JASMINE CURTIS:

PADAYONG NAGSIDLAK ANG BITUON

Bisaya - - Cover Story -

SAMTANG padayong popular ang iyang igsoong si Anne Curtis, si Jasmine Curtis usab walay hunong sa pagpagilak sa iyang bituon. Bisag naa siya kanunay nga tiggulaan sa Kapatid Network sa TV5, nakaapil siya sa Cinema One Original Film Festival nga giugdahan sa Kapamilya Net- work.

Sa maong Film Festival, nadughit ni Jasmine Curtis ang tropeyo sa pagka Best Actress sa iyang papel sa “Baka Bukas” nga gipahibalo sa seremonyas nga gihimo sa miaging bulan diin maoy iyang karakter nga usa ka tomboy nga nahigugma sa iyang higalang babaye. Si Jasmine ang nagmalamposon sa mga nominado nga sila si Shaina Magdayao (“Lily”), Natalie Hart (“Tisay”), ug ni Peewee O’Hara (“Si Magdalola at ang mga Gago”).

Gipahinungod niya ang iyang kadaogan sa komunidad sa mga LGBT.

“Mabuhay ang LGBT community!” singgit ni Jasmine nga nagtulo ang luha sa kalipay samtang gituboy ang gigunitang tropeyo atubangan sa naninggit nga katawhan. “We have a voice. I am with you guys whether I am LGBT or not. I stand with you guys and I will be with you all the way.”

Sa bahin sa iyang pagpasalamat, maoy nag-una niyang gihisgotan ang pagmahal sa iyang mga kaubang artista ug sa iyang direktor nga si Samantha Lee.

“You guys really helped me become the Alex that I needed to be,” matod niya nga maoy gitumong ang iyang karakter sa lilas. Wala usab niya kalimti ang pagpasalamat sa tinuod niyang boypren nga si Jeff Ortega.

Sa laing bahin, ang nakadughit sa Best Actor sa maong Film Festival mao si Rocky Salumbides sa iyang papel sa horror film nga “Lily”.

Usa sa kauban niyang artista nga si Natileigh Sitoy, nakadughit og Best Supporting Actress, ug ang Best Supporting Actor nadughit sa sakop sa Hashtags nga si Jameson Blake sa lilas nga “2 Cool 2 Be Forgotten”.

Sa laing bahin, tin-aw nga gikompirmar ni Jasmine pinaagi sa pagpakita sa instagram ang espesyal nga tawo sa iyang kinabuhi, ang surfer nga si Jeff Ortega.

“Oo,” tubag ni Jasmine dihang gipangutana siya ni Vice Ganda sa programa niini sa Kapamilya Network nga Gandang Gabi Vice kon may relasyon na sila si Jeff. Kauban sa aktres ang iyang magulang nga si Anne Curtis sa maong interbyo. Dihang gipangutana kini ni Vice kon unsay iyang ikasulti sa boypren sa iyang igsoon, kini ang gitubag ni Anne: “Oo, masaya ako. Mabait talaga. Parang nakilala ko na siya before pa. Tapos mabait siya.”

Sumala kang Anne, nakigsuod si Jeff dili lang kang Jasmine kondili sa tibuok nilang pamilya. “Nakikita ko kung paano siya umeffort kay Daddy, kay Mommy, kay Balong (igsoon nilang lalaki nga si Tom Curtis-Smith)… cute.”

Sumala sa website sa La Union Surf School, si Jeff usa ka sertipikadong surfing instructor nga level 1. Kaliwat siya sa pamilyang Ortega, politikong pamilya sa lalawigan sa La Union, Pangasinan. Gituhoan nga si Jasmine ug Jeff may relasyon na kaniadto pang Pebrero dihang ang ilang hulagway migula sa instagram.

Kaniadto gika-date ni Jasmine ang mag-aawit ug aktor nga si Sam Concepcion apan nagkabulag sila kaniadto pang miaging tuig. Gibalita nga si Anne wala mahiuyon niini ug gipakigsultihan ang aktor sa usa ka birthday party kaniadtong 2014.

Nabalita usab nga gikarelasyon ni Jasmine ang anak sa mikandidato pagka presidente nga ni Senador Grace Poe nga si Brian Llamazares kinsa gisorpresa ang aktres og mga pungpong sa buwak sa usa ka press conference sa pasundayag nga My Fair Lady sa miaging tuig.—

Newspapers in Cebuano

Newspapers from Philippines

© PressReader. All rights reserved.