KAMALIG: GILUSAD ATOL SA SUICO CLAN REUNION 2017

UNTOP alas diyes s.b. gihalad ang Santos nga Misa sulod sa gym sa St. Therese School of Bato sa lungsod sa Bato, Leyte.

Si Padre Noel Suico Tatoy, akong apo-sa-pag-agawan nga bag-ohay pa lang giordenahan sa pagka pari niadtong Oktubre 24-25, 2016, maoy mipahigayon sa pagsaulog sa Santos nga Misa.

Tapos sa misa, gisunod dayon ang paniudto. Way nagmahay o nagmulo kay ang tanan pulos busog. Tiaw bay tulo ka inasal, usa ka baka ug nagpa- cater pa gayod. Ang ilimnon way limit. Ang presidente sa Suico Clan Reunion nga si Bebe Bernardo Suico ug kapikas nga si Gingging maoy mihatag og baka ug usa ka sakong bugas.

Gibuksan gilayon ang tulumanon

nianang ala una sa palis pinaagi sa pagpatokar sa atong Nasodnong Awit gikan sa Avenido Siblings Sound. Unya gisundan usab dayon sa maabiabihong pakigpulong ni Atty. Louie Suico (akong pag-umangkon-sa-pag-agawan), ug maoy municipal administrator sa lungsod.

Sa parade of branches, gipangtawag ang matag grupo sa mga anak ni Tatay Bruno Ceniza Suico ug ingon man ang mga kaliwat ni Macario Ceniza Suico, laing igsoon nga tua na nanimuyo sa Brgy. Baas, Hilongos, Leyte.

Unang gitawag ang banay ni Numeriano, dayon kang Pedro, Jeremias, Fidela, Prima, Rufina ug Ambrosio nga namungingi sa daghang apo ug apo-sa-tuhod.

Sunod nga gitawag ang kabanay ni Macario pinangunahan ni Remegio, Perpetua, Edilberta, Artemia ug Daprosa nga mingsanay pag-ayo didto sa Baas, Hilongos, Leyte sikit sa lungsod sa Bato. Silang sangaha sa kaliwat medyo ulahi namong nadiskobrehan. Gumikan lagi niining reunion, nautingkayan ang laing kabanay. Ug gipaabot sa sunod reyunyon puhon sa 2019 nga mopatim-aw pa ang laing igsoon ni Tatay Bruno.

Ang kasaysayan niining Suico Clan didto nahimugso sa Dakbayan sa Tagum (lungsod pa kaniadto). Gisugdan kini nila ni Magtutukod ( founder) Lydia Suico Salon (akong ig-agaw igtagsa) nga mao usay pinanser kauban ang walo ka organizer nga sila si Edna S. Buagas (PSK), Teody S. Salon ug Elma S. Perandos (mga anak ni Lydia); Victoria P. Piloton, Alan Piloton (PSK), Maximar Suico, Julius Suico, ug Ma. Grace M. Suico (akong mga pag-umangkon).

Ang amahan ni Lydia, si Numeriano, maoy ilang gipasidunggan ug magreyunyon sila matag tuig sa Tagum, Davao; Nasipit, Agusan; ug sa Isla sa Dawahon, Bato, Leyte.

Apan ang walo ka organisador, uban ni Lydia, nagkasabot nga adto isukad kang Tatay Bruno ang ilang pagpasidungog aron ang tanang mga anak ug mga apo magkahiusa ug magkahimamatay ilabi na kanila nga tua na (ang kadaghanan) nanimuyo sa probinsiya sa Davao.

Ug sa Enero 26, 2011, liwas sa pista sa Bato, gihimo ang unang Suico Clan Reunion sa kabanay ni Tatay Bruno C. Suico. Ang ikaduha sa Bato gihapon sa tuig 2013, sa tuig 2015 (ikatulo) sa Tagum City, ug ning 2017 balik sa Bato, ug sa umaabot 2019 gikatakda nga ang mo- host mao ang Dakbayan sa Mandaue.

Sa dihang gitawag ang akong ngalan aron ilusad na ang akong libro o basahon nga “Kamalig”, wa ko maglangan duyog sa tokar

sa Avenido Siblings, gitukas ko ang tabon nga nagtabil sa gibutangan sa mga basahon dayong pamakpak sa mga nanambong.

Daghan ang nangutana og unsa ang “kamalig”. Gipasabot ko sila unsay anaa sa kamalig— inani nga humay ug sinanggi nga mais kay kining kamalig hiposanan man sa abot gikan sa yuta. Apan nagkahanaw na karon ang kamalig kay ang kadaghanan ibaligya na man nila nga anaa pa sa gianihan. Gidugang ko sa pagpasabot kanila nga anaa sa Pasiuna ni Brad Roger Pono ang dugang katin-awan.

Sunod kong gipasupot ang akong pahinungod ug pasalamat sa akong asawa, mga anak ug mga apo. Gipasalamatan ko usab ang tanang magbabasa sa Bisaya Magasin nga nahimuot sa akong mga sinulat ingon man sa pipila nga mingsulat gayod kanako, mga magdadayeg ug magdadasig nga gikan sa Davao, Surigao, Negros Oriental ug Occidental, Bohol, Leyte ug Cebu.

Dugang pasalamat gipahinungod ko kang Dr. Hope Sabanpan Yu, associate professor sa Department of Languages and Literature sa University of San Carlos diin nahilakip ako sa kawhaan ug upat ka magsusulat nga naglangkob sa basahong “Kulokabildo”, proyekto ni Dr. Yu sa iyang mga estudyante.

Ngadto usab kang Higaladagang Marcelo Geocallo nga maoy misulat sa akong sugibuhi ( biography) nga napatik usab sa Bisaya sa Hunyo 3, 2009.

Sa akong libro, gilakip ko ang labing una kun panganay kong balak, “Awitan Ko Ikaw” (Bisaya, Agosto 1, 1962) kay nahimo kining agipo nga inanayng misiga ug nagpadilaab sa dakong kaikag ug kasibot sa batan-on kong dagang.

Apan ang matawag nga pinakaunod sa akong gamayng basahon mao ang napulog walo nako ka sinulat nga mingdaog sa lainlaing tigi sa sinulatay sa upat ka kategoriya: balak, sugilanon, artikulo ug gumalaysay diin pipila niini akong gilakbitan pagsaysay atubangan sa 283 ka delegadong nanambong (segun sa narehistro) nga mga kagupa nila ni Tatay Bruno Suico ug Macario Suico.

Samtang nagkalingaw kog tunol sa mga basahon, nagpadayon ang programa sa mga kanta, sayaw, parlor games, suliyaw sa mga nakadaog sa raffles, ug pagpangapod-apod sa 100 ka buok giveaways.

Si Josephus “Tony Pet” Suico Alejandrino, HRO sa Saint Louise CollegeCebu sa Dakbayan sa Mandaue, maoy napiling manimon sa Suico Clan 2019.

Gitapos ang programa sa usa ka panihapon ug namauli ang tanan nga nanaghambin sa hilabihang kalipay.—

Ang mga anak ni Macario, apo ug apo-sa-tuhod, sa Baas, Hilongos, Leyte. Si Avelino (Abel) Suico maoy mipaila-ila sa pundok.

Si Lydia Suico Salon (ikaduha sa tuo) gihatagan og Sertipiko sa Pasidungog sa pundok tungod sa iyang pagka magtutukod ug pinanser. Gikan sa wala ngadto sa tuo: Bebe Bernardo Suico (outgoing president), Renato S. Pono (tsirman sa Komite sa Pasidungog),...

Si Renato Suico Pono nga naglusad sa iyang librong “Kamalig”.

Pundok sa banay ni Jeremias. Maoy mipaila-ila kanila si Wulfilda Tatoy, inahan ni Padre Noel.

Pundok sa mga anak ni Pedro, mga apo ug apo-sa-tuhod. Sila si Doni ug Ebing (nagtupad dapit sa wala) maoy mipaila sa ilang banay.

Pundok sa banay ni Prima. Maoy mipaila-ila si Renato S. Pono. Anaa usab (sa iyang tupad, nag-sunglass) si Roger Pono, uban sa mga igsoon nga sila si Susana P. Soco ug Arsenia P. Torotoro.

Pundok sa mga anak ni Fidela, mga apo ug apo-sa-tuhod. Si Tony Alejandrino maoy mipaila sa ilang grupo.

Pundok sa mga anak ni Numeriano, mga apo ug apo-sa-tuhod gikan sa Davao ug Isla sa Dawahon. Maoy mipaila sa pundok si Domino Suico (atubangan habig sa wala).