Julia Baretto
SIYA NA LANG KAHA ANG MAGPABILING MAGTUBOY SA MGA BARRETTO SA SHOWBIZ?
NAGSUGOD sa showbiz nga bata pa kaayo, dili kaduhaduhaan nga siya ang pabiling magtuboy sa mga Barretto nga taudtaod nga gihuptan ni Claudine Barretto ug sa igsoon niining si Gretchen Barretto. Anak si Julia nila ni Marjorie Barretto ug Dennis Padilla nga pulos usab mga artista, maingon nga nahimutang taliwala sa kasamok sa wala pagsinabtanay sa iyang inahan ug sa iyang iyaan nga si Claudine Barretto nga gipanaghiusahan sa managsoong Marjorie ug Gretchen nga wala dapigi batok sa kapikas niini nga si Reymart Santiago.
Si Julia karon maoy nahimong sentro sa mga pagtagad sa showbiz. Sa panuigong napulog siyam, hingpit nang dalaga sa iyang gitas-on nga lima ka tiil ug unom ka pulgada. Nailhan nang artista sukad sa bata pa siya nga aktibo kaniadto pang 2007, ubos siya karon sa Kapamilya Network sa ABS-CBN nga nabansay sa Star Magic Circle Batch 19.
May mga pasundayag na sa telebisyon nga iyang naapilan, sama sa “Walang Kapalit”, “Kokey”, ug “Palos”. Gisundan sab kini sa “Wansapanataym” ug Maalaala Mo Kaya”.
Nakadawat na usab siya og mga pasidungog. Sa mga bagong artista, usa siya sa 100 nga labing maanyag nga artista nga gipagula sa Yes! Magazine. Sa Star Magic Ball 2012, naangkon niya ang titulong Prince and Princess of the Night uban ni Julian Estrada.
Sa iyang party sa ikanapulog walo na niya, giklaro pag-ayo ni Julia nga dili usa ka publisidad nga nakig-uli siya ug giila nga tinuod niyang amahan si Dennis Padilla. Tunog kaayo sa showbiz nga dugay nang nagkabulag si Dennis ug si Marjorie Barretto nga inahan ni Julia kanus-a niadtong panahona, napulo pa lang ka tuig ang panuigon.
Ang mga akusasyon nga publisidad ang gihimo ni Julia mao nga sa iyang gibuhat nga pakig-uli sa iyang amahan, makadugang sa iyang pagkainilang artista, ilabi na nga sa maong higayon nagsingabot ang ikanapulog walo ka tuig niyang natawhan nga gihimo sa Shangrila Hotel sa Siyudad sa Makati kaniadtong Marso 10 apan daghan ang nahikugang kay sa mao diay nga higayon, imbitado na ang iyang amahan ug ang pamilya niini.
Matod ni Julia, nangandoy siya og usa ka dakong higayon nga mahitabo sa pagsaulog sa iyang adlaw nga natawhan, busa siya mismo ang nangunay sa paghatag sa imbitasyon kang Dennis kinsa nahikugang pag-ayo sa iyang gibuhat nga wala damha sa amahan. Gilaoman nga sa gibuhat sa batan-ong aktres mahibalik ang maayong pagsinabtanay sa mga Barretto. Kon si Dennis nagminyo pag-usab karon, ug si Marjorie nga iyang inahan may kaugalingon na usab nga pamilya, kana tungod kay ang kaminyoon nila ni Dennis ug Marjorie nahisupak sa balaod sanglit may gipakaslan na diay si Dennis mao gani nga mahimong isalikway ni Julia ang apelyido sa amahan kay ang pagpakasal niini sa iyang inahan, nahisupak man sa balaod. Kon nagminyo karon si Marjorie ug may kaugalingon nang pamilya, kana tungod kay gibalewala ang kaminyoon nila ni Dennis.
Padayon ang pagsikat karon ni Julia diin siya na usab gani ang bida sa bag-ong teleserye sa Kapamilya Network nga gisugdan na pagpasundayag sa miaging bulan, sa And I Love You So, ug kauban niya sila si Miles Ocampo, Angel Aquino, Dimples Romana, Iñigo Pascual, Tonton Gutierrez, Bing Loyzaga, Raymond Bagatsing, Luke Jickain ug Dante Rivero.
Sa panag-uban nila ni Julia ug Miles niining maong teleserye, kini ang gipahayag sa aktres: “I have been friends with [her] since we were little kids so I’m so excited to share this experience with her.”
Sa bahin ni Iñigo, kini molargahay unta pauli sa Amerika apan gumikan sa teleserye gipahimuslan una niini ang maayong kahigayonan sa pagtugot sa iyang amahang si Piolo Pascual.
Gipanghimakak usab ni Julia ang mga akusasyon sa fans nila ni James Reid ug Nadine Lustre pinaagi sa internet nga may relasyon siya sa aktor ug nakighinagkanay pa siya niini. Namalibad usab ang aktor nga may relasyon siya kang Julia ug wala ganiy siyay numero sa pagkontak niini.—