Kon Mahurot Ang Isda Sa Dagat (Gula 10)
ANG pag-ingon ni Nora nga bahala ka mao lay pagtapos sa usa ka hilisgotan nga wala siyay kalutsan gawas sa paglitok niadto. Dili gayod kadto maoy gimando sa iyang galamhan. Gani ang laing sugyot nga nagpanikad ilawom sa iyang dughan mao nga pakigkitaan si Ecolboy sa sekreto nga pakigkita aron kini makabantay sa maitom nga laraw ni Erwin. Kini aron malikayan ang daotang mahitabo.
“Maayo!” Miyango-yango si Erwin human mabati ang susamag pag-uyon ni Nora sa ilang pagabuhaton, sa pag-ingon niini nga bahala.
“Unsay maayo ba, Win?” Buot klarohon ni Nora ang iyang nadungog.
“Maayo ba nga masayod kang daan kon unsay mahitabo sa imong amigo.”
Wa na lang mosumpay si Nora. Ug ang misunod nga kahilom maoy nag-aghat kang Erwin nga mobiya aron pag-agpas nilang Tony ug Jimboy. Mao usab kini ang gipaabot ni Nora aron makapensar sa iyang angay pagabuhaton.
Samtang si Ecolboy gibatig kalaay sa iyang pagpamasol kay hinay ang kubit. Hinuon nasayod siya nga dili sa tanang panahon kusog ang kubit. May panahon sab nga demalason, sama sa ubang negosyo, may panahon nga kusog ang halin ug may panahon nga langawon ang tinda. Karon morag demalas. Maong nakahukom siya pagpanghipos sa iyang kahimanan. Sa iyang banabana sa oras, mga alas onse na sa kaudtohon, ug nakahunahuna siya nga adto na lang sa ila maniudto. Maayo pa kay aron makahigop og init nga sabaw sa diyotay ug gagmay nga lagaw nga iyang kuha.
Ning tungora, sila si Erwin ug mga kauban didto sa sulod sa ilang lawak sa Queen’s Castle naghuwat sa ilang paniudto. “Karong gabii ang maayo natong ibira,” maoy plano ni Erwin. “Malagmit pod nga tua siya sa dagat niarong mga orasa,” sumpay ni Tony.
“Agad-agad ra ko nimo, Boss Erwin. Usa ra god ka tawo ang atong birahan. Dili na magdugay,” ni Jimboy nga naghinis sa iyang pistola nga cal. 45. Gihuypan niya ang buka niini.
“Ang akong plano nga inigkahuman nato niini, magminyo na mi si Nora ug anhi na ko mopuyo dinhi,” padayon ni Erwin. “Yati tininuod na gayod kanang imo, Boss?” “Unsa pa man diay, Jimboy? Nakita nako nga maayo dinhing lugara i- extend ang akong negosyo.”
“Sa bagay, linaw dinhi…” Wa na tiwasa ni Jimboy ang buot niyang iestorya kay wa na kinahanglana. Igo na lang gidungagan sa pagngisi nga salabtonon.
“Pero kinahanglan sab nga makasal mi sa akong uyab aron way matahap sa akong negosyo, di ba?”
“Ha-ha-ha! Mao diayng ganahan ka diri, Boss. Kay kon babaye lang ang hinungdan, tuay daghan sa siyudad.”
“Psssttt!” Misenyas pa si Erwin pinaagi sa pag-ali sa iyang tudlo sa iyang baba ug milingi-lingi.
Sanglit serado ang lawak diin dili mabati sa gawas, sunod nga milanog ang kinataw-anay sa tulo.
“Daghan pa kog plano para dinhi. Pero kinahanglan nga patuohon nato ang akong uyab nga tininuod gayod kining ako. Usa na niini mao ang pagpatay sa akong kakompetensiya niya.” “Belib kos imong plano. Boss!” Sa iyang bahin, ingog nahigwaos si Nora nga dili makasugilon kang Ecolboy. Apan nahadlok usab siya nga basig makit-an o mahibaw-an ni Erwin. Hangtod nga nahiagi si Perla. “Asa man ka, Perl?” niya pa. “Moadto unta kos ilang Ecolboy. Mangutana ko kon nakaadto ba siya sa dagat. Ngano man unta, Nor?” “Puyde ba, hapit una kay duna koy isulti nimo?” Nanglingkod sila sa sala seat sa may balkon. “Perl, nakaila ka ba kang Erwin?” “Kadtong taga Cebu nga pirme dinhi sa inyo. Uyab mo, no?” Wa motubag si Nora. Apan nakasabot si Perla sa dihang mipahiyom si Nora. “Ngano man diay, Nor?” “Nahadlok man god ko, Perl, nga dunay mahitabo kang Ecolboy.” “Isa ra, pasabta una ko, Nor. Unsa may labot ni Ecolboy?” “Nagselos man god si Erwin kang Ecolboy kay abi niyag nanguyab si Ecolboy nako. Unya nagdala man si Erwin og taga Cebu, ug buot niining ipapatay si Ecolboy kon makita niini nga magkuyog ming duha. Maayo untag mahibawo niini si Ecolboy aron makalikay.” “Kakuyaw diay niana, Nor, no?” “Mao na, Perl. Kon mahimo, ikaw sugilon kang Ecolboy.” “O, sige, Nor, akong suginlan.” Daling nakauyon si Perla kay maluoy usab siya kang Ecolboy. Gani may pagbati man siya niini, ugaling lang kay babaye man siyang buhat nga dili makapadayag sa maong pagbati.
“Sige, salamat kaayo, Perl. Palihog pagsugilon dayon niya aron makalikay siyang daan, ha, ba?”
Miyango si Perla. Apan wa dayon kini molakaw kay ganahan pa siyang makig-estorya sa higala. Daghan pa kinig buot masayran. “Kining, Nor, dato man diay nang imong uyab, no?” “Nganong nakaingon man ka ana, Perl?”
“Nahibawo man ko nga naa na mag-estar sa Queen’s Castle. Kamahal kaha sa pagpuyo diha. Kon pobre-pobre lang, di makahimo ana, uy! Unsa diay ang trabaho niya?”
“Negosyo,” maoy dali nga natubag ni Nora kay wa man siyay laing kasayoran. Ang iyang nahibaw-an nga may pagkabutang ang mga ginikanan niini ug bugtong kining anak.
“Ahhh!” Mao ray natuaw ni Perla. “Palaran kaayo ka, Nor, kon magkadayon mo. May plano na mo sa pagpakasal?” Mikatawa lang si Nora. “Nagligid pa ang bola, Perl.” “Aw, sige, Nor, adto na ko kay aron masayod dayon si Ecolboy.” Nahinumdom si Perla sa tahas nga gisangon kaniya.
Gikan sa ilang Nora, milargo si Perla sa ilang Ecolboy ug naabtan niya kini nga mao pay pag-abot gikan sa dagat.
“Demalas man ta karon, Perl, kay wa man koy kuha,” sugat ni Ecolboy.
“Sagdi lang, kay naa koy importanteng isugilon nimo,” ni Perla nga mipahimutang sa silya.
Mikuhag laing silya si Ecolboy ug milingkod atubang kang Perla.
“Ecolboy, didto ko gikan sa ilang Nora, ug gitugon ko niya nga pasuginlan ka bahin kang Erwin.” Buot pamatud-an ni Ecolboy ang iyang gugma kang Nora pinaagi sa pagsugal sa iyang kinabuhi…
“Ha?” Milurat ang mga mata ni Ecolboy. “Kay ngano, gisuginlan ka niya?”
“Uyab na diay sila, Ecolboy. Ug nasuko si Erwin nimo kay samokan kuno ka kaayo. Abi nimo, naay kauban si Erwin nga taga siyudad nga ang tuyo mao ang pagpatay nimo. Maong pasuginlan ka ni Nora aron ka makabantay.”
Inay molakra ang kabalaka sa panagway ni Ecolboy, mipahiyom lang kini. “Nganong pabantayon man kuno ko ni Nora?” Buot panagaton ni Ecolboy si Perla kon may gisulti bang lain si Nora bahin kaniya ug sa dalaga.
“Wa man. Ang iya rang giingon nga pabantayon ka. Ngano man, Ecolboy, tinuod tingali nga nanguyab ka niya kay nganong masuko man si Erwin ug nganong mora man sab og concern kaayo si Nora nimo?” Ingon og si Perla na usab ang buot managat kang Ecolboy.
“Maayo unta tog si Nora maoy misulti nimo bahin ana, Perl.” Buot molihay si Ecolboy. “Aw, sige, salamat sa pagsugilon nimo.”
Sa dihang nakalakaw na si Perla, mao pa mobatig kabalaka si Ecolboy sa iyang kaugalingon. Ang iya karon mao ang pagpangandam. Nagtuo siya nga ipaagi sa lipot ang pagpatay kaniya aron malilong lang ang tanan ug dayon mosibat lang ang mamumuno. Apan dili sab maayo nga motago lang siya nga dili ikapakita ug kapanalipdan ang iyang gugma. Ug natibuok ang iyang hukom nga pakamatyan niya kining gugmaha, bahalag unsay mahitabo!
Usa sa pagpangandam nga iyang nahunahunaan mao ang pagpangitag katabang nga iyang ikauban sa pagsuroy-suroy, sama sa gibuhat ni Erwin nga adunay susama sa badigard. Ug ang misulod sa iyang pangisip mao si Londoy, ang iyang ig-agaw nga barangay tanod.
(PADAYONON)