Ti Kabibilegan a Parsua iti Lubong
IDI un-unana a panawen, iti Siudad ti Kyoto, iti Hapon, adda ari nga agnagan iti Daigo. Isu ti ari dagiti bao. Adda balasangna a nalapsat ken napnuan talugading, ni Prinsesa Kumi. Idi addan iti umno a tawen ni Prinsesa Kumi, kayat ni Ari Daigo nga agasawan daytoy. Inukkon ni Ari Daigo dagiti ministrona.
“Dakkelen ti anakko, mabalinnan ti makiasawa,” panangirugi ti ari. “Ngem saan a gagangay a bao ti anakko. Isu ti kalilibnosan, kasisiriban, ken kadadakkelan a balasang a bao iti sangalubongan. Ngarud, nasken a maikallaysa iti kabibilegan a parsua iti sangalubongan. Kayatko nga amaden kadakayo no asino dayta a parsua.”
Nagtungtung-ed dagiti ministro. Agapli-aplit dagiti ipusda bayat ti panangut-utobda iti sungbat iti saludsod ti ari. Asino kadi ti kabibilegan a parsua iti lubong? inulit-ulitda a sinaludsod kadagiti bagbagida.
Ni Ministro Akiro ti immuna a timmakder.
“Apo, ti Init ti kabibilegan a pinarsua iti lubong,” kinunana. “Ti Init ti mangmangted kadatayo iti lawag ken biag. Uray ti Emperador ti Hapon ket isu ti simbolo nga inaramatna.”
Nagtung-ed ni Ari Daigo. “No kasta ngarud, ipakallaysak ti anakko iti Init.” “Ngem, apo,” insampitaw ni Ministro Ingyo, “no kabaelan ti Ulep nga abbongan ti Init, saan kadi a ti Ulep ti maibilang a kabibilegan a parsua iti lubong?”
“No kasta, ipakallaysak ti prinsesa iti Ulep,” kinuna ni Ari Daigo. “Aguraykayo, apo…” insalingbat ni Ministro Kenzo a naglagtolagto. “Kabaelan ti Tudo a salputen ken abugen dagiti ulep. Ngarud, nabilbileg ti Tudo!”
“No kasta, ipakallaysak iti Tudo ti anakko,” insungbat ti ari.
“Dika agdardarasudos, apo,” insengngat ni Ministro Reigen. “Laglagipem nga uray kasano ti kapigsa ti tudo, dina kabaelan a yanud dagiti natibker ken natayag a Kayo. Ti Kayo ngarud ti kabibilegan a parsua.”
“Ala ngarud, ti Katayagan a Kayo ti pakikallaysaan ti anakko,” intung-ed ni Ari Daigo.
“Agtanangka, Ari Daigo,” impatigmaan ni Ministro Junnin a nangipakita pay ketdin kadagiti naiingpis ken natitirad a ngipenna. “Kabaelan a tuliden ti napigsa nga Angin uray ti katatagayan a kayo. Ti Angin ngarud ti kabibilegan a parsua.”
“Umanamongak iti kinunam,” insungbat ti ari. “Ipakallaysak ngarud ti anakko iti Angin ita met laeng.”
“Panunotem koma daytoy ibagak, apo,” insengngat ni Ministro Kome. “Uray ti kapipigsaan nga angin, dina kabaelan nga iduron ti Daga. Ti Daga ngarud ti kabibilegan a parsua.”
“Apay a diak napanunot dayta?” kinuna ni Ari Daigo. “No kasta ngarud, ti Daga ti pakikallaysaan ti anakko a prinsesa.”
“Amirisem koma a naimbag, apo,” insungbat ni Ministro Yori. “Ti kayo a Datar ti balay dagiti tao, pandaganna ti daga ket ibaludna daytoy. Amang a nabilbileg ngarud ti Datar ngem ti Daga!”
“No kasta, makikallaysa ti anakko iti Kayo a Datar iti mabiit!” kinuna ni Ari Daigo. Nagsig-am ni Ministro Hiro nga itay pay nga agdengdengngeg iti patanganda. Nakaisem a simmango ken ni Ari Daigo.
“Masirib nga Ari Daigo,” kinuna ni Ministro Hiro a kalakayan kadagiti ministro, “Nalipatam kadin, apo, nga uray kasano ti kinatibker ti kayo a datar, kabaelan latta a bawbawan ti maysa a Bao?”
Nagrimat dagiti mata ni Ari Daigo a nangperreng ken ni Ministro Hiro. “Agpayso ta kinunam, taltalkek a pagayam,” kinuna ti ari. “Ita, saan ngarud a mapagduaduaan—ti bao ti kabibilegan a parsua iti sangalubongan!”
Ket babaen ti nagarbo a seremonia a binuyogan ti toktokar ken ragragsak, nakikallaysa ni Prinsesa Kumi iti maysa a bao.—O
(Sarsarita idi ugma manipud iti Hapon.)