YASMIEN KURDI

PABILING MALIG-ON SA DAGHANG MGA PAGSULAY

NAGKAUBAN pag-usab ang managkauban sa “Starstruck” nga sila si Mark Herras, Yasmien Kurdi ug Katrina Halili nga dungan nga nailhan kaniadto sa kinaunahang season sa pag-ugda sa tulumanong nagkaplag sa talento sa pag-arte sa GMA Network. Nadughit ni Yasmien ang puwestong first runner-up ug nakuha niya ang titulong Philippines’ Pop Sweetheart sanglit hanas siya isip sakop sa junior choir sa ilang simbahan sa Iglesia ni Kristo.

Maoy ilang gipanag-ubanan ang teleseryeng “Sa Piling ni Nanay” sanglit daghan kanila ang wala niya ikauban sa mga teleserye ug ubang pasundayag sa telebisyon ug pelikula. Kining maong teleserye gisugdan sa pagpasundayag sa miaging tuig nga milungtad hangtod niining tuiga.

“Nangingibabaw ‘yung saya sa akin kasi, siyempre, alam kong kaibigan ko ‘yung mga kasama ko at close rin talaga ako sa kanila. At the same time, may excitement rin na magkakasama kayo sa project na napakaganda ng story,” matod ni Yasmien.

Dugang pa niya,“Siyempre, kinakabahan rin kasi alam mong nagmature kayong lahat. Minsan, naiisip ko, nasaan na kaya ang kakayahan nila? Tapos magugulat na lang ako on-set.”

Sumala usab kang Mark, “Kahit na heavy drama ang pagbibidahang teleserye, magiging mas madali ang taping dahil malalapit na kaibigan niya ang mga makakaeksena.”

Agig pagtin-aw sa aktor: “Nakakatuwa kasi hindi namin kailangang mag-adjust sa isa’t isa o mangapa. Working with Kat and Yas, ginagawa lang namin ang tama. And after the scene, hindi na kami magkakailangan sa taping.”

Apil sab sa “Sa Piling Ni Nanay,” sila si Nova Villa, Antonio Aquitania, Bettinna Carlos, ug daghan pang ubang mga artista.

Kon ugkaton ang nangagi sa iyang pagkatawo, andam ang aktres nga moatubang og hagit, ug lagmit ang hinungdan mao nga gipanganak siya nga Muslim ang iyang amahan, si Mike Kurdi, samtang ang iyang inahan, si Miriam Ong-Yuson nga sakop sa Iglesia ni Kristo. Kaliwat siya og French-Lebanese sa bahin sa iyang amahan ug Insek-Pilipino sa iyang inahan.

Nagdako siya didto sa Kuwait tungod sa trabaho sa iyang amahan ug bisan sa panahon sa Gulf War, didto ang iyang pamilya. Pagbalhin sa Pilipinas, sa San Juan na siya nanimuyo. Nahuman niya ang iyang elementarya sa Jabriya Indian School apan ang iyang high school ug kursong nursing, nahuman niya sa New Era University. Sayo sa iyang karera sa showbiz, nahimo siyang modelo sa Candy, Seventeen ug MOD Magazine. Usa sab siya ka finalist sa ASAP Pond’s Soft Skin Search sa ABS-CBN diin napilde siya sa Jaboom Twins. Sa iyang pagka mag-aawit nga mahibalo usab nga mokompos og kanta, nakapagula na si Yasmien og duha ka album. Ang una niyang album nga may titulo nga “In The Name of Love” gipagula kaniadtong 2006 nga sa kadaghan sa namalit, naka- platinum kini, samtang sa misunod nga tuig (2007), ang ikaduha niyang album nga “Love Is All I Need,” mas mihalin pa kay naka- gold man. Kahinumdoman nga sa iyang pagkaartista, may mga hitabo nga dili unta siya angay nga manginlabot. Sama sa kampanya sa PETA sa pagtabang sa mga hayop, mibulig siya niini lakip sa panawagan kaniadto sa pagbuhi sa elepante sa Manila Zoo nga nagpuyo nga naginusara sulod sa upat ka dekada sa gamay kaayong lugar nga walay igong pagatimang medikal. Si Yasmien daklit nga mibiya sa pagka artista aron sa pagpadayon sa pag-eskuyla ug pag-atiman sa iyang pamilya human maminyo kang Rey Soldevilla nga usa ka piloto ug taga Zamboanga. Apan mibalik ra siya sa showbiz sa tuig 2013 human makapanganak kang Ayesha Zara. Sa miaging tuig, naeksamin siya sa doktor nga adunay hubag sa ubol-ubol nga nakaapekto sa iyang tingog sa pagkanta. Gitakda nga operahan si Yasmien aron sa pagtangtang sa hubag apan nakapabalaka sa aktres ang giingon sa doktor nga walay kasegurohang mahibalik sa normal ang iyang tingog ug kini iyang giampo nga unta magpabiling mao sa gihapon.—