Kon Mahurot And Isda sa Dagat
(Gula 11)
SI Londoy porsoso niyang ig-agaw kay managsoon ang ilang isigkaamahan. Dakong tawo ug isog, maong gikuha kining barangay tanod sa ilang kapitan. Kasaligan usab kay adunay pangamot nga dili madali-dali kon atubangon lang sa pagpakigaway. Nagtuo si Ecolboy nga kini maoy saktong ikasakbang sa badigard ni Erwin nga, iyang gituhoan, sakto usab sa abilidad kay gikuha man sa iyang karibal para maoy mohipos kaniya. Kon mosugot kini, patas ang laban nila ni Erwin.
Nianang pagkahapon, giadto niya si Londoy sa Dawis diin kini nagtrabaho sa fishpond isip tigbantay. Hinuon, dili sa tanang panahon kini magbantay, maong makalugar kini pagsuroysuroy. Didto sa morag cottage sa tumoy sa paril sa fishpond, nakit-an kini ni Ecolboy nga naglulingkod paatubang sa dagat.
“Unsay gilantaw nimo diha, Gaw?” unang sangpit ni Ecolboy.
“Lantaw-lantaw ra sa dagat, Gaw. Wa may lingaw,” dayong tarong og lingkod ni Londoy
paatubang sa ig-agaw. “Nasuroy man, Gaw?” “Ikaw gayod ang akong tuyo, Gaw!” “Yati ra, morag importante man.” “Importante gayod kaayo. Pero maayo tingali nga adto ta magestorya sa tindahan nilang Nita.” Ang tuyo ni Ecolboy nga maginom sila samtang mag-estoryahay.
Ang tindahan ni Nita dili kaayo layo kay anaa ra sa pundok sa kabalayan sa may entrada sa punong. Nag-order si Ecolboy og usa ka lapad nga Tanduay 65 nga maoy kinaham nilang ilimnon.
“Unsa bang importantehang tuyo nimo, Gaw?” ni Londoy human unahig tagay ni Ecolboy.
Gipaigot una ni Ecolboy ang pagsugilon. Diha na siya mosugod sa dihang nakainom na si Londoy ug human mitagay para sa iyaha nga wala dayon niya imna.
Gisugod og sugilon ni Ecolboy pinaagi sa pagpangutana kon nakakita ba si Londoy kang Erwin ug mitando kini. Dayon gisugilon ni Ecolboy ang tanan, lakip na ang hapit nga panag-engkuwentro didto sa Jollibee ug hangtod sa pagpahibalo ni Perla bahin sa badigard ni Erwin.
“Mao na, Gaw, nagkinahanglan sab kog akong ikauban-uban para mabanta ang badigard ni Erwin.”
Nakasabot dayon si Londoy sa tuyo sa iyang ig-agaw. “Way problema na, Gaw. Ako maoy mouban-uban nimo. Kanus-a ta magsugod?”
“Karong gabii, Gaw. Ato una silang panid-an kay wa pa ko kakita nianang badigard.” “Sige, kay mag- roving man mi kada gabii. Hapiton tika sa inyo.” Usa ka lapad ra ang ilang nahurot ug dayon nagbuwag ang magagaw.
Samtang didto sa Queen’s Castle, gihingpit nilang Erwin ug Jimboy ang ilang plano nga nianang gabhiona magsugod usab sila.
“Mosuroy kita karong gabii kay aron makita nimo, Jimboy, ang imong target,” maoy pasidaan ni Erwin.
“He-he, gimingaw na ang akong mga tudlo, Boss, kay dugay nang wa makapitik og gato.” Nagngisi pa si Jimboy.
“Mga ugma na tingali ka mobira kay karong gabii maoy pag-ilaila una. Naseguro ko nga mosuroy kana siya. Kon dili gani mosuroy, atong paatbangan sa ilaha. Dayon moadto ta sa ilang Nora. Adto ta magpalabay sa oras. Maoy pag-ingnon, relaks una ta.” “Aw, agad-agad ra ko nimo, Boss.” “Win, maayo tingali nga manglakaw lang ta padu’ng sa ilang Nora kay aron gayod seguro nga makit-an nato si Ecolboy,” sugyot ni Tony. “Unya di ba layo ang atong lakton?” “Magsakay ta gikan dinhi ug atong ibilin ang mga motorsiklo sa guardhouse.”
“Husto! Kay duol ra mang lakton ang ilang Nora gikan sa guardhouse.” Nakapahiyom si Erwin. “Basin tuod og masugatan o maagian ba nato si Ecolboy.”
Sayo nga nanihapon si Ecolboy kay aron magpaabot na lang siya kang Londoy. Igo gayod nga mihugpa ang kangitngit sa palibot ug nanuga na ang kabalayan, lakip na ang streetlighting sa barangay, miabot si Londoy nga nagdala sa hitsas para sa roving: batuta, flashlight ug camouflage nga jacket.
Nagkuyog ang mag-agaw padu’ng sa headquarter sa mga tanod. Anaa kini mahimutang sa kilid sa barangay hall diin sa unahag diyotay anaa ang gate sa golf course. Gitan-aw ni Londoy ang detail para sa mga tanod.
“Nia ko ma- assign, Gaw, dinhi sa headquarter. Dinhi lang ta maglingkod-lingkod sa pultahan. Unsa, magduwa lang tag dama?”
“Maayo hinuon, Gaw, kay basin mogawas sila karon ug anhi sila moagi dinhi,” ni Ecolboy dayong lingkod sa bangko diha sa pultahan sa headquarter.
Gipagawas ni Londoy ang damahan ug gipahimutang sa kilid ni Ecolboy. Nag-atubang ang duha, si Ecolboy maoy nag-atubang sa dapit nga guwaanan sa maggikan sa gate sa golf course samtang si Londoy maoy nagtalikod. Gipahimutang ni Ecolboy ang mga pitsas sa damahan. Ug samtang nagdula, magsigeg tan-aw si Ecolboy sa karsada.
Kalit nga gikulbaan si Ecolboy sa dihang, binanwagan sa sugang dagitabnon gikan sa poste sa may gate sa golf course, adunay tulo ka anino nga minggawas sa gate ug mingsubay sa karsada. “Gaw, mao na tingali ni sila,” niya pa. Mitarong paglingkod si Londoy aron maatubang sa karsada. Diha sa atbang sa headquarter adunay laing poste sa sugang dagitabnon ug maklaro gayod ang mga tawo nga mangagi. Mao usab sila si Ecolboy, maklaro usab gikan sa karsada.
“Si Erwin kanang naa sa daplin, Gaw, kanang dapit nganhi, ug ang naa sa tunga mao tingali kanang badigard niya. Kay kanang naa sa daplin, si Tony na.” Hinay apan pinahimutang ang pagsulti ni Ecolboy. “Dako tuod og lawas, Gaw, kanang naa sa tunga.” “Pero sa akong tan-aw, di man mo maglayo sa gidak-on.” “Aw, unsa, Gaw, akong sugaton?” “Yaw una, Gaw, kay bag-o pa natong nakita. Ato unang panidan.”
Pag-agi nilang tulo sa headquarter, nahalingi si Tony sa duha nga nanglingkod. Gikablit niya ang kilid ni Jimboy nga nakapalingi niini kang Tony. “Naa siya, Jimboy!” ni Tony nga mihunong. Si Erwin, inay adto molingi sa nahimutangan sa duha, didto hinuon motan-aw kang Tony. Si Jimboy, gikan milingi kang Tony, mibali sa panan-aw ngadto sa gipasabot ni Tony. Mao pa motan-aw si Erwin.
“Mao na, Jimboy, ang atong tuyo. Kanang naa sa atong wala nga nagtakilid paglingkod paatubang kanato,” ni Erwin nga mihunong usab.
“Unsa, Boss, ato nang birahan kay morag mikatol ang akong kamot,” ni Jimboy nga naghiram sa iyang .45. Sa unang pagtan-aw, gipatik dayon sa iyang alimpatakan ang nawong ni Ecolboy.
“Yaw, una kay naa siyay kauban. Basig tanod kay nia man sa headquarter sa tanod,” pugong ni Erwin. “Padayon lang una ta.”
“Unya, Jimboy, nakuha na nimo ang imong target?” ni Erwin sa dihang nanglakaw na sila sa unahan.
“Kuha na, Boss, anad god ta sa buwangan. Lisod pa to kay daghang tawo, kini pang usa ra.” Samtang sila si Ecolboy ug Londoy… “Kon wa pa ka mopugong, Gaw, ako na tong giduol. Ako ra god tong rekisahon, basig dunay armas,” ni Londoy nga minunot og tanaw sa tulo.
“Sagdi lang, Gaw, total ang atong tuyo mao ra man ang pag-ilaila una. Unsa, nakatimaan ka na niya?”
“Di pa kaayo. Pero basta naay dakong tawo nga di kaayo nato kaila, mao na kana. Kaila man nato ang tanang tawo dinhi.” “Gaw Londoy, maayo tingali nga duna sab kay armas. Wa ba moy sakada sa inyo?”
“Batuta ra gyod ning among armas, Gaw. Pero sagdi lang kay mangandam ko. Duna man toy inembargo nga paltik, ako lang tong gamiton.” “Lagi, Gaw, lisod kaayo kon mag- roving mo nga way armas.”
(PADAYONON)
Isig-amping sila, isigpangita og paagi unsaon nga di malipat niining alibhat sa panagribal sa gugma ni Nora…