Ang Titser Ug Ang Drayber
UNANG semana sa Hunyo, nagsugod na ang tingklase. Diha na si Venus tungod sa gate sa ilang balay daplin sa karsada, naghulat sa traysikol nga gidrayban ni Kevin. Nagsul-ob siya sa ilang uniporme, blusa nga berde ug sayal nga itom. Usa na ka tuig nga ingon niini ang sitwasyon matag buntag basta tingklase na. Kapin sa usa ka kilometro ang gilay-on sa ilang balay ug sa publikong elementarya diin siya magtudlo sa grade three dinhi sa ilang barangay sa Nayawak. Taudtaod, miabot si Kevin. Sama sa naandan, way pasahero ang traysikol.
“Good morning, Ma’am Ven!” ni Kevin nga nagngisi, iyang t-shirt pula pinaresan sa karsones nga maong.
“Morning,” bawos ni Venus nga tam-is kaayog pahiyom. “Pirme ka alkanse ining gibuhat mo matag hatod ug kuha nako sa eskuylahan, Kev. Di man ka mopasakayg lain.”
“Duha ka pasada: usa sa buntag ug usa sa hapon
nga ikaw day pasahero… di pa na makapurdoy nako, Mam Ven,” ni Kevin nga milingi kang Venus nga nakapahiluna na sa front seat.
Gipaandar ni Kevin ang sakyanan. May mga tawo nga mipara sa traysikol ni Kevin, apan giwara-warahan sila ni Kevin, nagpasabot nga wa pa siya mamasahero. Ang uban hinuon nga nahibawo nga naghatod si Kevin kang Venus sa eskuylahan igo na lamang mingpahiyom.
Wala pa magsugod ang flag ceremony paghiabot nila sa eskuylahan.
“Moadto nya ko sa inyo karong gabii aron mahibawo ko sa dagan sa inyong pagpangandam,” ni Kevin dihang mikawas na si Venus. “Sige, paaboton tika.” Human sa klase sa buntag ug oras na sa pagpaniudto, gihikyad ni Venus ang iyang balon sa teacher’s desk aron mokaon. May pipila sab ka pupil nga nangaon sa ilang balon didto sa ilang lingkoranan. Gikan sila sa lagyo nga mga barangay nga kasikbit sa Nayawak ug ania magtungha dinhi kay way publikong eskuylahan didto sa ila, sa Kitalab, Orok, ug sa bungtod sa Ayali ug Wanal.
Dihang nakap-os na siya sa iyang pagkaon, miirag-irag siya sa iyang silya. Gipiyong niya ang iyang mga mata ug may gihandom.
Traynta anyos na iyang edad. Mao kini ang panuigon nga iyang gisaad sa iyang kaugalingon nga magminyo na siya. Dili siya buot nga tawgon unya sa iyang mga silingan og ‘tiguwang dalaga’ kay ‘milapas na sa kalendaryo’ iyang edad o ‘nabiyaan na sa tren.’ Sukad-masukad, wa pa siya katilaw og uyab-uyab kay wa man poy maingon nga misuway pagpanguyab niya sa tinarong. Tungod kini kay yano ra siyag panagway ug pamayhon, naigo sa pagya nga ‘daghan ingon niya sa Carbon.’ Puruko siya nga pagka babaye kay lima ka tiil ra iyang gitas-on ug tambokon. Diha hinuoy higayon nga si Atong nangulitawo kaniya, apan wa niya sugta kay kini palahubog ug dali rang magmaoy. Duna kiniy trabaho kay utility worker sa munisipyo sa ilang lungsod. Ug nahibaw-an ni Venus nga nanguyab niya si Atong kay gisulsolan sa iyang mga barkada nga nagpustaanay pa.
Unya gikaila niya si Kevin nga taga Nagihinab. Mag-uuma ang ginikanan ni Kevin sa kaugalingon nilang yuta. Gradwado siya sa hayskol ug baynte anyos ang panuigon. May manghod si Kevin nga babaye, si April Joy nga tua magtungha sa CTU-Argao sa kursong agriculture, major in soil. Yano ra sab og panagway si Kevin, 5’7” ang gitas-on apan may pagka daot. Seryoso ang ulitawo nga mihalad sa iyang gugma kaniya. Sa tambag sa iyang Mama Unyang ug Papa Eliyas nga angay kaniya si Kevin kay buotan ug kugihan, ug kay gitugkan sab siyag gugma niini, gisugot niya ang ulitawo. Mao nga sa minglabayng unom ka bulan, human sa pamalaye, natakda ang ilang kasal sa kataposang Sabado sa Hunyo. Ug nabaniog dayon sa tibuok Nayawak nga si Ma’m Venus, ang titser, ug si Kevin, ang traysikol drayber, kaslonon na.
Usa ka hapon niana nadelatar si Kevin pagkuha kang Venus sa eskuylahan. Mingaw na ang palibot sa eskuylahan, kay basta mahuman na ang flag retreat dali ra kaayong mangawagtang ang kabataan, lakip sa mga magtutudlo. Sama sa naandan diha sa iyang lamesita maglingkod si Venus samtang naghulat kang Kevin. Wala pa niya serad-i ang pultahan sa klasrom kay mao may iyang naandan nga seradohan kini kon mobiya na sila si Kevin. Kilumkilom na, apan wala pa moabot si Kevin.
Gibati siyag kabalaka. Basig dunay daotang nahitabo kang Kevin. Mikuba-kuba ang iyang dughan. Wa kaha mabanggai ang traysikol ni Kevin sa tourist bus o trak de karga? Lord, ayaw intawon itugot nga may daotang mahitabo sa akong pamanhonon! nakatuaw si Venus.
Ngiob na ang klasrom ni Venus. Wala man niya pasigaa ang bombilya. Kalit may tawo nga misulod sa lawak. May diyotay pang kahayag milusot sa pultahan. Ug naklaro pa niya ang tawo nga misulod. Itom ang t-shirt niini ug maong ang purol.
“Atong, unsay ipasabot niini?” singka ni Venus sa tawo nga sa iyang tan-aw nakainom. Mitindog siya gikan sa silya ug nangandam kon unsay buhaton ni Atong kaniya.
“Hehehe! A-Ayaw kahadlok, M-Ma’m. Di k-ko i-ikaw u-unsaon. G-gusto lang ko mogakos ug m-mohalok n-nimo!” ni Atong nga nagkanguhal ug miisa sa iyang tuong kamot nga nagagunit og baraw. “Ay lab yu beri mats, Ma’m!”
“Ayg tinonto diha, Atong, ha! Hapit na ra ba moabot si Kevin aron kuhaon ko!”
“A-yy k-kogg hadlokkkaa!” Miduol si Atong kang Venus ug migunit sa bukton sa maestra samtang nagtion sa baraw sa dughan niini. “P-Patyonnn kko siya! Ikaw sab, M-Ma’m, ayaw pagsinggit aron di motaop sa imong liog king baraw! P-Patyonnn t-tika kon di ka mosugot sa akong g-gusto k-karon.”
Walay nahimo si Venus. Gipasagdan na lang niya nga migakos si Atong sa iyang lawas ug mihalok sa iyang aping. Apan dihang midapat sa iyang mga ngabil ang mga ngabil ni Atong, iya kining gipaak taman sa ginhawa.
“Agay! Aroy! Aguy!” Nakasiyagit si Atong nga gisakitan. Nabuhian niini ang baraw. Mao usab ang pag-abot ni Kevin nga naghangos. Miduol si Venus kaniya ug mitug-an nga buot siyang lugoson ni Atong. Giduol ni Kevin si Atong ug gikulata.
“Buang ka, ha!” ni Kevin nga mibinaklid kang Atong nga nagpunay og pangluwa sa dugo ug laway.
“Ngano diayng nadelatar ka, Kev, pagkuha nako?” ni Venus nga migunit sa bukton ni Kevin.
“Gipakyaw ko ni Nong Melyong nga naghatod og duha ka tarong tuba sa lungsod,” tug-an ni Kevin. “Dugay ming nahibalik dinhi sa ato.”
Didto sa ganghaan sa gate sa eskuylahan gitugyan ni Kevin si Atong sa duha ka barangay tanod nga minglabay. Misakay sa frontseat si Venus sa traysikol ni Kevin. Nanakay sab ang mga tanod uban ni Atong sa traysikol aron adto didto sa barangay hall kuhaan silag impormasyon bahin sa gihimo ni Atong kang Venus.
ANG simbahan ni Santa Monica sa Nayawak nagsugwak sa katawhan nianang buntag sa kataposang Sabado sa Hunyo. Buot silang mosaksi sa kataposan sa kaagi sa usa ka talagsaong sugilanon sa gugma sa usa ka magtutudlong dalaga nga hapit na ‘mabiyai sa tren’ ug sa iyang pamanhonon nga usa ka drayber sa traysikol, nga manghod niyag napulo ka tuig.
Nianang pagkagabii didto sa iyang lawak, si Venus wala na mag-inusara. Diha sa iyang tupad ang unang lalaki nga iyang gihigugma.
“Ma’m Ven, gihigugma ko, ikaw!” hunghong ni Kevin. “Higugmaon ko ikaw hangtod sa akong kamatayon.”
“I love you, too, Kevin! Till death do us part,” bawos hunghong ni Venus nga hugot migakos sa iyang bana.
(KATAPOSAN)
Dili babag sa ilang gugma ang ilang isigkakahimtang…