Ang dakong hulga sa ISIS sa atong nasod

USA ka dakong rebelasyon ang nabutyag kaniadtong Hunyo 4 nga nakapaigking sa mga opisyal sa Department of National Defense (DND) ug sa intelligence community sa atong nasod.

Sa iyang diskurso sa usa ka panagtigom sa mga eksperto sa seguridad sa kalibotan nga gihimo sa Singapore, gibutyag ni Defense Minister Ryamizard Ryacudu sa Indonesia nga aduna karoy mokabat sa 1,200 ka operatiba sa Islamic State of Iraq and Syria (ISIS) sa Pilipinas ug kini naglakip sa 40 nga gikan sa Indonesia.

Ang unang nakurat ug ingon sa dili makatuo mao si Defense Undersecretary Ricardo David, nga nagrepresentar sa Pilipinas sa maong panagtigom. Matod pa niya, wala siya masayod kon tukma ba ang pigura ni Ministro Ryamizard. Ang iyang banabana kapin kun kulang 250-400 lamang ang ISIS sa Pilipinas, nga ubos kaayo sa gibutyag sa ministro sa Indonesia.

Apan gikompirmar ni David nga may 40 ka langyawng teroristang ISIS nga ming-apil sa pag-atake sa Marawi City, walo niini ang napatay sa mga tropa sa gobyerno. Ang napatay nga mga langyawng membro sa ISIS naggikan sa Malaysia, Indonesia, Yemen, Saudi Arabia ug Chechnya.

Dihang gipangutana kon tinuod ba ang gibutyag ni Ryamizard, si Defense Secretary Delfin Lorenzana igo lamang mipakibo sa iyang abaga uban ang pag-ingon: “Wala kamiy kompirmasyon.”

Duha lamang ka butang ang atong ikasulti bahin niining maong rebelasyon: una, ang banabana sa ministro sa Indonesia gipalobo lamang; ang ikaduha, mahimong ang sanga sa intelligence sa atong kasundalohan ug kapolisan natulog sa ilang puwesto. Ang mga Tagalog adunay mabulokong deskripsiyon sa pagpasagad sa trabaho: “natutulog sa pansitan.”

Mas motuo ko sa naulahi tungod sa nahitabo nga pagatake sa Marawi City kaniadtong Mayo 23 ug sa Bohol kaniadtong Abril 22. Ang Bohol hilabihang layoa gikan sa Sulu apan sayo sa buntag sa Abril 22 nakugang na lamang ang mga mulupyo sa Inabanga, Bohol sa paglandig sa duha ka pumpboat nga puno sa armadong mga Abu Sayyaf. Ang mga bandido wala hidiparahi sa mga sundalo ug kapin sa usa ka semana ang engkuwentro sa Inabanga una mapatay o mapalayas ang mga Abu Sayyaf.

Ang pag-atake sa Marawi City maayong pagkaplano sa hiniusang puwersa sa Abu Sayyaf sa Sulu ug sa mga bandidong Muslim nga gipangulohan sa magsoong Maute. Kini gipakita sa usa ka video footage nga nakuha sa militar gikan sa mga terorista human sa usa ka engkuwentro.

Kon atong tuhoan ang militar mismo, ang engkuwentro batok sa Abu Sayyaf ug Maute Group sa Marawi City sulagma lamang tungod kay ang nag-unang tuyo sa kapolisan mao man ang pag-aresto kang Ispilon Hapilon nga nagtago sa Marawi City niadtong higayona. Dihang ila na untang dakpon si Hapilon gisugat sila sa dakong puwersa sa mga terorista. Ug diha magsugod ang lahutay ug nukanok nga pinusilay.

Ang kahibudnganan mao nga dili pa dugay, gibutyag sa militar nga si Hapilon andam nang mosurender tungod kay luya na kini ug may gibatyag nga dakong balatian. Ang usa ka report nga gikan sa militar nag-ingon usab nga si Hapilon napatay sa pagpamomba sa militar sa Sulu.

Apan ang video footage nga nailog sa mga sundalo nagpakita nga dakong buhi si Hapilon ug siya ang nangulo

sa komperensiya uban sa magsoong Maute labot sa pagatake sa Marawi City. Sa bidyo nakita si Hapilon nga kalmado apan ang iyang usa ka bukton ingon sa artipisyal. Gibalita sa una nga putol ang usa ka bukton ni Hapilon. Gipakita usab nga si Hapilon ang giila sa magsoong Maute nga ilang lider ug gikonsulta sa ilang mga plano batok sa militar.

Kon ngano nga ang Intelligence Service of the Armed Forces of the Philippines (ISAFP) nga kugihan kaayo sa paggukod kang kanhi Presidente Gloria MacapagalArroyo sa “Hello Garci” ug ang sanga sa intelihensiya sa Philippine National Police (PNP) wala makamonitor sa pag-atake sa mga Abu Sayyaf sa Marawi City ug sa Bohol usa pa lang ka bulan ang milabay, kini maoy dili hisabtan sa mga lungsoranong Pilipino. Ilabi na kay milyones ang presupuwesto alang sa intelligence nga apil kanunay sa atong nasodnong badyet. ISIS usa ka ideyolohiya Sa iyang libro, “Anatomy of Terror: From the Death of Bin Laden to the Rise of the Islamic State”, gipanag-ing ni kanhi FBI Special Agent Ali Soufan ang Al Qaida ug ang ISIS sa usa ka hydra, ang serepente sa mitolohiyang Griyego nga adunay daghang ulo.

“Kon imong putlon ang usa ka ulo sa hydra, may mogimaw nga duha,” matod pa ni Soufan sa usa ka interbyo.

Dihang gipangutana siya kon ngano nga taliwala sa paglampos sa mga gobyerno sa Kasadpan batok sa ISIS ug Al Qaida ug sa pagkapatay sa daghang terorista nagpabiling dakong hulga ang ISIS, kini ang tubag ni Soufan: “Kini tungod sa ideyolohiya, sa ilang pagtuo. Nagtuo sila nga nakig-away sila pinasikad sa ilang interpretasyon sa ilang relihiyon. Ang atong kaaway usa ka organisasyon.”

Matod pa ni Soufan, ang ISIS ug Al Qaida nakabangon bisan kon daghan na kanila ang napatay tungod kay wala pa nato maputol ang tibuok ulo sa hydra. Ang ulo sa hydra mao ang ideyolohiya ug mensahe nga nakutlo gikan sa Koran.

“Samtang dili nato maputol ang ulo o ang ideyolohiya sa ISIS, magpabilin nga dakong hulga sa katawhan ang mga panatikong Muslim,” matod pa ni Soufan.

Mao kini ang dakong gumonhap nga giatubang karon sa Pilipinas. Bisan pa kon maabog nato ang mga Abu Sayyaf ug ang Maute Group sa Marawi City o mapatay silang tanan, magpadayon ang hulga sa radikalismo ug panatisismo sa mga Muslim dili lamang sa Pilipinas kondili sa tibuok kalibotan.—

Bisan pa kon maabog nato ang mga Abu Sayyaf ug ang Maute Group sa Marawi City o mapatay silang tanan, magpadayon ang hulga sa radikalismo ug panatisismo sa mga Muslim dili lamang sa Pilipinas kondili sa tibuok kalibotan.