PITSTOP: ALANG SA LUWAS NGA PAGBIYAHE
(Ikaunom Nga Bahin) Rider’s Pants, Shirt, ug Jacket
ANG kataposang linya sa depensa sa usa ka rider mao ang iyang gisul-ob nga karsones, kamisin, ug dyaket. Adunay mga MoTurista nga dili kaayo mohatag niinig pagtagad kay lagi mahimo ra man nga bisan unsa ang atong isul-ob. Pero tungod sa kaabante na karon sa panahon, ang beteranong mga MoTurista, segun sa hataas na nilang kasinatian sa karsada, nangita na usab sa mga undergarment kang kansang materyal ug disenyo gipasibo sa kultura sa pagmotorsiklo ug panginahanglan sa biyahe.
Ang kakomportable mao ang unang konsiderasyon kon mangayam og rider’s pants, shirt, ug jacket. Maoy pilion kadtong materyal nga hayahay sa lawas sa bisan unsang matang sa panahon. Sa laing pagkasulti, kanang husto sa bentilasyon apan maayong mopugong sa kainit kon anaa sa dapit nga bugnaw. Mahinungdanon man god nga anaa kanunay sa tolerable level ang temperatura sa rider tungod kay dako kining aspeto sa iyang kaigmat sa biyahe. Ang reaksiyon sa atong lawas sa usa ka kahimtang may koneksiyon sa gibatyag natong katawhay o kaalimuot ba kaha. Aw, bisan sa balay lang gani, kon init ang panahon, init man sad atong ulo.
Sa karsones, maoy pilion ang medyo luag. Likayan ang karsones nga adunay daghang wala kinahanglana nga kawil- kawil. Delikado kini kon mabitik sa bisan unsang sabod-sabod sa biyahe. Mas maayo sab kon maoy pilion ang disenyo nga may pipila ka bolsa aron kabutangan sa ginagmayng mga gamit. Apan likayan nga magbutang og gahing mga himan sa bolsa sama sa tools ug reserba nga piyesa kay kon simbakog madisgrasya, walay motusok nga gahi sa lawas nga makadugang pa hinuon sa atong risgo sa injury.
Mas maayo sab nga adunay bahin sa kilid sa karsones nga reflectorized. Sa gabii, mas makatabang ang reflectorized garments pagpadako sa atong bantang sa karsada. Ug dali ra tang mamatikdan sa ubang behikulo kay ang amag sa atong karsones hait mang motabas sa kangitngit.
Ang karsones nga maong dili gayod haom alang sa usa ka MoTurista. Ang tekstura sa maong mosukol sa friction. Kon nakamatikod ta sa tanang nangadisgrasya, may higayon nga wala man unta magisi ang karsones nga maong pero naa gihapoy pangos. Nahitabo ni tungod kay ang tekstura niining telaha moukob man sa atong panit. Lahi ra sa materyal nga composite fabric o Cordura diin modangog ug modal-os lang kini sa atong panit gawas nga hayahay kini ug gaan kaayo. Walay makalupig sa leather kon abrasion ug resistance sa lainlaing elemento sa panahon ang estoryahan. Apan bug-at kini sa lawas ug dili kaayo makasirkular ang hangin sa sulod niini.
Sagad sa mga rider’s group, aduna gayod silay opisyal nga
kamisin diin nahipatik ang ngalan sa ilang club ug ang ilang isigkanumero sa pagka sakop. Kining maong matang sa kamisin gama sab sa materyal nga komportable sa lawas. Angay nga dili taas ang buktonan niini aron dili modal-os ang elbow pad. Mas maayo nga maoy pilion ang materyal nga naglabi ang cotton aron bugnaw ug hayahay sa paminaw. Ang cotton nagbaton og hiyas sa pagka mainaton maong sayon kining mosunod-sunod sa hiyog sa lawas sa usa ka rider. Dili sab kinahanglan nga baga ang kamisin kay sapawan pa man kini og body armor dayon ang dyaket. Ang importante lang niini nga sayon makalapos-lapos ang hangin aron presko ang lawas.
Lahi ang dyaket sa usa ka rider kaysa dyaket sa usa ka maton. Taas nga matang sa siyensiya ang gigamit sa pagdisenyo sa rider’s jacket. Higpit niining gigamit ang mga prinsipyo sa thermodynamics. Kon makakita ka sa rider’s jacket, daghan kaayo dinhig kahibulongan. Makapangutana ka: Para unsa man ning maong lungag? Para unsa ning maong plastik? Para unsa man ning maong bolsa? Nganong naa man niy siper dinhing dapita? Nganong nia man dinhi gipaagi ang tahi? Nganong bukdol ni dinhing parteha.
Kining mga pangutanaha teknikal kaayo og mga tubag. Apan laktoron na lang nato sa pag-ingon nga maoy gibasehan sa disenyo niini ang pipila ka balaod sa pisika: ang saktong pag-agi sa hangin, ang natural nga direksiyon sa kainit ug kabugnaw nga inalisngaw sa lawas, ang natural nga lihok sa lawas, ang streamlining sa kasunggat nga hangin atol sa kusog nga dagan sa motorsiklo aron dili makaamot ang dyaket sa speed drag kun kasabal sa gikusgon.
Karon, kompleto na ta sa tanang riding gear. Apan ang kataposan natong kalasag sa biyahe mao ang pag-ampo. Magunsa ang gipangsul-ob natong proteksiyon kon dili ta lakas kang Big Bro. Gear up na, mga igsoon sa karsada!
(KATAPOSAN)