WALA NAY MOSUNOD SA AMONG MGA TUNOB

SAMTANG nangutingkay ko sa hiniposan kong mga kopya sa Bisaya gidagpi ko sa kahisagmuyo tungod kay akong nahunahuna nga wala nay mosunod sa akong mga tunob— ang pagka magsusulat.

Nasugmoy ko kay ang akong duha ka anak nga pulos lalaki wala gayod makasunod sa akong hilig. Wala gayod sila madasig bisan sa kanunay kong aghat kanila nga mosulat. Wala gayod sila matapti og kagaw sama sa kagaw nga kanunayng mogimok sa akong handurawan sa mga higayon nga ako mag-inusara.

Akong napanghilantawan nga ang dugo sa pagka magsusulat anhi na lang kutob sa paglataylatay sa akong kaugatan ug sa kang Henry nga akong manghod. Oo, sa siyam ka anak nila ni Papa Mar ‘Binog’ Mañus Sr. ug anhing Mama Mayling, ako, si Henry ug si Nelson maoy nakasunod sa mga lakang ni Papa. Hinuon, si Nelson ‘nagmingaw’ na kay nagaid sa kalinga sa iyang trabaho. Ug ang among kamagwangan nga babaye— si Ate Lilit makamao-