Zumba Guy o Sumbagay?

DEAR TITO ITSOY: Sukad adtong nakasuway kog palit og Bisaya, naadik na gyod ko ini, Tito Itsoy. Gipaabot na gyod nako ning magasina sa mga newsstand. By the way, ako diay si Ambeth, 32 anyos, biyudo, taga Talisay City. Unom na ka tuig sukad namatay ang akong misis kay nadisgrasya. Naka-move on na ko sa iyang kamatayon, Tito, although di gyod ko malimot pagduaw sa iyang lubong kada semana. Nalingaw ra man sad ko sa akong gamayng negosyo. Ug laing nakahatag nakog kalingawan mao kining ehersisyo nga zumba.

Kada MWF ang akong zumba class. Malingaw kaayo ko kay mahigalaon man ang akong mga kauban sa session. Ang nakaparat lang kay naa koy kauban (tagoon lang nato sa ngalang Agnes) nga labihan kaayo nako kasuod ug ang among panagsuod maoy sinugdanan sa problema. Tingali tungod kay wa dinhi sa ato ang iyang bana, seaman man god. Mao na nga kada human namog zumba, magkuyog mig pangaon sa gawas.

Pero wala ra god na nako, Tito. Wa koy plano nga mosulod og relasyon. Okey na ko sa akong pagka biyudo. Bisan gamay, wa koy gihunahuna nga malisya sa panagsuod namo ni Agnes.

Nagduda ko nga paryente sa bana ni Agnes ang nagpakatap og sayop nga estorya. Ang hungihong man god mao nga naa kunoy karelasyon si Agnes nga kauban niya sa zumba class. Aw, wa nay laing gipasabot ana, Tito, ako na.

Gusto nako nga inig-uli sa bana ni Agnes, ako mismo maoy mosulti niya aning maong tsismis. Okey ra kaha, Tito? – AMBETH

DEAR AMBETH: Abi mo, Ambeth, bisan pag moingon ka nga way malisya ang inyong panag-uban, pero sa ngalan nga may bana na si Agnes, angay unta nga dili ingon kasuod ang inyong panaghigala. I mean, dili man problema ang panaghigala pero angay nga may limitasyon. Kon group date uban sa inyong mga kauban sa zumba class, wa koy nakitang problema. Pero kay kamo ra man gyong duha, aw, bisan kinsang makakita may pasobra gyod nga pagtan-aw. Kahibawo na ka sa nature sa tawo nga labihan man gyod kamalisyoso.

Wa lang niy kaso nimo kay biyudo man ka. Apan unsa man sa habig ni Agnes? Ug labaw pa kon pananglit mobatyag na pod si Agnes og masalaypong pagbati diha nimo… aw, anha na unya magsugod ang komplikasyon ining tanan.

Sakto ang imong plano nga unhan nimo ang mga tsismis ngadto sa bana ni Agnes. Aw, kana lagi kon wa pa kaabot ning estoryaha ngadto sa bana. Pero kon nahibawo na to siya unya nagsigeg panday og esena ang iyang hunahuna… imbes zumba guy ka, makakaplag na nuon kag sumbagay. Sus, wa nay matago sa atong panahon, Ambeth, uy, diin katap na kaayo ang teknolohiya sa telekomunikasyon.

Puyde man tingali nga managhigala lang gihapon mo si Agnes pero dili na lang mo manuroy nga kamo rang duha. Ang buot kong ipasabot nga duna nay limitasyon ang inyong panag-uban paglikay sa bunhok sa pagduda sa ubang tawo nga makakita ninyo.

Ug, uy… morag nakasimhot kog laing baho ining pagpakigsuod ni Agnes nimo. Aw, maymag karon ra god ta ikapanganak nga di ta kaila sa ginagmay bawod sa dagat. Busa samtang puyde pang molikay, likay lang gyod. Play safe lang god, Ambeth. Kadaghang way gubin diha, nganong kana pa man gyong banahan ang imong unok-unokon. — TITO ITSOY

(Ipadala lang ang inyong mga sulat-suliran niining adres: SAYRI AKO TITO ITSOY c/o Bisaya Magazine, Manila Bulletin Publishing Corp. Mahimo pod ipadala sa email pinaagi niining adres: titoitsoy@yahoo.com)