Jode Sta. Maria
Simple, Yano, De Kalibre
MALIPAYONG mipahibalo si Jodi Sta. Maria sa iyang pagbalik sa telebisyon ning tuiga. “Magbabalik telebisyon na tayo this year,” ni Jodi pa nga ang kinaulahiang teleserye mao ang “Pangako Sa Iyo” sa miaging tuig. Hinuon, wala pa siya modetalye kalabot sa umaabot nga proyekto.
Human sa iyang papel nga Amor Powers, gihimo niya ang lilas “The Achy Breaky Hearts” uban nila ni Ian Veneracion ug ni Richard Yap. Unya migula siya sa “Maalaala Mo Kaya” una magsiyoting og usa pa ka pelikula, ang “Dear Other Self,” usa ka laing lilas sa Star Cinema diin maoy kauban niya sila si Joseph Marco ug Xian Lim nga showing pa sa pagka karon sa mga sinehan sa kapupud-an.
Nakigsulti ang aktres sa mga reporter human makuhai og mga hulagway alang sa promosyon sa maong lilas ug sanglit nahisgotan niya ang iyang papel bahin niini, gipangutana siya kon kinsa siya kon dili siya ang babaye sa estorya, kini ang iyang gitubag: “Siguro, what if naging doctor ako? Kasi iyon iyung pinaguusapan namin kanina. Kung tinuloy ko iyong medicine, ibang-iba siguro iyong buhay ko ngayon.”
Nabalita nga lagmit gisugdan na ang bag-ong teleserye ni Jodi diin dili lang usa ang bidang lalaki kondili duha nga mao sila si Richard Yap ug Robin Padilla. Unang ikatrabaho sa aktres ang sikat nga aktor. Ang JoChard loveteam nila ni Jodi ug Richard mimarka pag-ayo sa “Be Careful with My Heart” nga teleserye nila niadtong 2012 hangtod 2014.
Sumala sa balita nga unta dili mausab, ang titulo sa teleserye nila karon uban ni Richard ug Robin mao ang “Sana Dalawa Ang Puso Ko”. Ug tataw kaayo nga sa titulo pa lang, duha ang mag-inilogay sa kasingkasing sa aktrres. Kon kinsa kanila ang magmalamposon, makapaukyab nga atangan sa Kapamilya Network.
“Kung matutuloy man ‘yan, siyempre sobrang excited ako. Sino ba naman ang ayaw makatrabaho ang isang Robin Padilla, hindi ba?” tuaw sa aktres. Kon kinsa si Jodi, natawo siya katloan ug lima na ka tuig ang minglabay sa Santa Rosa, Laguna binunyagan sa ngalang Jodi Chrissie Garcia Santamaria. Nahimo siyang aktibo sa showbiz sukad pa kaniadtong 1998 ubos sa Star Magic sa Kapamilya Network. Sa iyang nakab-ot isip artista, giila siya karon sa mga ngalang Jodi Sta. Maria, Amor, Maya, ingon man sa mga titulong “Daytime Queen” ug “Primetime Queen”. Una siyang nailhan sa mga pasundayag nga “Tabing Ilog” ug “Pangako Sa ‘Yo”. Dayon gisundan sa “Darating ang Umaga”, “100 Days to Heaven”, “Be Careful With My Heart”, “All You Need Is Pag-Ibig”, Ug kini karong ulahi nga “The Achy Breaky Hearts.” Duha lang sila si Jodi nga managsoon. Manghod siya sa igsoon niyang lalaki ug sila solong gipadako sa ilang inahan. Nagtungha siya sa Philippine Pasay Chung Hua Academy diin usa siya ka consistent honor student. Naminyo siya kang Panfilo Lacson, Jr. nga anak ni Senador Panfilo Lacson diin may usa siya ka anak nga natawo kaniadtong 2005 apan nagkabulag na sila. Mieskuyla si Jodi sa De La Salle UniversityDasmariñas sa kursong Medical Biology nga maoy pangandam sa tinguha niyang mag- doctor apan miundang siya paglabay sa usa ka tuig gumikan sa kalit nga pagmalamposon sa teleseryeng “Be Careful With My Heart” nga na- extend pagpasundayag gikan sa tulo ka bulan ngadto sa duha ka tuig ug tunga. Si Jodi usa karon ka WHO Ambassador sukad pa kaniadtong 2011. Gidayeg nga usa sa labing talentadong aktres sa Pilipinas, ubos si Jodi sa pag-atiman sa Star Magic sa ABS-CBN, kauban sa Star Magic Batch 7. Nagmalamposon dayon siya nga batan-on pa kaayo sa sikat nga tv show kanhi nga “Tabing Ilog”.—