti daytoy, impudnonan daytoy ken manongna a Berto (Roberto).
Nagluganda ngarud iti kotse ket napanda iti seawall. Uppatda idi. Ni manongna a Berto, ni manangda a Eulalia,
ni Korine nga anak met laeng ti kabsatda, ken isuna. Idi makadanonda, nagturongda a dagus iti seawall. Ngem awan ti makamira kadakuada no di laeng ni Manang Sindang. Gapu ta kalikagumanda met a makita, imbilin ngarud ni manongna a Berto a mapanna alaen ti kamerada. Adda latta a nakapondo iti kotseda ti digital a kamerada ta naayatda iti potograpia.
Ket idi piktiuren ni Manang Sindang ti batekbatek iti seawall, ditan a nalasindan ti ladawan ti rupa ni Apo Hesus. Nasdaawda met kas iti damo a pannakakita ni Manang Sindang.
Iti daytoy met laeng a gundaway nga inkeddengda a mapanda iti simbaan ti Sta. Catalina tapno ipakitada ti ladawan ken ni Apo Padi.
”Adda iparparmata ti Apo kenka. Nagasatka ta sika ti nagpakitaanna,” kinuna ti padi a nakapatangda.
Kabigatanna, napanda iti GMA Network idiay Bayubay Sur iti ili ti San Vicente, Ilocos Sur. Impakaammoda ti nakitada. Ket kalpasan a naipabuya daytoy iti telebison, nakaad-adun a kakailianda ti mapmapanen iti nasao a seawall tapno penkenda ti nabuyada. Piniktiupiktiurda ngem awan uray maysa kadakuada ti nakaminar wenno nakaala iti kas iti kalawag ti ala a ladawan ni Manang Sindang.
Idi agangay, nadamag dagiti agnaed kadagiti kabangibang nga ili ket immadu ti immay nangkita iti ladawan.
Impategda ti Ladawan
Binayangbayanganda ti nakakitaanda iti ladawan. Inyaramidanda pay iti plywood a kahon ti mismo nga imahe tapno naan-anay a masaluadan. Ngem iti naynay a kinapigsa ti angin iti dayta a disso ken idi di nagbayag, dimteng ti maysa a bagyo a nangdadaelen a namimpinsan iti bayangbayang ken iti kahon.
Gapu met iti kaawan ti karkarna a napaspasamak a kas iti panagagas ken kaaspingna a milagro a mabalin a maitudo nga adda pannakaibiang ti ladawan, in-inut a simmaggaysa laengen ti um-umay mangkita iti ladawan.
Nupay kasta, impateg latta ti pamilia ni Manang Sindang ti ladawan. Minalem latta a gangtanda iti kandela. No datonanda iti sabsabong, aglualoda kalpasanna.
Saan a nakakaskasdaaw daytoy nga aramidda ta nariinganda nga agkakabsat ti kinadebosionada daydi inada. Kuna ni Manang Sindang nga idi ubbingda pay, sakbay a maturogda, sangsangkamaysada a pamilia nga agsanto rosario iti sanguanan ti altarda. Agparintumengda amin.
Iti panaglabas ti aldaw, gapu ta kayat a mataginayon ni Manang Sindang ti ladawan, indariragna ken ni manongna Berto ti pannakaaramid koma ti grotto iti seawall. Nakiumanda ngarud iti munisipio a nangited met kadakuada iti permiso, di nagbayag, nalpasen ti grotto. Ket iti di naigagara a pasamak, apagisu a panagkasangay ni Manang Sindang idi nalpas ti grotto!
“Dikan ik-ikkan ti kuartamon, daytan ti pannaka-birthday-mon,” inyangaw nga inkatkatawa ni manongna Berto, a maysa nga inheniero sibil.
Impalaminada ti orihinal a naala a ladawan ti rupa ni Apo Hesus. Insab-itda daytoy iti grotto.
Sipud Nakitada ti Ladawan
Namatida ket napasamak. Ta sipud nakita ken impateg ti pamilia ni Manang Sindang ti ladawan, nariknadan ti adu a milagro iti biagda. Ni laeng kanon, a, manangda a Eulalia. Idi adda kano sadiay Amerika, agsublisubli daytoy iti ospital gapu iti pannaka-bypass operation ti pusona. Ngem idi inyawidda idi arinunos ti 2011 iti Brgy. Tamorong, simmayaat met kanon ket saan metten a naos-ospital uray iti naminsan laeng. Saan la nga isuna, ta uray ni nanangda a dandani natay idi gapu iti pannakaatakena, simmayaat met ti salunatna.
Malagipda pay nga idi dinalapus ni Super Typhoon Ompong ti probinsia idi 2018, ti ammoda, bassit-usit laeng wenno awan pay ngatan ti maapitdan iti langa ti pinagayanda nga adda iti daya ken amianan ti balayda. Pimmuraw a permi dagiti dawa. Nupay kasta, impa-reaper-da latta. Inyunada iti daya, bassit a talaga ti naapitda ditoy. Ngem idi addadan iti amianan, saan met kanon a mapulsopulsoten ti panagreaper-dan.
“Nagkuna nga awan apitem, manong, ket nagsayaat met ti dawana,” kinuna ti agrip-reaper nga agkatkatawa idi makaasideg daytoy iti pagbuybuyaanna a tambak.
Awan kano pay pannakalugida iti talon sipud nakitada ti ladawan. Kas manen idi tawen 2022, nagsakit kano iti nakana dagiti pagay dagiti dadduma iti yanda ngem ti pagayda, apagapaman la kano ket nasigudda.
Kas subad met kadagiti parabur nga impaay ti Apo kadakuada, nupay sigud a tumultulongdan kadagiti tattao, inlawlawada pay ti itutulongda.
Milagro ti panangipapan ti pamilia ni Manang Sindang iti ladawan nupay iti sabsabali, mabalin a dida pulos patien daytoy. Nairanrana laeng a naporma a kas iti panagporma ti ulep ket adda makitam no kua a ladawan, kasta met ti kunkuna ti dadduma.
Ngem paltiing, pasimudaag, ballaag, wenno ania man daytoy, adda ni Apo Hesus nga Isu laeng ti Dalan
(ti Kinapudno ken ti Biag) nga isu met laeng ti naynay a taltalaytayen ni Manang Sindang ken ti pamiliana.—O
Mabalin nga iti sabsabali, dida pulos patien daytoy. Ngem iti pamilia ni Manang Sindang, sipud nakita ken impategda ti ladawan, nariknadan ti adu a milagro iti biagda.