Love in the new future

KINING kinaiya, mga kahindog, sama ra sab ni sa panahon, uy. Kana bang mag-usab-usab. Nuon, depende kon motuo ka ani, kay duna may nag-ingon nga ang kinaiya nato kauban sa atong pagkatawo dinhi sa kalibotan. Di kuno mausab.

Pero para nako, nganong di man nato usbon ang ngil-ad natong kinaiya nga duna man tay utok nga gihatag sa Diyos aron makahinuktok ta kon unsa ang husto ug sayop. Duna sab tay kasingkasing nga mobatig kaluoy kon angay tang mobati ani, di ba?

Na, subayon nato kining sugid sa atong letter sender nga naggikan sa Pagadian. Dear Ms. Vera, Tagoa ko sa ngalan nga Alma, 19 years old, college student sa among lugar. Duna koy ig-agaw, si Glaycia. Usa ra ka eskuylahan ang among gitunghaan. Parehas ming bugtong anak. Spoiled mi, uy. Gasalig lang kay pinangga sa among parents.

Wa gyod sa among bokabolaryo ang pagseryoso sa gugma. Binuangan lang namo ang among mga uyab. Pero duna gyod tingali karma. Nahiabot ni sa akong ig-agaw.

Aron makasabot gyod mo sa tanan, suwayig sunod kining among kaagi ni Glaycia.

NALUOY kong Allan. Mingtulo gyod ang iyang mga luha. Pero kutob ra gyod diha. Wa mausab ang akong desisyon.

“Sori gyod, Lan. Unsaon ta man, wa na man koy gugma nimo. Break na gyod ta.”

Nakapanghupaw na lang ko. Pastilan baya ning makapasakit diay tag lalaki, uy, makonsensiya man sab diay ta? Pero wa nako tagda ang akong gibati.

“Wa man koy sala nimo, Al. Basta man lang ko nimong gibuwagan.”

“Di ba giingnan na tika nga wa na koy pagmahal nimo? Mao ni ang rason, uy!”

Morag di makabikang si Allan sa iyang paggawas na sa among sala. Mipakibo na lang ko sa akong mga abaga. Sa sulod sa akong kuwarto, wa dayon ko makatulog. Nahunahuna ko kon ikapila na si Allan nga nahimo nakong bf. Wa na ko kahinumdom. Basta, ubay-ubay na gyod ang nangagi nakong mga uyab nga buwagan ko lang sab dayon.

“Unsa? Three weeks pa gani mong uyab si Allan, gibuwagan mo na?”

Sa sinultihan ug tingog ni Glaycia, nakalitan siya pero dako kaayo siyag pahiyom. Gituyo gyod nako siyag duaw sa ilang balay anang pagkaugma kay wa man mi klase, Domingo god. Usa ra ka subdivision ang gipuy-an namong tulo ni Glaycia ug Allan. First degree cousin nako si Glaycia. Ug kay usa ra man ka lugar ang gipuy-an namo, maong gikaila namo ni Glycia si Allan.

“Sus, pakugang-kugang pa gyod na siya, uy. Mora sab og korek.” Mikatawa ko. Mikatawa sab si Glaycia. Unya nag-aper mi. “Dakoa diay sa gugma ni Allan nimo, no, Alma. Mihilak god siya. Kanako nuon, wa koy uyab nga mihilak dihang akong gibuwagan.”

“Mao lagi. True love gyod ang iyang gibati nako. Pero unsaon ta man, wa na man koy gusto niya. O, komosta na man sab mo si Ronron?” Gusto kong mahibawo bahin sa bag-ong boyfriend ni Glaycia. “Da, gibuwagan ko sab, uy. Wa na man koy love niya.” “Mangita na sab tag bag-o ani.” Mitukiki kog katawa. “Unsa pa man diay? Duwa-duwa man lang ning ato sa mga lalaki.”

Mingislit si Glaycia nako. Gingislitan ko sab siya. Hapon na nga mipauli ko. Sa ila ni Glaycia ko naniudto. Nalingaw kaayo ko sa pag-estorya namo bahin sa among lovelife.

Milabay ang mga adlaw. Nakabaton na sab kog bag-ong uyab, si Roly. Hilomon kaayo. Morag bayoton kay hinay manglihoklihok. Pero guwapo ug macho. “Manan-aw tag sine, Al.” Domingo tong adlawa ug nag- date mi. Kay buotan ug bayoton ang pagtan-aw kong Roly, misugot ko. Misalig dayon ko niya. Sa pagkatinuod, daghan man tuod kog nahimong bf pero wa gyod koy giubanan nila sa pagpanan-aw og sine. Pero kang Roly, wa ko magduhaduha sa pagkuyog kay sa akong pagtuo, di gyod siya magbuhat og binuang nako sa sulod sa sinehan.

Pero nasayop diay ko. Mao pa gani paglingkod namo sa balcony, gigakos dayon ko niya. Nahasiga akong mga mata kay gihagkan niyag pinapilit akong lips. Sa unang higayon, nahagkan kog lalaki. Gitukmod nakog kusog si Roly.

“Uy! Manghawok ka man, Roly?” Nangisog ko. “Wa pay lalaki nga gitugtan nako nga makahawok bisan akong uyab!”

“Sus, magpapresyo pa gyod na siya, uy! Nakaila kaayo ko ninyo ni Alma, uy! Parehas mo, mga playgirl. Easy girl ra mo, uy!”

Nabatyagan ko ang pagpamuwa sa akong nawong. Morag misaka ang akong dugo sa akong ulo sa gibati kong kalagot. Pak! Mipaka ang nawong ni Roly dihang gitamparos nako siya. Wa gyod ko makapugong sa akong kalagot. Nainsulto ko pag-ayo sa iyang gisulti.

“Di ko easy girl, ha, Roly.” Mitindog ko. “Buwag na ta. Bastos!”

Kay sayo pa man ang kahaponon, wa ko modiretso sa pagpauli. Giadto nako si Glaycia sa ilang balay. Gitug-anan nako siya sa nahitabo namo ni Roly. Nahibawo ang akong ig-agaw nga si Roly ang bag-o nakong bf. May bag-o na sab nga trato si Glaycia, si Remond.

Gitan-aw ko ni Glaycia og dugay. Seryoso kaayo siya. Unya nahibulong ko kay mihilak siya. Kami rang duha sa ilang terrace. “Naunsa ka, Glaycia?” “Mayka kay nakapugong sa imong kaugalingon, Al. Di parehas nako. Agresibo sab si Remond. Nadala gyod ko niya sa motel. Di kay kausa lang, kadaghan gyod. M-Mabdos ko ron.” “H-Ha?” Puwerte gyod nakong kuganga. Migakos si Glaycia nako. Gihapuhap nako iyang bukubuko. “Nakahibawo na ba ang imong parents ani, Glaycia?” “O. Di makaog iro ang ilang pagkasaba nako. Pero gidawat gihapon ko nila. Nakapasaylo ra gihapon sila nako.”

Ang nahitabo kang Glaycia giisip nako nga karma. Mao sab diay ni ang gihunahuna sa akong ig-agaw, nga gigabaan sab siya, tungod sa among pagduwa-duwa sa gugma sa mga lalaki ug sa among pagpasakit kanila.

Sa pagka karon, Ms. Vera, nagbinuotan na mi si Glaycia sa among lovelife. Wa na mi magbinuang sa mga lalaki. Labi na gyod ko. Nahadlok kaayo ko nga ang nahitabo kang Glaycia mahitabo sab nako. Nga moabot ang panahon nga gabaan ko kon di ko magbag-o sa akong kinabuhi.

Nakapanganak na si Glaycia. Usa ka lalaki. Maoy akong gisaad sa akong kaugalingon nga makig-boyfriend lang ko kon tinuod gyod nakong gimahal ang lalaki. Dinhi na lang kutob ang pagsugid ko sa akong kaagi.