MAHIMONG MAKIGPARTNER SA PAGPAMUHI OG KARNERO
ADUNAY usa ka pamaagi aron ang usa ka walay alamag sa pagpamuhi og karnero mahimong makigsosyo na lang sa gitawag og Sheep Farming Partnership nga gitanyag sa Novatech Food Industries nga gipangulohan ni Dr. Ronald Sumaoang.
Sa iyang pagtuon sa nanglabayng katuigan, matod ni Dr. Sumaoang nga may igo na siyang kahibalo sa hustong pag-atiman sa karnero nga gamitan sa kaugalingon niyang pormula nga fermented nga lawog kun silage nga gipaabunda sa sustansiya pinaagi sa paggamit og mga mahigalaong mikrobyo. Si Dr. Sumaoang usa ka ilado nga microbiologist nga nagtuon sa Alemanya ug daghan na siyag kasinatian sa paggama og sustansiyadong mga lawog sa mga hayop nga gigamitan sa iyang teknolohiya.
Sulod lang sa pipila ka tuig nga namuhi siya og mga karnero gikan sa pipila lang ka ulo, aduna na siya karoy kapin sa 300 nga gipasanay nga mestisong karnero nga padayon pang gipalambo ang matang. Pipila pa lang ka buwan sukad gilusad ang Sheep Farming Partnership apan aduna nay pipila nga mingsalmot sa proyekto. Ingon niini ang sistema: Ang usa ka imbestor mopalit og kawhaan (20) ka bayeng karnero ug usa (1) ka toro nga nagkantidad og P215,000. Dili kuhaon sa imbestor ang hayop. Adto kini ipabilin ubos sa pag-atiman ni Dr. Sumaoang aron siya na ang bahala sa tangkal ug paggalam. Siya ang mopakaon ingon man motambal kon gikinahanglan. Ang buot ipasabot, wala nay laing buhaton ang imbestor human siya mopalugwa sa iyang kuwarta. Magpaabot na lang siya sa iyang bahin sa kinitaan.
Paanakon ni Dr. Sumaoang ang mga karnero ug ang mga anak bahinon sa Novatech ug sa imbestor. Tunga sila. Ang bahin sa imbestor mahimo niyang kuhaon ug atimanon sa kaugalingong farm. Kon dili sab, mahimong paliton sa
Novatech ang tulo ka buwan nga nati sa kantidad nga P3,000 ang ulo. Aduna pay laing opsiyon. Mogarantiya ang Novatech nga bayran ang imbestor og 25% sa iyang puhunan kada tuig kon buot niya. Ang buot ipasabot, mabayran ang imbestor og P2,500 kada P10,000 nga puhunan kada tuig. Ang partnership matapos human sa tulo ka tuig.
Kon buot sa imbestor, mahimo niyang kuhaon ang 20 ka gatasan ug usa ka toro human sa tulo ka tuig. Kon dili sab, mahimong bayran siya sa Novatech og 80% sa kantidad sa iyang orihinal nga gipuhunan.
Atong balikan ang garantiyang mobayad og 25% sa puhunan matag tuig. Ang buot ipasabot nga kon kini ang pilion sa imbestor, makadawat siya og P53,750 matag tuig sa iyang gipuhunan nga P215,000. Sa tulo ka tuig, ang kinatibuk-an niyang madawat anaa sa P161,250. Idugang nato ang 80% nga kantidad sa iyang gipuhunan nga bayad kaniya sa mga karnero nga ibilin niya sa Novatech. Ang 80% anaa sa P172,000. Kon sumahon ang duha ka kantidad, moabot kini og P333,250. Ang buot ipasabot nga ang P215,000 nga gipamuhunan nahimo nang P333,250 sulod sa tulo ka tuig.
Kini ang nahunahunang proyekto ni Dr. Sumaoang aron paspas nga mapasanay ang karnero sa atong nasod. Lamian ang karne sa karnero ug mas daling atimanon tandi sa ubang hayop. Kon daghan na ang produksiyon, pananglitan aduna na siyay 2,000 nga manganakay, mahimo na siyang motanyag nga mosuplay og karne sa karnero nga adunay espesyal nga cut ngadto sa dagkong supermarket. Sa iyang banabana, dali na lang ang pagtanyag sa SM Supermarket niining iyang nahunahunaan sanglit aduna na siyay duha ka produkto nga gigama alang sa mga produktong Bunos sa SM.
Sa susamang kalamboan, nakiglambigit na si Dr. Sumaoang sa grupo nila ni Eugene Gabriel nga nagsuplay og mga makinaryang gamit sa panguma. Kinahanglang mamechanize ang paggama og silage nga lawog sa mga hayop sulod sa tibuok tuig.
Pinaagi sa grupo ni Eugene Gabriel nga Agri Component Manufacturing Corp., mahimong traktora ug ubang makinarya na ang moandam sa yutang talamnan. Makina usab ang moani sa mga dagami sa mais ug uban pang lawog. Makina usab ang gamitong shredder aron paspas ang paghimo. May makina usab sila si Gabriel nga maoy mosulod sa sako sa silage sa modernong pamaagi.
Dako ang pagtuo ni Dr. Sumaoang nga pinaagi sa pagtinabangay sa duha ka grupo, mas mapadali pa ang pagpakatap sa pagpamuhi og karnero sa atong nasod.—