LA LUNA SANGRE – BAG-ONG TELESERYE SA KAPAMILYA NETWORK

GISUGDAN na pagpasundayag adtong Hunyo 19 ang talagsaon ug labing makapaukyab nga teleserye dili lang sa mga artista nga nangapil kondili sa matang sa kasaysayan nga pantasya nga hupong sa aksiyon ug horror nga drama nga gipangunahan nila ni Kathryn Bernardo, Daniel Padilla, Angel Locsin, Richard Gutierrez, John Lloyd Cruz ug uban pang sikat nga mga artista nga ubos sa direksiyon ni Cathy Garcia-Molina.

“Comic relief with a cause!” Kana maoy papel nila ni Randy Santiago, Gelli de Belen ug Joross Gamboa sa “La Luna Sangre,” sa teleserye sa KathNiel loveteam.

Gawas kanila, kadiyot usab nga mahimong bida sila si Angel Locsin ug John Lloyd Cruz (nga lagmit mawagtang lang usab ang ilang karakter).

“This is your kind of story na full of surprises. May mga lilitaw at lalabas na mga karakter na imposible ninyong iisipin na puwede pala. But basically, this is KathNiel’s story. Hindi puwedeng alisin ang rom-com element kahit na fantasy-actionthriller-horror ang La Luna,” maoy patin-aw ni Direk Cathy Garcia-Molina nga inayudahan sab sa pagdirehir ni Direk Richard Arellano.

Matawag nga mao kiniy kinadak-ang proyekto sa KathNiel loveteam sa telebisyon. Hisaksihan niining maong teleserye kon unsa kahanas usab diay si Daniel sa aksiyon uban kang Kathryn.

Ang uban pang bituon nga kauban sa teleserye mao sila Isabelle Daza, Ina Raymundo, Lexi Fernandez, Sam Pinto, Victor Neri ug daghan pang ubang mga artista.

Niining usa ka dakong teleserye, labaw nga sundan ang batan-ong loveteam nga giubanan sa daang sikat nga loveteam nila ni Angel Locsin ug Richard Gutierrez sa didto pa sila sa Kapuso Network.—