PITSTOP: ALANG SA LUWAS NGA PAGBIYAHE
DILI sab nato masalikway ang rider’s boots isip mahinungdanong gear alang sa luwas nga pagmotorsiklo. Apan subong palandongon nga sa tanang rider’s gear, usa ning proteksiyon sa tiil ang kinaulhiang hatagan og pagtagad kay mao lagi, ahhh... tiil ra bitaw na, layo ras tinai. Ato ganing makita nga kasagaran, magtsinelas lang samtang magmotorsiklo. Wala niy problema kon anha ra ta sa atong nataran magruyda-rudya, moadto sa merkado, moduaw sa duol nga paryente sa pikas eskina o unsa pa diha nga madala rag dinalian. Apan kon paingon sa agresibong pagpadagan sama sa ipahigayon diha sa mga speedway, loop rides, test rides, cross-country rides, o bisan unsang matang sa pagmotorsiklo nga ang elemento sa disgrasya labihan kataas, ang boots labihan kamahinungdanon.
Tiil ang atong itukod kon pananglit gusto natong ibalanse ang motorsiklo sa mga higayon nga naa na sa akto sa pagkatumba. Usa ni ka instinct nga natural sab sa tawo. Walay tawo nga gustong matikay-ang lang nga di mosuway og balanse pinaagi sa tiil. Makadaghan gani ko makakita nga ang usa ka rider nagpanukod-tukod samtang nasiyumoy sa libaong kun kanal ang iyang motorsiklo. Tiil gyod ang mahan-okan sa presyur. Kon tsinelas lang ang isul-ob, imbes nga mamenosan ang risgo, mosamot hinuon kinig kadelikado kay posible man nga masangit hinuon ang estrap niini sa mga sabod-sabod sa dalan.
Tungod niining maong kahimtang, nagkinahanglan ang tiil og saktong proteksiyon aron dili daling mabikil. Sagad ra ba gayod, kon magkalamboray na ang motorsiklo ug rider, mapaslak gyod ang tiil sa ilawom sa motorsiklo diin
dakog posibilidad nga kini mabalhog sa init nga parte sa makina, tambutso, o bisan taliwa sa rayos, o kaonon sa kadena ang mga tudlo sa tiil. Kon adunay gisul-ob nga rider’s boots ang rider, piho nga mamenosan ang risgo sa injury.
Adunay daghang matang sa rider’s boots. Apan alang sa kasayon, ato kining pakupson ngadto sa lima ka matang segun sa gamit: sports and race boots, touring boots, short boots, cruiser and V-twin boots, ug adventure and dual sports boots.
Ang sports and race boots gidisenyo alang sa malisod nga mga maniobra sa motorsiklo. Kining maong matang maghatag sa rider og kasayon sa pagpangambiyada, makapasayon sa maniobra sa malisod nga mga agianan, komportable nga pagpreno, ug ingon man ang saktong hakop diha sa foot peg sa motorsiklo. Ang nakaayo niining maong boots kay makapalit ka og piyesa sa gagmay niining parte kon ugaling mabungi ni o kaha mapaksi gumikan sa binagnosay nga pagpadagan— hiyas nga maayo kaayo kay nagpasabot nga modular kini kon kugihan lag ilis ang mga parte. Hinuon, makabuslot gyod nig bolsa. Sa labing uwahi nakong pagbisita sa usa ka rider’s gear shop, mikantidad og labing menos P15 mil ang usa ka paresan sa usa ka segunda klase nga brand. Busa kon dili gyod ka seryoso nga MoTurista, medyo yayay gyod ning presyoha. Pero ikagarantiya nako ang kalig-on niini sanglit miagi nig taastaas nga proseso sa research and development una pa kini ikadispley sa sinaw nga estante.
Kon MoTurista kang pamugas-bugas lang— kanang rider nga matawag nga komyuter lang kay magmotor paingon sa trabahoan unya kon way trabaho mag- ride- ride pod panagsa—ang touring boots maoy sibo nimo. Dili sab mabentahaan ang pagbaton niini kay may pagka versatile kini sa lainlaing kondisyon sa pagmotorsiklo. Kining maong boots mipokus sa tulo ka aspeto: kakomportable, kalig-on, ug mosukol sa lainlaing panahon. Kon limitado ang badyet, kini maoy segurohon pagpalit kay maingon tang pulonga, puyde ning gamiton sa ting-init ug tingulan. Gani, kon paingon ka sa trabaho, mahimo man nga inig-abot nimo sa trabahoan kini na lang sab ang imong isapatos kay dili man lang sab ni mailhan nga riding boots diay.
Ang short boots kay nag-anam na sab ron kapopular. Kon imong tan-awon, susama ra sab kini sa ordinaryong sapatos. Apan ang nakalahi lang kay gipalig-on ang materyal ug lahi ang klase sa traksiyon nga ihatag niini diha sa karsada. Bisan gipamubo lang ang ibabaw niining bahin apan maingon nga makahatag gihapon kinig saktong proteksiyon sa atong singkol ug uban pang parte sa tiil. Tungod kay trendy ang disenyo, mora lang tag wa magsulob og boots niini. Sa laing pagkasulti, wearable ra kaayo ning maong boots. Sibo kini kon gamayng motorsiklo ang imong dad-on. Tungod kay sayon lang kining isul-ob, kini ang labing popular niadtong mga rider nga igo-igo ra sab ang badyet.
Ang medyo rugged og dagway nga boots ug maoy kinaraan gyod nga matang mao ang cruiser and V-twin boots. Sa mga pelikula nga kabahin sa kinabuhi sa mga big bikers, mao ning sapatosa ang sagad natong makita. Klasiko kaayo ning tan-awon ug morag bug-at kaayog nawong nga kon maoy atong gamiton pagpamaregla, morag sa ospital gyod tugpa, kana kon di madipalita. Angayan kaayo ning tan-awon kon dagkong chopper ang imong motorsiklo sama sa Harley Davidson o bisan unsang motorsiklo nga adunay V-twin engine. Kining maong matang sa boots napailawom na usab sa hataas nga ebolusyon ug ang bag-ong mga disenyo niini gipahaom na usab sa modernong panahon.
Apan kon maoy duwa nimo ang paglapok-lapok, pagsum-ok-sum-ok anang mga kabagnotan aron suwayan ang abilidad sa pagpalagtas sa motorsiklo diha sa mga lamakan, nagkinahanglan kag matang sa boots nga andam modawat nianang maong mga kondisyon. Nagkinahanglan kag adventure and dual sports boots. Kining maong matang sa boots, gituyo nga modawat sa labing pintas nga presyur. Gani, dunay matang niini nga may gaiters aron dili gyod makasuhop ang tubig.