ANINO SA KAAWAY
GIMANDOAN gilayon ni Victor Foz sila si Berto, Jimmy ug Belen sa pagpasalipod sa mga panteyon sa sulod sa sementeryo. Wala na manguti-kuti ang tulo kon unsay hinungdan. Gituman nila ang gisugo sa detektib. Nag-iyahay silag pasalipod sa mga semento nga nitso. Si Victor diha mopasalipod sa nitso nga bag-o lang gisudlan sa lungon sa iyang iyaan. Hugot niyang gigunitan ang Uzi.
“Ng-ngano man diay, Gaw?” Halos pugngan ni Belen ang tingog niini. Milabhag sa dagway sa dalaga ang kahadlok. Nangluspad kini. “May namatikdan kong laing sabaw,” matod ni Victor. Ug gilingi niya si Jimmy nga nagpasalipod usab sa panteyon habig sa iyang walang kilid. “Nadala ba nimo ang armas nga akong gihatag nimo, Gaw?” “Oo, Gaw,” maoy tubag. “Maayo hinuon,” nagkanayon ang detektib. “Gamita kana kon gikinahanglan.” Walay tubag. Naniid si Victor. Mingaw na ang palibot. Wala na niya mabati ang langyawng kinasikas nga iyang nasawod kaganina. Apan wala siya mokompiyansa. Sa natad sa panggubatan, maoy makabentaha ang segurista. Dili lang ang kaisog maoy gikinahanglan aron mabuntog ang kaaway kondili ang kaabtik sa hunahuna. Wala sa pinutong kondili anaa sa paggamit sa utok ang kadaogan sa bisan unsang sambunot. Gihinay ni Victor pagpagawas ang iyang ulo sa ngilit sa nitso nga iyang gipasalipdan. Gipagimaw niya ang kutob sa iyang mata ug misuling sa palibot. Ug mingtingkag ang iyang mga dunggan. Mao gayoy misugat sa iyang panan-aw ang bayhon sa usa ka tawo nga maoy pagtapon gikan sa usa ka panteyon ngadto sa laing panteyon. Nagmaskara ang maong tawo ug armado. Nag-anam kinig paduol sa ilang nahimutangan. “Alisto, Gaw,” giingnan ni Victor si Jimmy sa hagawhaw nga tingog. “Bantayi sila si Tiyo Berto ug Belen kay mokamang ko
ngadto sa unahan. Kon may makita kang tawo, nasayod ka na sa angay mong buhaton.”
Wala motubag si Jimmy. Apan nagtuo si Victor nga nakasabot kini sa iyang gisulti.
Milihok dayon si Victor. Gikan sa nitso nga iyang gipasalipdan, mainampingon siyang mikamang sa unahan. Mihinok siyag lipot sa panteyon nga gipasalipdan sa tawo nga iyang nakita. Dihang napahimutang na niya ang iyang kaugalingon sa maayong pagkasalipod, mingliraw ang iyang mga mata sa palibot. Wala siyay namatikdan nga kasikas.
Ang bato nga ingog kumo kadako nga nasindolan sa iyang tuong tiil gipunit niya sa wala niyang kamot samtang ang tuong kamot maoy naggunit sa Uzi. Mikilas ang iyang panan-aw. Nakita ang sin nga atop sa payag-payag sa usa ka lubong.
Uran-uran, gilabay niya ang bato nga iyang gigunitan ngadto sa atop nga sin. Milugapak ang sin nga naigo sa bato. Dihadiha, milanog ang masipang buto sa taas og kalibre nga armas gikan sa tawo nga diha ra magpasalipod sa luyo sa nitso nga gihup-an usab ni Victor. Maoy gipusil niini ang dapit nga gigikanan sa lugapak.
Wala lang ing kasayoran ang kaaway nga si Victor, ang nagmugna sa maong lugapak, diha ra sa duol. Kalit nga miligid si Victor sa yuta gawas sa iyang gitagoan. Nabantang na pag-ayo ang tawo sa iyang posisyon nga naghayang. Ang kaaway wala na makapanalipod sa kaugalingon nga sayon da kaayo niyang giluthang. Ang tawo nga wala nay kinabuhi nagbad-ay sa ibabaw sa panteyon nga ang katunga sa lawas duol sa iyang tiilan.
Unya nakabati si Victor og kagahob sa unahan. Kadali ra siyang nakabangon ug gisuhid ang dapit nga gigikanan sa kagahob. Maoy nasabak sa iyang panan-aw ang mga anino nga nanagdali pagpalayo. Mingkabad sila pagpanagan. Gipasundan silag mga bala ni Victor apan walay usa kanila nga napunggit. Gukdon unta ni Victor ang mga kaaway nga buot moikyas apan kalit nausab ang iyang hunahuna. Nabalaka siya nga basin malingla hinuon siya ug wala nay makapanalipod sa tulo niya ka kauban. Gipasagdan na lang ni Victor nga makapalayo ang mga kaaway nga mingtalaw.
Gibalikan ni Victor ang iyang napatay. Gitangtang niya ang gisul-ob niining maskara. Wala siya makaila sa maong tawo. Gilahos niya pagwalis ang sinina nga gisul-ob niini. Ug nakapanglingo siya. Maoy nabantang sa iyang panan-aw ang patik nga 666 sa bukubuko sa tawo. Wala gayod siya masayop. Sakop sa kulto ang iyang napatay.
Nakapangusmo si Victor samtang midali pagpaingon sa gitagoan nila ni Berto, Jimmy ug Belen. “Gawas na mo diha, Tiyo,” niya pa. “Wa nay peligro.” “K-kinsa man tong mga tawhana, Dong?” ni Tiyo Berto nga gihuwasan na sa kahadlok.
“Mga sakop gihapon sa kulto, Tiyo,” laktod niyang tubag. “Apan mingkakak pagkakita nga mihay-ad na ang usa nila ka kauban.”
“Mga salbahis gyod nang mga tawhana.” Mipahungaw sa kalagot si Belen. “Wala silay kalainan sa ilang supremo nga demonyo.”
Wala mahagtingog sila si Berto ug Jimmy. Ingon sila sa nasugsog sa gisulti sa dalaga sanglit nagpasakop man usab sila sa kulto.
“Dili ta magdugay dinhi,” nagkanayon si Victor. “Tingalig mamalik kadtong mga animal nga magdala nag daghang kauban. Mamiya na ta niining dapita.”
Ang tulo ingon sa nakaamgo gilayon nga dili pa sila hingpit nga luwas sa kakuyaw. Wala sila maglangan. Lagsik ang ilang mga lakang nga namaingon sa gawas sa sementeryo. Si Victor nga nagsunod kanila nagpanglingi sa ilang gigikanan aron pagsuta kon wala bay mga mata nga nagtan-aw kanila.
Sa didto na sila sa gawas sa sam-ang, mitawag si Victor sa kuwerpo sa kapolisan. Gipahibalo niya si Maj. Campo nga nakapatay na usab siyag laing sakop sa kulto.
PAGKAGABII, samtang gipahigayon ang pangadye sa kalag ni Marta, si Victor nagbantay sa tugkaran sa balay. Nagkalingaw siyag paso-paso. Matag karon ug unya ang iyang mga mata mosuhid sa palibot. Naniid siya. Gihugtan niya pagbantay ang seguridad sa mga tawo nga nanabat sa pangadye. Nanagana siya nga basin kalit lang motungha ang mga sakop sa kulto ug maghimog kadaot. Dili na niya tugotan ang mga disipulo sa Bangkulis nga makahimo pag dugang kadaot.
Kaganina sa wala pa magsugod ang pangadye, hilom niyang gisuhid ang mga tawo nga nag-ulhos pagpangabot pinaagi sa X-ray eyeglasses nga iyang gisul-ob. Gisuta niya kon wala bay mga sakop sa kulto nga nakasulod. Apan wala siyay nakitang timailhan nga may mga sakop sa kulto nga nahisagol kanila.
May sakyanan nga mihunong tungod sa gate nga puthaw. Mihunong si Victor sa pagpaso-paso. Gitan-aw niya ang awto nga nag-urong dili kaayo layo sa iyang gibarogan. Nasuta niya nga si Maj. Campo ang nahiabot kauban si Lt. Valera. Mingduol sila sa iyang nahimutangan. “Naugkat na namo ang patayng lawas sa sakop sa kulto nga imong gikasangka didto sa sementeryo,” mitaho dayon ang hepe kaniya. “Salamat, Dick,” ni Victor pa. Namatikdan ni Victor nga milili si Maj. Campo ngadto sa sulod sa balay.
“Nagsugod na man diay ang pangadye,” nagkanayon ang hepe. “Na- late hinuon mi, da. Unsaon, mitubag pa man mig laing alarma.”
“Laing alarma?” Nakasuna si Victor. Mingtingkag ang iyang dunggan sa ulahing gisulti sa hepe.
“Oo, Victor,” sa hepe pa. “May concerned citizen nga nanawag sa among buhatan, nagpahibalo nga may nakita siyang mga tawo nga katingad-an ang mga lihok sa luyo sa karaang buwangan. Sa pagtuo nga mga sakop sa kulto ang iyang nakita, giadto namo ang dapit nga iyang gitudlo. Apan dili diay mga sakop sa kulto ang nakita sa nanawag kanamo.”
Misamot pa kamangtas ang mga sakop sa Bangkulis Black Brotherhood…
“Unsa man diay, Dick?” naikag si Victor sa pagpakisayod. “Mga batan-on nga nag- pot session,” maoy tubag. “Nadakpan namo sila. Nakasulod na usab ang ginadiling droga dinhi sa Mabini. Ikaduha na kining higayon nga naka- recover og shabu ang kapolisan. Una kadtong gipatay didto sa plasa.”
Nahinumdom si Victor. Naatol kadto nga misuroy siya sa plasa dihang kalit may nagpinusilay. Ang nakabsan sa kinabuhi sa maong panag-engkuwentro nakuhaan sa kapolisan og pinutos nga shabu.
“Naglabad na kining akong ulo, Victor,” sa hepe pa nga mikulismaot ang dagway. “Nagsapaw na ang akong problema.”
“Wala pa ba ninyo imbestigaha ang mga batan-on nga inyong nadakpan?” Nangutana si Victor.
“Amo una silang gipapahulay,” maoy tubag. “Dili pa sila tarong ikaestorya tungod kay ilawom pa sila sa impluwensiya sa droga. Basin ugma sa buntag mahimo na silang imbestigahon.”
Igo lang miyango si Victor. Niining tungora, natapos na ang pangadye. Nag-ulhos pagpamauli ang mga nanabat human makapangape.
“Maayo tingali, Dick,” namulong si Victor pagkilab sa pipila ka daklit, “nga adto kita sa sulod magtiwas og sulti. Aron sab makapangape.”
Si Maj. Campo ug si Lt. Valera mingsanong sa pagdapit ni Victor. Nanulod sila sa balay.
Sa sala, gitibawas nila ang ilang panagsulti. Pulos bahin sa problema nga ilang giatubang ang ilang gihisgotan. Naputol lag makadiyot ang ilang panagkabildo dihang miabot si Belen nga naghatod sa tulo ka tasa sa kape ug tinapay. Pagbiya ni Belen, nagpadayon na usab silag kabildo samtang nangape. Ang kulto maoy dugokan sa ilang gipanagsultihan.
Milanat gayod og dugay ang ilang panagkabildo. Lapas na sa ikanapulog usa ang takna sa kagabhion sa pagpamauli nila ni Lt. Valera ug Maj. Campo. BUNTAG sa adlawng Martes. Sayo nga mibangon si Victor. Naligo siya. Gusto siya nga presko ang iyang kaugalingon nga moatubang sa iyang mga buluhaton. Ipadayon na niya ang paghimog imbestigasyon bahin sa kamatayon sa iyang mga ginikanan ug ingon man sa iyang iyaan. Nag-anam na karon kadako ang iyang pagtuo nga masulbad niya ang kaso nga iyang gigunitan sa higayon nga malumpag niya ang kulto nga naglihok sa lungsod sa Mabini.
Unsaon niya pagsikop ang mga Bangkulisan? Wala siya makaila kanila. Mao ray bugtong niyang nasayran nga may patik nga 666 ang mga disipulo sa Bangkulis. Apan lisod silang mailhan tungod kay kanunay silang magtakoban ug nagtago sa kangitngit.
Paggawas ni Victor sa banyo, diha na si Belen sa kosina, naghikay sa ilang pamahaw. Igo lang siyang mitimbaya niini. Milahos dayon siya sa lawak nga gipahigdaan kaniya. Samtang nagdangadanga na siya sa pultahan, iyang nabati nga nagbagting ang iyang cellphone. Midali siya pagsulod.
Apan mao gayoy pagkaputol sa pagbagting sa nakasulod na siya sa lawak. Nagsiga pa ang keypad ug screen sa cellphone nga gipatong sa ibabaw sa lamesita. Gipunit niya ang cellphone ug may gipislit-pislit. Buot niyang sutaon kon kinsa ang nanawag pinaagi sa pagsubay sa numero nga narehistro sa missed calls. Dako ang iyang pagtuo nga importante ang tuyo niini kay sayo man gayod kining nanawag.
Bag-o alang kaniya ang numero nga milutaw sa missed calls. Wala pa kini marehistro sa phonebook sa iyang cellphone. Dili niya sinati ang maong numero.
Giabot og kalibog si Victor. Nia na usab kining laing misteryo, niya pa sa kaugalingon. Kinsa na man usab kining nanawag sa iyang cellphone? Sakop usab kaha kini sa kulto? Kining maong mga pangutana gisukot ni Victor sa iyang kaugalingon. Napulos na lang kulto ang iyang hunahuna.
Gibalik ni Victor pagbutang ang cellphone sa ibabaw sa lamesita. Miduol siya sa nahimutangan sa salamin ug gisud-ong ang iyang kaugalingon. Milutaw ang iyang kaambongan karon nga bag-o siyang nakakaligo ug nakapamalbas. Giayo niyag huping ang iyang buhok atubangan sa salamin.
Wala pa gani siya makahuman og panudlay, nahaigking siya dihang kalit mibagting ang iyang cellphone. Midali siya pagpaingon sa gipatongan niining lamesita ug gipunit. Daklit nga gitamdan ang numero nga milutaw sa screen sa caller ID. Ang numero nga milutaw sa missed calls kaganina maoy nabasa niya sa screen. Gidali niya pagtubag ang tawag. Tingog sa lalaki ang iyang nabati gikan sa pikas tumoy. “Si Roding ni,” paila dayon sa nanawag. “Igsoon ni Jimmy.” “Uy,” tuaw ni Victor sa nakaila na. “Kaingon kog si kinsa. Tuod, nganong nanawag ka man? Komosta na kamo diha sa Carmen?” “May nahitabo diri, Mr. Foz,” laktod nga tug-an ni Roding. “U-unsa?” Nakugang si Victor. Namatikdan niya nga misugod pagkusog ang butok-butok sa iyang dughan. “U-unsang hitaboa?”
“Sila si Arlin ug Inday Shantal,” ni Roding pa, “gikuha kagabii sa wala namo hiilhing mga tawo.” (PADAYONON)