ANINO SA KAAWAY
(Gula 28)
NAHIUGBOK si Victor Foz. Alang kaniya, ang gibalita ni Roding usa ka mangil-ad nga damgo nga natibuok ngadto sa usa ka makalilisang nga daman. Usa kini ka masakit nga komedya, kon magtiaw man lang ugaling ang nagtaho kaniya nga gidagit sila si Arlin ug Inday Shantal sa wala hiilhing mga tawo. Apan nasuta niya nga wala magtiaw si Roding. Bisan daklit lang ang ilang panaghimamat, may natugkad na siya sa kinaiya niini. Dili kini maantigong mangomedya sa usa ka seryosong butang. Namatikdan ni Victor nga ang mga gaway
sa kabalaka ming-inanay pagpanguyapot sa iyang kahiladman. Mingsugod sa pagpanubod ang hagkot nga singot sa iyang kalawasan bisan bag-o pa siyang nahuman og kaligo.
“Unsang orasa kini nahitabo, Mr. Sarong?” Nangutana si Victor nga ang dughan gisaog sa naghuro-huro nga kakulba.
“Kagabii sa mga alas 11:30,” maoy tubag. “Unom ka tawo ang mingkuha kanila. Pulos nagmaskara. Ang upat ka polis nga nagbantay gipamatay sa mga kidnaper.”
“Duol ra man sa munisipyo kanang inyong gipuy-an,” ni Victor pa. “Wala ba maalarma dayon ang kapolisan sa mga butobuto?”
“Wala gyod, Mr. Foz,” ni Roding. “Gigamitan og silencer ang mga armas sa mga kidnaper aron dili molanog ang mga buto niini. Limpiyo kaayong pagkabuhat ang pagdagit sa inahan ug anak. Morag giplano gyod kini nila pag-ayo.”
“Wala ba kamo pasakiti sa mga kidnaper?” pakisayod ni Victor. “Wala ba nila unsaa ang imong asawa ug mga anak?”
“Wala man hinuon, kaluoy sa Diyos,” ni Roding pa. “Sa akong pagsabot, wala silay interes sa akong pamilya. Sila si Arlin ug Shantal lang gayod ang ilang tuyo.”
Sa hunahuna ni Victor, dili na angay pang ipangutana kon kinsa ang nagdagit nila ni Arlin ug Inday Shantal. Ang mga sakop sa Bangkulis maoy iyang gipasanginlan.
“Nganong karon ka pa man makatawag nako, Mr. Sarong?” ni Victor na usab.
“Wala dayon nako makuha ang numero sa imong cellphone,” tubag ni Roding. “Kaganina lang nako mautingkayi ang addressphonebook nga didto sa shoulder bag ni Arlin diin didto nahisulat ang imong numero.”
“Ang iya diayng cellphone?” ni Victor nga daw wala pa matagbaw sa pagpasabot ni Roding. “Nadala sa mga kidnaper ang cellphone ni Arlin,” matod ni Roding.
Nahilom si Victor. Gihinuktokan niya ang gipamulong ni Roding.
“Kagabii nanawag dayon ko sa buhatan sa kapolisan sa Carmen,” namulong na usab si Roding. “Namalihog ko nila pagkontak sa kuwerpo sa kapolisan sa Mabini aron pagpahibalo sa nahitabo. Apan wala nila makontak ang kapolisan diha. Nagsige lang kunog bagting ang telepono apan walay mitubag.” Wala motingog si Victor. Nakapanglingo siya. “Ikaw na lang ang maantigong mopasabot nila ni Jimmy sa nahitabo, Mr. Foz,” nagkanayon si Roding tapos sa taudtaod nga kahilom. Mitando si Victor. Human sa ilang panagsulti, mitawag gilayon si Victor kang Maj. Dick Campo. Gipahibalo niya ang hepe sa nahitabo nila ni Arlin ug Inday Shantal. Nakugang si Maj. Campo. Ingon sa naglisod pagtuo ang hepe nga natultolan sa mga sakop sa kulto ang inahan ug anak.
“Pero unsa mang pagkahitaboa, Victor?” sukit sa hepe. “Nganong natultolan man sa mga sakop sa kulto ang dapit nga atong gitagoan sa bata nga unta kita ra may nasayod mahitungod niini? Wala man kaha kamoy laing gisultihan kon hain nato tagoi ang bata?”
“Sa akong bahin,” ni Victor pa, “wala akoy laing gisultihan kon hain ang bata tungod kay mao kanay atong gikasabotan. Ambot lang kaha sila si Tiyo Berto, Jimmy ug Arlin.”
“Ingon sa dili ko makatuo niining hitaboa,” sa hepe pa. “Ingon sa taas kaayog radar ang mga sakop sa kulto kay natultolan man gayod nila ang bata.”
“Mao sab kanay akong gikalibgan, Dick,” matod ni Victor. “Sensitibo kaayog panimaho ang mga kanahan.”
“Wala kahay nakapaniid kanato sa atong paghatod sa bata ngadto sa Carmen?” mipagawas ang hepe sa taphawng pangagpas.
“Mao kanay dili kita makaseguro,” ni Victor pa. “Basin tuod kon nabantayan kita sa mga sakop sa kulto sa atong paghatod sa bata ngadto sa Carmen.” Nahilom si Maj. Campo didto sa pikas linya. “Moanha ko karon sa imong buhatan, Dick,” nagkanayon si Victor. “Labing maayo hinuon, Victor,” sa hepe. “Paaboton tika.” Human sa ilang panagsulti, wala tuyoa nga nabuhian ni Victor ang taas nga panghupaw. Nagsuhag ang iyang mga
Giunsa kaha pagkasayod sa mga sakop sa kulto nga bisan sa kasekreto sa gitagoan nila kang Arlin ug Inday Shantal, natultolan pa man kini?
pagbati, nag-alintabo iyang dughan. Nahingawa siya pagayo sa nahitabo nila ni Arlin ug Inday Shantal. Wala siya magpalandong nga mahitabo kini. Ug nabalaka siya kon unsaon niya pagpasabot sila si Tiyo Berto mahitungod sa nahitabo nila ni Arlin ug Inday Shantal.
Apan dili mahimong ililong niya ang kamatuoran ngadto kanila. Kinahanglang masayod sila sa matuod.
Dihang nakabaton na siyag igong kalig-on, migawas siya sa lawak ug gipakigsultihan sila si Tiyo Berto. Nakugang ang tulo sa kasayoran nga iyang gibutyag. Si Belen mihilak. Si Jimmy nagpamukpok sa dughan. Nagpangumot usab si Tiyo Berto sa ulo.
“Gikasubo ko kaayo kining hitaboa, Gaw.” Gikabyonan sa kaluya ang tingog ni Victor. “Gibuhat na namo ang tanan aron mahalikay ang bata sa kakuyaw. Apan napakyas kami. Natultolan gayod sa mga Bangkulisan ang dapit nga nahimutangan sa bata. Ang nakapait pa gyod kay gidala usab nila si Arlin.”
“Hain man kaha nila dad-a si Ate Arlin ug Inday Shantal, Gaw?” ni Belen nga naghilak, ang balatian daw gisugwakan sa kabalaka.
“Nagtuo ko nga anhi gyod nila dad-a sa Mabini ang inahan ug anak,” tubag ni Victor. “Nia dinhi maglihok ang mga Bangkulisan. Dayag na lang nga anhi gayod nila dad-a ang bata.”
“Apan nganong nasayod man sila, Gaw,” gikan ni Jimmy, “nga atua sa Carmen sila si Arlin ug Inday Shantal? Walay laing nasayod niini gawas lang kanato.”
“Mao kanay gusto kong masayran gikan ninyo,” ni Victor. “Kon gituman ba ninyo ang gibaod ni Maj. Campo nga dili gayod mosulti kang bisan kinsa kon hain nato dad-a ang bata?”
Ug gianid pagtan-aw ni Victor ang tulo. Si Tiyo Berto nagaduko. Si Belen nga naghilak nagpamahid sa mga luha. Si Jimmy maila sa luta sa panagway nga gilampurnas sa kabalaka.
“Wala koy laing gitug-anan kon hain ang bata, Gaw,” nagkanayon si Jimmy. “Akong gituman ang gibaod sa hepe.” “Mao sab ko, Gaw,” ni Belen pa. Niining tungora, si Tiyo Berto nagpabilin nga nagduko. “Ikaw, Tiyo?” sukna ni Victor. “P-pasayloa ko, Dong.” Mikurog og diyotay ang tingog ni Tiyo Berto. Dihang miyanghag kini, nakita ni Victor ang pagpanglipaghong sa panagway niini.
“Ng-ngano man diay, Tiyo?” Gitutokan ni Victor ang hamtong.
“W-wala nako tumana ang pahimangno sa hepe.” Nagduko si Tiyo Berto.
Sila si Victor, Jimmy ug Belen nakugang sa ilang nabati. Mora silag gitamparos og walhon.
“G-Ginoo ko,” tuaw na lang ni Belen nga mikumot sa iyang mga buhok.
“Apan kasaligan ang tawo nga akong gitug-anan, Dong,” si Victor maoy giatubang ni Tiyo Berto.
“K-kinsa?” sukit ni Victor nga gitil-asan ang kahiladman. “Kinsay imong gitug-anan bahin sa atong gitagoan sa bata, Tiyo?”
“Si Padre Daniel.” Gibundak ni Tiyo Berto ang tubag, daw may pagbasol nga namasuni sa balatian.
Mingsanting ang mga dulunggan ni Victor sa iyang nadungog. Si Padre Daniel? Wala niya damha ang maong kasayoran.
“Wala ko makabalibad dihang nagpakisayod si Padre Daniel mahitungod sa bata atol sa iyang pagduaw sa paghaya kang Marta,” pasabot ni Tiyo Berto. “Gitug-anan ko siya tungod kay dako kog pagsalig niya sanglit usa man siya ka alagad sa Diyos.”
Wala makatingog si Victor. Dihay nagkalainlaing mananap nga pak-an nga nanaglayog sa lawak sa iyang kaisipan. Nanagsumpaking mga pagbati migahom sa iyang kahiladman. Mora siyag gidalipunga.
Mitalikod si Victor sa tulo ug mipaingon sa pultahan. Milantaw siya sa gawas nga ingon sa wala sa kaugalingon. Napukpok niya ang palid sa pultahan. Ug nangagho siya. Naglibog na siya pag-ayo niining mga panghitabo karon. Wala na siya masayod sa angay niyang buhaton. May mga pintura sa nagkadaiyang kolor nga nayabo ug gilahugay sa sanggaan sa iyang alimpatakan.
Ang iyang hunahuna mimando kaniya sa pagtulisok kang Tiyo Berto kay kini ang angay basolon. Apan lain ang gidiktar sa iyang konsensiya. Ang iyang tanlag nagtudlo nga inosente sa maong hitabo si Tiyo Berto. Ang dako niining pagsalig kang Padre Daniel maoy hinungdan nga mitug-an kini sa matuod mahitungod sa bata.
Si Padre Daniel! Milugan-ob ang ngalan sa pari sa lawak sa iyang hunahuna. Angay ba niyang pahamtangan ang pari? Dihay nipis nga pagduhaduha nga inanay nahimong bulto sa katahap nga nag-umido sa iyang kaisipan. Siya kaha? Nakasukot siya sa iyang kaugalingon. Apan ang iyang katahap nahisama sa mainit nga baga nga malisod kumkomon sa iyang balatian.
Mibalik pagduol si Victor sa nahimutangan nila ni Tiyo Berto, Jimmy ug Belen sa sopa.
“Dinhi lang mo, Tiyo,” ni Victor pa. “Ayaw gyod mo pagbiya dinhi sa balay. Tubaga kon may manawag sa telepono. Kontaka ko ninyo sa cellphone kon gikinahanglan.” Mingtando ang tulo. Misakay gilayon si Victor sa iyang awto. Tulin nga nagsubay ang iyang sakyanan sa dalan paingon sa buhatan sa kapolisan. NAABTAN ni Victor si Maj. Dick Campo nga may gikahinabi sa telepono sulod sa buhatan. Wala dayon siya moduol kay misantop sa iyang hunahuna nga dili maayong tugawon ang hepe nga may gikasulti sa telepono. Mibarog lang una siya duol sa pultahan.
Apan nakamatikod na diay ang hepe kaniya. Miyanghag kini kaniya ug misenyas sa paglingkod samtang padayon kining nakigsulti sa nanawag sa telepono. Milingkod si Victor ug naminaw sa panagsulti sa hepe ug sa nanawag o gitawgan niini.
Wala dangtig usa ka gutlo sukad sa paghilingkod ni Victor, gibutang na sa hepe ang awditibo. Miatubang kini kaniya.
“Si Lt. Valera kadtong akong gikasulti,” tug-an ni Maj. Campo. “Siyay akong gisaligan sa pagbutang og mga checkpoint sa possible exits paingon nganhi sa lungsod.”
“Husto ang imong gibuhat, Dick,” komentaryo ni Victor. “Nagtuo ko nga anhi gayod dad-a sa mga kidnaper sa Mabini ang inahan ug anak.”
“Mao sab nay akong pangagpas, Victor,” sa hepe pa. “Mao bitaw nga gipabutangan dayon nakog checkpoints ang tanang dapit dinhi sa lungsod nga maoy posibleng lutsan sa mga kidnaper. Mamasin lang ta nga wala pa makalusot nganhi ang mga nagdagit nila ni Arlin ug Shantal.”
Igo lang miyango si Victor. Nanghupaw siya. Ug pagkataudtaod, mipalain siya.
“Nasayod na ko nganong natultolan sa mga sakop sa kulto sila si Arlin ug Inday Shantal didto sa Carmen, Dick,” niya pa.
“H-ha?” Nakugang ang hepe pagkabati sa iyang gisulti. Nahitutok kini kaniya.
“Tungod kang Padre Daniel, Dick.” Gibungat na gayod ni Victor ang buot niyang ipadayag. Ang kayugot mihinay-hinay pagkamang sa iyang galamhan. “Gitug-anan diay ni Tiyo Berto si Padre Daniel kon hain ang bata tungod kay nagsukit-sukit kini kaniya. Misalig si Tiyo kaniya tungod kay usa man lagi siya ka alagad sa Diyos. Natibuok ang akong katahap ron. Usa lang diay ka plantalya ang iyang pagka pari aron pagtabon sa tinuod niyang bulok. Usa diay usab siya ka sakop sa kulto sa mga demonyo.” (PADAYONON)