MAAYONG IDEYA GIKAN SA DIOKO FARM RESORT
ADUNAY maayong mga ideya labot sa panguma nga mahimong mapupo ni bisan kinsa mang moduaw sa Ecotourism Park sa Dioko Farm Resort sa San Joaquin, Dakbayan sa San Pablo sa Laguna.
Ang tag-iya niini malipayong naghinubay nga usa siya ka high school dropout. Ang iyang mga ideya mahimong maoy kuhaan og panag-ingnan sa kabatan-onan nga mosulod sa natad sa panguma isip usa ka halangdong propesyon. Mahimo usab kining sundogon niadtong nanaglaraw pa lang nga mosulod sa agriturismo.
Ang tag-iya mao ang 59 anyos nga si Celso Dioko nga napulo ka tuig na didto sa Saudi Arabia, Libya, ug Japan isip OFW. Niadtong nahiuli na siya sa iyang dapit sa Muntinlupa sa tuig 2000, nagsugod siyag negosyo og hardware hangtod nga mitubo ngadto sa construction business nga nagpadayon pa gihapon hangtod karon. Siya maoy nagtukod sa mga planta sa usa ka dakong kompaniya sa softdrinks.
Malamposon si Celso sa iyang
patigayon ug nahunahunaan usab niyang mosulod sa serbisyo publiko ug sa pagkakaron napili siyang bise mayor sa Muntinlupa.
Niadtong 1995, nagpalit siyag tulo ka ektarya sa Brgy. San Joaquin aron aduna siyay kalingawan. Wala madugay, daghan ang naghanyag kaniyag yuta ug karon moabot na og 30 ektaryas ang kinatibuk-an niini. Adunay tulo ka parte ang Dioko Farm Resort apan anha lang ta mosentro sa Ecotourism Park sanglit ania dinhi makita ang mga ideyang pang-agrikultura. Pang-agriturismo gayod ang parke. Daghag makatonan ang mga mobisita, mga bata man kun hamtong.
Sa entrada, makita ninyo ang bersiyon ni Celso sa Bahay Kubo. Sa palibot niini, gitanom ang kapin sa 18 ka utanon nga apil sa kantang pambata nga Bahay Kubo. Anaa dinhi itanom ang sigarilyas, lunga, mani, labanos ug uban pang utanon nga labaw pa sa anaa sa kanta. Ania
man sad god dinhi ang tanglad, citronella, passion fruit, dragon fruit ug uban pa.
Sa usa ka kilid, anaa ang balay nga gibutangan sa tabog sa gitawag natog stingless bee kun putyukan nga walay pang-ikos. Mogama sab nig dugos apan ang dakong kapuslanan niini mao ang pag- pollinate sa mga bungahoy ug utanon nga mamungahay sama sa pipino, kalbasa, kamatis, talong, batong, ug daghan pang uban.
Himsog kaayo ang mga bungahoy sa Ecotourism Park. Abunda sila sa abono nga organiko nga gama sa mga wati. Lakip sa mga bungahoy mao ang tam-isan nga sambag, satsuma orange, buongon, lemon, bayabas, garnate, bugnay, lainlaing barayti sa mangga gikan sa ato ug sa ubang nasod. Ug sa taliwa sa mga punoan mao ang daghang plot alang sa letsugas ug uban pang utanon.
Ang mga letsugas ginatanom sa gawas ug sulod sa greenhouse. Gawas sa letsugas sa sulod sa
greenhouse, atua sab didto ang oyster mushroom, strawberry, apple melon, kamatis, ug uban pa.
Makahimuot ang ilang mga uhong. Moani sila og 30 hangtod 50 kilos sa usa ka adlaw ug gibaligya sa kantidad nga P120 ang kada kilo. Ang dili mahalin gigama nilang atsara o kaha gipauga ug gigama nga chips. Lamian man sab diay ang mushroom chips.
Aduna pay usa ka produkto nga maayog halin sa Dioko Farm. Kini mao ang halang nga sili. Aduna silay kinse mil ka punoan ug ang ilang hinarbes gigama nilang chili powder.
Aduna usay makapahimuot sa kabataan lakip na sab gani ang mga hamtong. Kini mao ang butterfly farm diin gipreso ang mga alibangbang busa makita didto kon giunsa pagkinabuhi sa mga alibangbang gikan sa itlog hangtod nahimong ulod hangtod nahimong turik hangtod natugkan og pako.
Atong duawon ang Dioko Farm. Daghan kitag makat-onan didto. Mahimo kamong manawag sa (049) 800-4542 ug pangitaon si Virgilio Dioko nga maoy resident manager.—