Daddy Balo
nagbanaganna ti sueldom a makatawen a pinanggatangmo.”
Naalana met laeng ti nagkatawa. “Adda met selponko nga agpayso a naregreg iti kanal ngem saan met a nangina daydiay.”
“No adda maperdi, kayatna a sawen adda rasonmo a gumatang iti baro.”
“Agyamanak unay ta addaka… addaak ditoy. Nami-miss-ko la unay dagiti panagpakpakatawam, uray mapikpikonak no maminsan.”
“Aya? Agimpipikonkan sa laeng met tapno masipatnak iti nakapigpigsa wenno tapno aglambingak nga ag-sorry.”
“Ala, grabe met!” Dayta, sinipatnak manen. Ngem agkatkatawa daytoy. Iti dayta kano laeng manen a gundaway nga agkatawa iti kasta.
“Malagipko. Saanda koma a naduktalan ti kaaddata idi iti kuarto no inkapkapsutko ti nagkatawa. Sika met ngamin.” Kineddelnak iti nakapimpino.
Dayta, agipalagipen. Agpatpatnagkami idi ken dagiti kakaduami nga agikamakam a mangileppas iti diario dagiti agad-adal iti kolehiomi. Naminsan, rimmuarkami iti publication office. Napankami iti nasipnget a klasrum iti isu met laeng a pasdek ket sadiay a nagtungtongkami maipapan iti parikutna iti pagtaenganda. Naidakdakkelna kano a kanayon nga agsubang dagiti nagannak kenkuana isu a kapilitan a nagawid ti inana iti lugarda idiay Pampanga. Rinugiak ti nagpakpakatawa iti no ania la ditan a mapanunotko a joke a pangliwliwak kenkuana. Pagam-ammuan la ta nagangtan ti silaw ti siled. Adda gayamen dua kadagiti kakaduami a nakaduktal iti paglemlemmenganmi.
Agkalkalamiisanak a makangngeg kadagiti ipalpalagipna nga “adventure” iti panagkadkaduami a nagtungpal iti maysa a resort iti Narvacan. Aglalo la unay iti panangipalagipna a siak ti immuna a nakainnagekna ken siak ti immuna a nakariknaanna iti ayat.
“Nabayagen dagidi. Bay-am lattan,” kinunak. Ngem no mabalin, bagbagaak a pengdanna koma pay laeng ti agipalpalagip kadagiti napalabas tapno maipamaysana ti panangtamingna kadagiti ubbing ken iti pagtaenganmi.
“Mapanak ngaruden.” Piniselna ti tumengko iti panagtakderna ken kasla manggargari iti isemna a nangkita kaniak.
Inseniasko ti sungbatko a mapan lattan maturog.
(Maituloyto)