R52 MILYONES NGA NABAWI GIKAN SA MAUTE GIPANAG- IYA SA NEGOSYANTENG MARANAW

SUMALA sa labing ulahing taho nga nakalap sa TNB, giingon nga ang P52 milyones nga cash nga nabawi sa mga sundalo sa kagamhanan gikan sa hideout sa Maute terror group sa Marawi City, gipanag-iya kuno sa usa ka negosyanteng Maranaw.

Miingon si Lt. Gen. Carlito Galvez Jr. sa Western Mindanao Command nga nakakuha og impormasyon ang military ug police intelligence nga ang balay nga giestaran sa mga armadong grupo gipanag-iya sa magtiayong Rolly ug Mariam Dimaucor.

Aduna kunoy construction firm ang magtiayon pero ang ila nang mga anak ang nagdumala sukad nga nangamatay na sila (Rolly ug Mariam).

Gikompirmar usab sa Department of Public Works and Highways sa Regions 10, 12 ug Autonomous Region in Muslim Mindanao nga may mga kontrata ang pamilyang Dimaucor sa gobyerno.

Dugang report nagkanayon nga adunay usa ka abogado sa Central Mindanao nga mibutyag nga ang mga tseke ug cash nga narekober sa 7th Marine Battalion alang kuno sa usa ka contractor.

Kahinumdoman nga sa gipahigayon nga ‘house to house search’ sa tropa sa Philippine Marines, nakarekober sila og P79 milyones nga cash ug tseke sa hideout nga giabandonar sa Maute-ISIS. Kini naglangkob sa P52M cash ug P27M nga tseke. Kining impormasyon gibutyag ni Brig. Gen. Rolando Bautista, Commander sa Joint Task Force sa Marawi City.

Ang nahisgotang kas ug tseke gi- turned-over sa Philippine Marines ngadto sa Joint Task Force Marawi alang sa safekeeping.

Sa sayo pa ang maong kas ug tseke gidudahang naggikan sa duha ka banko sa Marawi City nga giransak sa Maute sa dihang misulong kini sa nahisgotang siyudad.

“In contrast, the Maute-ISIS/Abu Sayyaf Group (ASG) vandalized, looted and burned school buildings, hospital rooms, houses and destroyed many properties in Marawi,” matod ni Bautista.

Miangkon si Año nga hasta siya nahibulong kon diin naggikan ang maong kuwarta ug tseke. Ug ang kadaghanan sa P27M nga tseke mga ‘pay to cash’.

Gipaimbestigahan sab ni Año kon gikan ba gayod kini sa Maute group o sa lehitimong negosyante ba lang kaha nga nagpuyo sa nahisgotang dapit.

Sa paghikay ning balita nagpadayon pa ang operasyon sa tropa sa militar aron taposon ang krisis sa Marawi nga nagsugod niadtong Mayo 23 ning tuiga human nga ming-atake ang gibanabanang kapin sa 100 ka armadong terorista sa maong dakbayan kinsa mingsunog sa mga establisimento, nanghostage ug mingpatay og mga sibilyan partikular na sa mga Kristiyano.— TNB