ANG KAHULOGAN SA TALAN-AWON SA BELEN
PASKO na usab. Panahon nga ipasundayag sa mga simbahan, mga balay-patigayon, kabalayan ug bisan asa ang talan-awon sa Belen.
Matag kakita ko sa imahen sa Batang Balaan nga naghigda sa mga dagami nga gibakbak sa mahimi ug dapawong kumpay sa mga baka sulod sa nagkagusbat nga kamalig dili ko kapugngan ang pagpanubod sa akong mga luha kay akong mahanduraw ang kaalaot sa Manunubos nga nagantos sa katugnaw, kahimi ug kadapaw sa dapit nga iyang nahimutangan.
Nganong giingon man niini sa Diyos nga Amahan ang bugtong Niyang anak? Kon atong hunahunaon, angay unta Siyang ipahiluna sa mahunulhunol nga kutson sulod sa palasyo kay Siya anak man sa Diyos nga gamhanan ug hari sa tanang mga hari.
Kon ipasikad ta sa giingon sa Diyos diha sa balaang kasulatan nga ang magpataas iyang ipaubos ug ang magpaubos iyang ipataas, atong mahunahuna nga ang mga kabos ug timawa maoy labing duol sa kasingkasing sa atong Magbubuhat. Atong mabanabana nga layo sa Iyang pagbati ang mga tawong adunahan. Kini maila diha sa Iyang pag-ingon nga mas masayon pa ang pagsulod
sa kamelyo diha sa lungag sa dagom nungka ang mga adunahan diha sa gingharian sa Langit.
Nganong nahitabo man kini? Tungod kay ang mga kabos ug timawa natingban sa tanang pagpaubos ug sa kanunay nagasangpit sa Diyos, samtang ang mga adunahan gigamhan sa mga palabilabi ug sa nagaliwaros nga garbo sa ilang kabahandianon ug dili na gani mahinumdom sa Diyos kay mao nay giludhan ang nagtumpi nilang katigayonan.
Pinasikad sa sugo ni Kristo ngadto sa iyang mga tinunan sa pagpanglakaw nga walay kuwartang pagadad-on, atong masabot nga gikaligutgotan Niya ang kuwarta. Ngano man? Tungod kay ang kuwarta iya sa yawa. Kini ang gigamit ni Satanas paghaylo kang Hudas Escariote aron kini moluib sa iyang Magtutudlo.
Ning atong panahon, ang salapi maoy hinungdan nganong manikas ug manglupig ang tawo ug kon nganong mangawkaw sa salapi sa lungsod ang kadagkoan sa atong kagamhanan. Kini maoy hinungdan sa walay puas nga pagpamatay sa mga tawong walay sala nga himoon sa mga matig-a og balatian nga gipangsuholan og dagkong kantidad. Labaw sa tanan, kini maoy hinungdan sa mga gubat nga miulbo sa bisan asang dapit sa kalibotan.
Kon ikaw karon nalumid sa kakabos ug katimawa, ayaw han-oki ang Diyos sa imong mga pagmahay. Hinunoa, palandonga ang Iyang kahimtang. Isilsil sa imong pangisip ang Iyang pagkahimugso nga nagantos sa katugnaw ug kadapaw… ang Iyang pagtubo nga ginukod ug dinaogdaog ug ang Iyang pagkamatay sa krus nga gilansangan Kaniya. Ayaw na pagsigeg ampo nga ikaw maadunahan samtang ang imong giampoan nagbahag lamang. Ayaw panag-ing sa usa ka tikasan ug malupigong politiko nga namilyonaryo sa iyang pagpanikas, pagpanlupig ug pagpangagawg mga yuta pinasikad sa iyang (politiko) giingon nga kon buot kitang madato makig-abin una sa yawa.
Kon gimahal man ni Jesus ang mga kabos ug timawa, nganong dili man nato kini sundon? Nganong ang mga adunahan, mao may mahalon ang ilang isigka adunahan samtang ang mga kabos yatakan kay sagbot alang kanila? Karon, Pasko na! Sud-onga ang talan-awon sa Belen. Tan-awa ang tulo ka Hari nga nanghatag og gasa sa Bata. Tanawa usab ang mga manunugway sa mga karnero… minghalad usab sa labing tambok nilang hayop. Kini maoy timaan nga ning silong sa langit kinahanglan nga kita magbinatiay ug maghinatagay. Apan unsay nahitabo? Ang aduna na maoy hatagan samtang ang wala hikawan.
Kini atong masuta diha sa natad sa panaygon. Kon adunahan gani ang manaygon hatagan og dagkong kantidad samtang ang mga kabos ug timawa nga manaygon bungolbungolan ug dili tagdon ug kon magpadayon pagkanta bisan unsa na lay ipamalibad. Sakit kaayong palandongon kining bahina kay maoy paghikaw sa panabang nga giyangungo sa mga alaot nga unta maoy labing nanginahanglan. Hain na man ang giingon sa Diyos nga “pakan-a ang gigutom?”—
Karon, Pasko na! Sudonga ang talan-awon sa Belen. Tan-awa ang tulo ka Hari nga nanghatag og gasa sa Bata. Tanawa usab ang mga manunugway sa mga karnero… minghalad usab sa labing tambok
nilang hayop.