ANG AKONG PAMAGDOY SA YUTA SA OZ
(Ikalimang Gula)
LAAGAN ang magtiayong Yoyong ug Ryedgee, busa hapit adlaw-adlaw ming gisuroy sa Sydney. Sa usa ka tuig nilang pagpuyo sa Sydney, didto na silas Caberra (gilay-on: 286 kms) ug Melbourn (876 kms). Sa pagbakasyon ni Faith sa miaging tuig (Mayo 2016) didto silas Snowy Mountains (492 kms). Gani, ilang plano nga isuroy mis Pat didtos Gold Coast, Queensland sa unang higayon nga makalugar si Ryedgee.
Sa miaging Miyerkoles (Abril 5) duha ka lugar ang among gisuroyan: ang Kamay Botany Bay National Park ug ang Centennial Park. Sa pagka-Sabado didto mis Olympic Park. Nangadto mis Kiama pagkahumag simba nianang Domingo (Palm Sunday). Ika-71 nga kaadlawan ni Pat (Abril 9) mao nga may kandela nga giugbok sa long stack pancake sa among pagpaniudto human sa simba didto sa Pancakes On-The-Rocks. Among gisalohan ang beef ribs, ribeye steak ug Greek salad. Si Casey nag-order og the
butterfly pancake.
Ang Kamay Botany Bay National Park usa ka protektado nga parke sa Sydney sa kaulohang rehiyon sa New South Wales. Ang 456ka-ektarya nga national park duol ra sa Sydney CBD (16 kms). Didto mis La Perouse sa habagatang punta sa Botany Bay. Agi sa kahoyng taytayan mingtabok mis Bare Island. Sa kanhi kota militar nahimutang ang La Perouse Museum diin mabasa ang eksplorasyon sa Pranses nga si Comte de Laperouse. Gihugopan ang Botany Bay National Park sa mga mahiligon sa pagkaligo, snorkeling, pamingwit ug piknik. Apan wala mi moadto sa baybayon kay dili mosugot si Casey kay nakakita siyag iho sa ilang pagkaligo didto. (Daghang iho ang kadagatan sa Australia).
Ang Centennial Park usa ka luag nga siyudadnong parke sa Sydney. Lugar kini sa mahiligon sa birdwatching tungod sa daghang klase sa anad nga mga langgam nga mag-ilog sa imong isabod nga pagkaon. Nagsagol ang mga
langgam didto sa dakong lim-aw nga among naadtoan. Gawas sa white ibis, kalapati, uwak, ug kanaway (nga makita sa bisan asang lugar sa Sydney), dihay martaniko, abukay, itik ug uban pang langgam nga wa ko kaila sa mga ngalan. Sa pagkakilumkilom nanggawas ang baga nga bahan sa dagkong mga kabog.
Ang Sydney Olympic Park usa ka dakong atletikanhon, kultural ug lulinghayawan nga lugar sa kasadpang Sydney. (Dinhi gihimo ang 2000 Olympics).
Daghan ang masudlan ug masakyan sa Sydney Olympics Park. Naay ferris wheel, roller coaster ug ubang train rides, log jam ug ubang water rides, klase-klaseng pendulum rides ug drop rides. Apan ang duha ka horror house ra ang among nakayang sudlan ni Pat. Nagtuo kong para sa mga bata kay di man hadlok sa sulod kon itandi sa horror house sa Gloria’s Fantasyland sa Dapitan City.
Nahitabo nga dunay gipahigayong livestock show sa dakong estadyum adtong adlawa ug nalingaw kog bidyo sa parada sa nagkalainlaing rasa sa mga baka sa Australia.
One-way ang motorways ug highways sa Australia busa mas luwas sa disgrasya. Dali sad maabot ang lugar nga adtoan kay sayon maabot ang gitugot nga maximum speed sa sakyanan. Hinuon, kinahanglang magmabinantayon ang drayber sa speed limit kay dako ang multa sa speeding ($430 o P16,000).
Ang unang layo-layo namong bihaye mao ang pag-adto sa lungsod sa Kiama (120 kilometros habig sa habagatan sa Sydney) nga sakop sa rehiyon sa Illawara, New South Wales. Kay way katagbo sa dalan, si Pat nga taslakan og kusog nga dagan wala batiag kahadlok bisan kon ang dagan sa sakyanan moabot og 110 kilometros matag oras.
Ang among tuyo sa Kiama mao ang pagtan-aw sa Kiama Blowhole nga gihugopan og mga turista (600,00 matag tuig). Sa haom nga kondisyon sa dagat, ang blowhole makasabyag og tubig hangtod sa 25 ka metro pataas, sa gidaghanon nga makatumog sa mga tumatan-aw. Bisag way tubig nga misulbong sa among pagbisita, may ideya ko kon unsa kakuyaw ang blowhole base sa salidang Fool’s Gold ( starring Matthew McConaughey ug Kate Hudson) nga akong nakita. Nindot ang rock formation ug nahimo ming kabahin sa daghang tawo nga nalingaw pagkuhag hulagway sa palibot sa blowhole.
Sa among pagpauli minghapit mis Wolonggong, usa ka dakbayan daplin sa dagat nga sakop usab sa Illawara.
“Aron lang makatunob sa lugar,” pasiaw ni Ryedgee nga ang tinuod nga tuyo mao ang pagtilaw sa ice cream ug hot chocolate sa dakbayan.
Una ming nanulod sa usa ka chemist store aron pagpalit og tambal sa akong ubo. Wala na ko moadto sa counter kay ang Rubitussin syrup apil sa klase-klaseng non-prescription drugs, food supplements ug beauty products sulod sa tag-as ug habog nga mga estante. Apan lahi sa Mercury Drugs o Rose Drugstore sa Pilipinas nga maglinya ang pumapalit, duha ra ka kustomer ang among naabtan didto.
“Morag ghost town ning lugara,” ni Pat pa. Sa among pagtuyok-tuyok sa siyudad pipila lang ka tawo ang among nakita sa kadalanan. Ambot tungod bas oras (alas-singko nas hapon) ug nanera na ang dagkong mga tindahan.