NATAPOS NA ANG KALBARYO NI GNG. GLORIA ARROYO
PAGLABAY sa hapit unom ka tuig, natapos na gayod ang kalbaryo ni kanhi Presidente Gloria MacapagalArroyo dihang giabsuwelto siya sa Office of the Ombudsman kaniadtong Disyembre 19, 2016 sa nahibilin nga kasong plunder nga gisang-at batok kaniya sa administrasyon ni Benigno “Noynoy” Aquino.
Ang kasong plunder naggumikan sa giingong pagbalhin ni Gng. Arroyo sa kantidad nga P900 milyones gikan sa pundo sa Malampaya ngadto sa mga minao-maong proyekto kaniadtong 2009. Ang Malampaya mao ang kadagatan sa Palawan diin may mina sa gas ug ang pundo mao ang pahat sa gobyerno gikan sa maong minahan.
Sa 134 ka pahina nga desisyon, giwakli sa Ombudsman ang kaso batok kang Arroyo ug ubang pila ka akusado tungod sa kakulang sa ebidensiya.
Apan ang kaso batok kang Janet Lim-Napoles, ang negosyante nga utok sa pork barrel scam, ingon man sila
si kanhi Department of Budget and Management (DBM) Secretary Rolando Andaya Jr. ug kanhi Department of Agrarian Reform (DAR) Secretary Nasser Pangandaman, ug uban pang opisyales sa gobyerno wala isibog.
Sumala pa ni Ombudsman Conchita Carpio-Morales, ang mga imbestigador sa Office of the Ombudsman ug sa National Bureau of Investigation napakyas paglambigit kang Gng. Arroyo sa eskandalo sa pundo sa Malampaya.
Ang papel lamang ni Gng. Arroyo, sumala pa ni Carpio-Morales, mao ang pagluwat sa Executive Order 848 nga nagtugot sa paggamit sa pundo sa Malampaya aron pagtabang sa mga lugar nga hiagian og kalamidad.
“Ang pagpirma ni Arroyo og orden ehekutibo wala magkahulogan nga apil siya sa pagbalhin sa pundo ngadto sa illegal nga mga proyekto,” matod pa ni Carpio-Morales.
Ang hukom sa Ombudsman nagpapas sa tanang mga kaso nga gisang-at batok kang Gng. Arroyo ni kanhi Presidente Aquino.
Ubang mga kaso nga gidismis
Kaniadtong Hulyo 19, gidismis usab sa Korte Suprema ang laing kasong plunder nga gipasaka batok kang Gng. Arroyo labot sa pundo sa Philippine Charity Sweepstakes Office (PCSO).
Gumikan niini, nakagawas si Gng. Arroyo gikan sa Veterans Memorial Medical Center diin siya ma- hospital arrest sukad sa Oktubre 2012.
Matod pa ni Theodore Te, tigpamaba sa Korte Suprema, gisalindot sa hataas nga hukmanan ang kaso batok kang Gng. Arroyo gumikan sa kakulang sa ebibensiya ug dihadiha gipabuhian siya sa korte gikan sa VMMC.
Una pa niini, gimandoan sa Korte Suprema ang Sandiganbayan sa pag-undang sa mga hearing bahin sa kaso sa PCSO tungod lagi kay walay gipresentar nga igong ebidensiya batok kaniya.
Ang pagdismis sa kaso ni Arroyo nahitabo usa pa lang ka bulan sukad manaog sa puwesto si Presidente Aquino ug usa ka semana una himoa ni Presidente Duterte ang iyang unang State of the Nation Address (SONA) sa Kongreso.
Busa, si Gng. Arroyo, isip kongresman sa Pampanga, nakatambong sa SONA ni Duterte diin gitimbaya siya sa bagong presidente. Sa panahon sa kampanya, misaad si Duterte nga iyang i- pardon si Gloria kon makombikto kini.
Kaniadtong Septiyembre 16, 2016, gisalindot usab sa Sandiganbayan ang laing kasong grap nga gipasaka batok kaniya labot sa wala madayon nga kontrata uban sa NBN-ZTE sa China.
Sahi sa uban niyang mga kaso, ang Sandiganbayan miingon nga huyang ang mga ebidensiya nga gisumiter sa prosekusyon aron mapamatud-an nga sad-an si Gng. Arroyo.
Gawas pa, matod pa sa korte, wala madayon ang proyekto kay gikanselar man ni Gng. Arroyo mismo ang kontrata uban sa NBN-ZTE. “Kon walay kontrata, hain man ang grap?” matod pa sa Sandiganbayan.
Nganong gigukod siya ni Aquino
Ang pagdismis sa tanang mga kaso ni Gng. Arroyo nagpakita lamang nga walay laing tuyo si G. Aquino sa paggukod sa gipulihan niyang pamuno kondili ang bengansa o panimalos.
Kahinumdoman nga naghinangat pa ang eleksiyon sa 2010, gitudlo ni Presidente Arroyo si Renato Corona, kanhi chief legal counsel sa Malakanyang ug tigpamaba ni Gng. Arroyo, nga hepe mahistrado sa Korte Suprema. Alang kang Aquino, usa kini ka tamparos kaniya tungod kay siya man unta isip bag-ong pamuno ang angay magtudlo sa sunod nga hepe mahistrado.
Kini mao ang nakapabilo sa tumang kasuko ni G. Aquino ngadto kang Gloria ug kini maoy hinungdan nga gisugo niya ang pagpasaka og mga kasong plunder sa kanhi presidente.
Apan adunay wala hisayri sa kadaghanan kon ngano nga naghambin og kasuko si G. Aquino kang Gng. Arroyo. Si Aquino kanhi usa sa mga estudyante ni Gng. Arroyo sa economics sa Ateneo de Manila ug giingon nga dili unta niya kini papasaron tungod kay bugok sa klase. Malagmit nga usa kini sa mga rason ngano nga hilabihan ang iyang kayugot ngadto sa kanhi niya propesor.
Kay bengatibo lagi, sa iyang paglingkod sa Malakanyang, wala mag-usik og panahon si Aquino. Iya dayong gisugo ang iyang mga hinanib sa Kamara de Representantes ug Senado sa pag- impeach kang Corona.
Ginamit ang pundo sa gobyerno, gihiphipan ni Aquino ang mga kongresman ug senador hangtod nga napalagpot si Corona sa pagka hepe mahistrado, ang labing unang hepe mahistrado nga natangtang sa puwesto sa kasaysayan sa atong nasod.
Pagsalig sa Diyos
Sumala pa ni Ferdinand Topacio, usa sa iyang mga abogado ug tigpamaba, ang pagkaabsuwelto ni Gng. Arroyo sa tanang kaso nga gisang-at batok kaniya maoy bunga sa hugot nga pagsalig sa kanhi pamuno sa Diyos ug sa sistema sa hustisya sa atong nasod.
Matod pa ni Topacio, nagpamatuod usab kini nga walay gipasikaran ang mga asunto nga gipasaka batok kang Gng. Arroyo ug nga mga paagi lamang kini aron lisod-lisoron ang kanhi pamuno.
Si Gng. Arroyo, 69 anyos na, mao ang ika-14 nga presidente sa Pilipinas nga nagsilbi gikan sa 2001 hangtod sa 2010. Anak ni kanhi Presidente Diosdado Macapagal, si Arroyo mao ang ikaduhang babaye nga nahimong presidente sa atong nasod, sunod kang Gng. Corazon Cojuangco-Aquino.
Walay pildi-pildi (kay wala man siyay kontra) sa iyang pagdagan pagka kongresman sa ikaduhang distrito sa Pampanga, si Arroyo karon usa sa mga diputadong espiker sa Kamara. Apan ikatulo ug kataposang termino na niya kini.
Walay makatag-an kon modagan ba gihapon si Gng. Arroyo sa eleksiyon sa 2019. Mobalik ba siya pagka senador ug, kay piho man siyang modaog, molansar kaha siya pag-usab pagka presidente sa 2022 sahi sa gihimo ni kanhi Presidente Erap Estrada sa eleksiyon sa 2010 diin diriyot siya modaog?—
Apan adunay wala hisayri sa kadaghanan kon ngano nga naghambin og kasuko si G. Aquino kang Gng. Arroyo.