ANINO SA KAAWAY

(Gula 25)

ANG pahimangno ni Maj. Campo sama sa basal sa agong nga milagingling sa alimpatakan ni Victor Foz, mikanay. Alang kaniya, kadto maoy tambag ug pahimatngon sa usa ka tinuod nga higala ug kauban sa buhat. Bisan kon siya nahisakop sa usa ka pribadong ahensiya sa paniktik ug si Maj. Campo sakop sa PNP apan alang kaniya, managsama da ang ilang kaakohan: ang paghatag og seguridad sa katawhan ug ang pagpalungtad sa hustisya ug katarongan diha sa katilingban.

“Ikaw sab, Dick,” balos ni Victor pagpahimangno sa hepe. “Angay ka usab nga magbantay. Lakip ka nameligro sa mga disipulo sa kulto.” Pahiyom ray gisukli sa hepe sa iyang gisulti. Alang kang Victor, ang gipakitang reaksiyon sa hepe sa iyang gisulti nagpasabot nga wala kini mabalaka ug wala makatay-og sa kahadlok sa mga sakop sa kulto. Niini, hilom siyang nakadayeg sa hepe. Naghupot gayod kinig igong kaisog!

“Mokuyog ka ba namo ngadto sa kuwerpo?” Gipangutana siya sa hepe dihang nahuman nag hipos sa mga sakop niini ang mga patayng lawas sa mga sakop sa kulto nga iyang gikasangka.

“Mohapit ko didto,” maoy iyang tubag. “Pero dili ko magdugay, Dick. Motabang kog pangita kang Tiya Marta. Nabalaka ko nga may daotang buhaton ang mga Bangkulisan

kaniya.” “Ikaw ang mag-igo, Victor,” sa hepe.

GIHINGUSGAN gayod sa kapolisan ang pagpangita kang Marta, ang iyaan ni Victor nga gituohang gidagit sa mga sakop sa Bangkulis Black Brotherhood. Adlaw ug gabii nga nagpahigayon silag operasyon sa pagpangita sa gidagit. Miabag si Victor sa mga tinugyanan sa balaod. Halos wala silay pahulay sa tinguha nga maluwas ang gidagit sa mga sakop sa kulto.

Apan kapakyas maoy ilang naani. Wala silay nahimo sa masubsob nilang pagsudlay sa tanang dapit sa lungsod sa Mabini nga ilang gituohan nga posibleng gilubloban sa mga sakop sa kulto. Hugot ang pagtuo ni Victor nga sekreto gayod kaayo ang dapit nga gidad-an sa mga Bangkulisan sa iyang iyaan ug lisod kining matultolan sa kapolisan.

Si Victor nabalaka na pag-ayo. Ingon sa napanghilantawan na niya kon unsay posibleng mahitabo kon dili gayod nila makaplagan ang iyang iyaan. Nakaseguro siya nga ang iyang iyaan mahiagom gayod sa kabangis sa mga disipulo sa Bangkulis.

Ug wala gayod masayop si Victor; nahitabo ang gikahadlokan niyang mahitabo. Nianang hapon sa adlawng Huybes, samtang nagsultihanay sila si Maj. Campo sulod sa buhatan sa hepe, kalit mibagting ang telepono sa ibabaw sa lamesa niini. Gipakigsultihan sa hepe ang nanawag. Human sa ilang panagsulti, milabhag ang kasubo sa nawong niini nga miatubang kaniya. Nakit-an na nila ni Lt. Valera ang iyang iyaan… apan usa na ka patay! Morag nalipong si Victor pagkadungog sa maong kasayoran. “D-diin man kuno nila makit-i ang patayng lawas ni Tiya, Dick?” pangutana ni Victor nga nagluha ang mga mata. “Sa beach resort sa Barangay Marcelo,” maoy tubag. Nagdali sila pag-adto sa nahisgotang dapit. Ang sakyanan ni Maj. Campo maoy ilang gisakyan. Ang awto ni Victor gibilin lang sa kuwerpo.

Maoy ilang naabtan sa dapit ang bagang duot sa katawhan nga sama sa buot mosaksi og pasundayag. Naghuot. Nagpunsisok. Nagdali sila pagpanganaog sa sakyanan ug mingliot-liot sa daghang tawo aron makaabot sa nahimutangan sa patayng lawas nga nakaplagan.

Napahimutang na ang patayng lawas ni Tiya Marta sa stretcher. Daw gikusi ang kasingkasing ni Victor sa iyang nakita. Daghag bun-og ang nawong sa iyang iyaan. May mga samad kini sa lainlaing parte sa lawas. May baraw nga nagtaop sa dughan niini. Misantop gilayon sa hunahuna ni Victor nga gipaantos una ang iyang iyaan sa wala pa kini patya sa mga sakop sa kulto.

Wala makalahutay si Victor pagsud-ong sa gidangatan sa iyang iyaan. Midali siya pagbalik sa nahimutangan sa ilang sakyanan. Misunod si Maj. Campo kaniya. Nagpamukpok si Victor sa iyang dughan sa didto na siya sulod sa sakyanan. Gialam-alaman siya ni Maj. Campo.

“Dako na kaayog atraso kanako ang mga sakop sa kulto, Dick,” ni Victor pa nga nagpaminti sa tumang kapungot. Ang iyang galamhan niining tungora gisugniban sa tumang kasilag ug kaligutgot.

Nahulog sa kaalaotan ang iyaan ni Victor. Unsay mahimong linugdangan niini?

“Inayanaya ang imong gibati, Victor,” nagkanayon ang hepe. “Kalma lang. Dili masulbad sa pinutong kining problemaha.”

Daw nahugno si Victor. Napukpok niya ang lingkoranan sa sakyanan. Nagkagot ang iyang mga bag-ang sa tumang kalagot.

ANG patayng lawas ni Marta gidala sa ilang pinuy-anan nianang buntag sa adlawng Biyernes. Nagbangotan ang pamilya ni Marta. Walay pagtuang ang paghilak ni Belen. Naglamugdong usab sa kasubo ang mga panagway nilang Tiyo Berto ug Jimmy. Si Arlin nga atua sa Carmen uban sa bata nga si Shantal, gitawgan ni Victor ug gipahibalo sa nahitabo. Nagminatay kinig hilak sa ilang panagsulti sa cellphone. Apan wala mosugot si Victor nga mopauli kini sa Mabini.

“Gusto kong motan-aw sa haya ni Mama, Gaw,” pasabot ni Arlin.

“Nakasabot ko sa imong gibati, Gaw,” matod ni Victor. “Apan delikado kon magpakita ka diri ilabi na gayod ang bata. Nasayod ka nga nagtinguha ang mga sakop sa kulto sa kaalaotan ni Inday Shantal. Busa ayaw na lang gyod pag-ari diri.”

Wala na motingog si Arlin didto sa pikas linya. Nabati ni Victor ang masubsob niining pagbakho.

“Diha ka na lang gyod, Gaw,” nagkanayon si Victor. “Makasabot ra tingali si Tiya Marta sa hinungdan kon nganong dili ka makapauli diri ug makakita man lang sa iyang haya.”

“Kanus-a man kuno ilubong si Mama, Gaw?” Ubay sa paghingos-hingos ang pangutana ni Arlin.

“Wala pa mi magkasulti si Tiyo Berto mahitungod niana,” niya pa. “Apan gusto ko nga ikalubong si Tiya sa labing daling panahon.”

Mihangyo si Arlin nga makigsulti kini kang Belen. Gitawag dayon ni Victor si Belen ug gihatag ang cellphone. Nagsultianay ang managsoon. Igo lang naminaw si Victor. Naghilak si Belen nga nakigsulti sa magulang. Si Victor nga namati gitupsan sa kaluoy.

Wala madugay, gitunol ni Belen ang cellphone balik ngadto kang Victor.

“Kamo nay bahala diha, Gaw,” ni Arlin pa. “Ayaw lang gyod sila pasagdi.” “Ayaw kabalaka.” Mipasalig ang sekreta. Igo lang nahuman ang panagsulti nila ni Arlin, mibagting pagusab ang cellphone ni Victor. Gitamdan niya ang caller ID. Ang supremo sa kulto maoy nanawag. Gitubag dayon kini ni Victor. “Hello!” ni Victor nga nagbukal ang dugo sa kapungot. Nabati niya ang katawa gikan sa pikas linya. Katawa nga naghambin og kantalita. Katawa nga naglukim og biaybiay. Ug dihang mihunas na ang kahimuot niini, miingon: “Inutil ka, Mr. Foz.”

“Hayop ka!” Mingkagot ang mga bag-ang ni Victor. “Nganong inyong gipatay ang akong iyaan? Wala siyay sala kaninyo!”

“Dako siyag sala, Mr. Foz,” nagkanayon ang babaye nga supremo sa kulto. “Giluiban niya ang among ginoo nga mao si Satanas!”

“Magbayad kamog mahal sa inyong gibuhat!” Nagpaminti si Victor nga mibahad.

“Wala miy angay pagabayran, Mr. Foz,” matod sa supremo. “Ikaw hinuon ang angay mangandam tungod kay ikaw na ang akong isunod.”

Ug naputol ang linya. Nakapangusmo si Victor. Gipalagot gayod siyag maayo sa supremo.

NIANANG pagkaudto, may mga tawo nga nangabot sa panimalay sa mga Escobar. Mga silingan, kabanay ug ordinaryong mga higala nga buot moduyog sa kasub-anan sa banayng Escobar. Nanagdala silag mga kandela ug mga lukong sa bulak alang sa namatay. Daghan usab ang minghatag og limos luyo sa dugokan nga dili kaayo lisod ang kahimtang sa namatyan. Milutaw gayod ang natural nga kagawian sa mga Pilipino panahon sa kasub-anan.

Si Victor hilom nga naniid sa mga tawo nga nagsulod-gawas sa balay. Gisul-ob niya ang iyang X-ray eyeglasses ug gisuhid ang mga tawo nga nagpuli-pulig tan-aw sa haya ni Tiya Marta. Wala silay kasayoran nga hingpit silang hubo sa panan-aw sa sekreta kay molapos man ang iyang tinan-awan sa gisul-ob nilang sapot gumikan sa kahait sa lente sa X-ray eyeglasses. Wala siyay daotang tumong sa paghimo sa ingon. Hinunoa, namasin siya nga may makita siyang sakop sa kulto nga mitambong sa haya. Mailhan niya kini kon makita niya ang patik nga 666 sa bukubuko niini.

Apan wala siyay nakitang mga sakop sa kulto nga mitan-aw sa haya sa iyang iyaan. Wala gayoy usa kanila nga mipatim-aw sa panimalay sa nagbangotan nga pamilya sa mga Escobar.

Gitangtang na lang ni Victor ang X-ray eyeglasses. Nausa ang iyang pagtuo nga walay mga sakop sa kulto nga nahitungha sa panimalay sa mga Escobar. Naglikay sila nga masakpan, maoy iyang katahap.

Paglingay sa Adlaw sa kaudtohon, nahiabot si Padre Daniel, ang kura paroko sa parokya sa Mabini, kuyog sa usa ka sinaligan. Ang pari mitunol sa mga pahasubo niini ngadto sa nagbangotan nga mga hingtungdan sa namatay. Mihatag kinig mga pulong sa pagdasig sa mga tagtungod sa tinguha nga madawat nila ang kamatuoran nga patay na si Marta.

Si Victor ang ulahing gipakigsultihan ni Padre Daniel. Mipahasubo usab kini kaniya. Dugay-dugay ang ilang panagkabildo. Nahisgotan ni Padre Daniel ngadto kaniya nga nakapangompesal diay ang iyang iyaan ngadto sa pari sa wala pa kini dagita sa mga sakop sa kulto.

Igo lang nakabiya si Padre Daniel, nahabanos sa pag-abot si Maj. Dick Campo. Mitunol usab ang hepe og mga pahasubo ngadto sa mga hingtungdan sa gipatay. Miduyog kini sa kasubanan sa pamilya nga nahitaboan.

Daklit nga nagkasulti sila si Victor ug Maj. Campo. Nahisagmuyo ang sekreta sa gitaho sa hepe nga wala pa gyoy development ang gipahigayon nga 24-hour operations sa kapolisan sa pagpangita sa mga sakop sa kulto.

“Sagdi lang, Dick,” ni Victor pa. “Ipadayon ko ang akong gimbuhaton kon ikalubong na si Tiya.” “Kanus-a ang inyong plano?” nagpakisayod ang hepe. “Sabotan pa kini namo,” niya pa. “Mag-agad ko sa desisyon nila ni Tiyo Berto.

Kalit mihun-ag ang kaligdong sa nawong sa hepe. “Niya pa, “Sorry kaayo, Victor. Wala miy nahimo sa pagluwas sa imong iyaan.”

“Wala ikawy angay hunahunaon bahin niana, Dick,” ni Victor pa. “Managsama kitang napakyas sa pagluwas sa akong iyaan.” Wala motingog si Maj. Campo. Igo lang kining mitutok kaniya. “Manawag lang unya ko nimo, Dick,” nagkanayon si Victor paglibkas sa pipila ka daklit, “kon magkinahanglan ko sa imong kooperasyon.” “Areglado, Victor,” pasalig sa hepe. Wala madugay, nananghid na ang hepe kang Victor. Kinahanglan kining mobalik gilayon ngadto sa kuwerpo sa kapolisan gumikan sa daghan niining buluhaton nga may kalabotan sa ilang pagpahigayon sa pagpangita sa mga sakop sa kulto.

Paglabay sa napulo ka gutlo (human makalakaw si Maj. Campo), mibagting ang cellphone ni Victor. Wala siyay ideya kon kinsa ang nanawag. Gikuha dayon niya ang cellphone gikan sa bolsa sa iyang dyaket. Gitamdan niya ang caller ID niini aron pagsuta kon kinsa ang nanawag. Maoy milutaw sa screen ang numero sa cellphone ni Luis Navarro, ang misteryoso niyang kaaway nga gikasangka niya didto sa Luneta sa kaulohan nga sakop usab sa kulto.

Kalit mikuba ang dughan ni Victor. Kusog nga pagkuba. Daw gilubok ang iyang kahiladman sa wala niya hisabting mga pagbati.

(PADAYONON)

Si Victor hilom nga naniid sa mga tawo nga nagsulod-gawas sa balay…